昨日,有老友将王文彦,施永青两人逐鹿中原的文件发给我,又立刻问我意见,我本来没有兴趣,但老友盛意拳拳,於是快速睇一次,睇完之后立刻回电,话我老友讲错,王施两人并不是逐鹿中原,或者老施仍然可以用逐鹿,老王一定唔系,佢要求与老施每人做一年主席,根本唔敢硬拼,又怎样可以话逐鹿中原,而且,老施提出一个条件便高下立见,他同意老王做第一届主席,第二届开始才由他们两人争取,老王都唔敢接受,令支持他的人非常失望,不过,我认为大家又唔需要失望,不少人讲政治,讲选举,又话人人有投票权,但要他们放弃既得利益,又立刻会改变态度,老王唔系,主席位置摆在眼前,佢都唔敢坐,我觉得是弱鸡表现,如果搞到要清盘,我就更加不明白。
我认为老王今次中计,老施根本没有打算将第一届主席的位置俾老王,但佢知道老王唔敢坐,所以便扮作大方,如果老王敢接,中原不知有几多人行出嚟反对,所以我话老王中计,如果系我一定会做,有一届时间部署,连任的机会一定比老施大,如果未能连任,就技不如人,无话可说。
大家唔好以为我替施永青讲说话,老施非常憎我,去年,老施在每一次演讲时的开场白一定是「有人话楼市爆煲,爆什么煲」,大家应该知道,那个人就是我,老实说,我没有如此广阔胸襟替老施讲说话,我只不过是以事论事。