地产博客 > 楼市散打王 返回
浏览人次:29424    回应:12
楼市散打王

终极辣招

 

方卓如

2018年3月6日 (信报)

《财政预算案》冇乜好讲,反而预算案记者会值得讲。司长话会睇睇发展商点卖楼,留意到有发展商只系推一两间单位招标,呢种卖楼手法引起关注。司长咁讲,小心最强辣招出笼。发展商有楼唔卖,唔系嫌钱腥,刚刚相反,就系想赚尽。唧牙膏式卖楼先可以尽吸购买力,让买家无可选择,没有仔细思考空间,有买趁手。

人最大嘅困惑,出现於有选择嘅时候。有选择,你会期望再好嘅选择,就会放弃眼前拣唔落手嘅垃圾。冇得拣,垃圾都要放入口,几贵都要买。

楼价愈跌愈难上车

卖楼惜售,卖唔晒留为货尾,先可以维持而家嘅市价。如果发展商一口气要卖晒先收手,减价清仓,楼价点会唔向下。正如股票一样,斩仓沽货,价钱点会唔跌?

如果政府连发展商点卖楼都管埋,令佢哋丧失定价权,楼价就有下跌压力。政府要管卖楼方法唔系冇可能,新加坡就系咁做。外国发展商起楼,限期内要卖,否则要罚。政府只要在卖地条款,甚至喺售卖楼花同意书列明,几时要全部卖晒,否则要徵税,呢项就系最终辣招。

新加坡用呢招遏抑楼价非常成功,楼价的确一沉不起。如果政府以楼价下跌为己任,出此辣招,保证楼价下跌,但系平民百姓一样买唔到楼。点解?

因为升紧嘅楼有人追,跌紧嘅楼冇人敢买,楼价下跌,银行更加做唔足价。向下嘅楼市,银行唔敢借足,自动扣减按揭成数。楼价向下,借二按嘅更高危,随时负资产。楼价向下唔会令市民更易置业,相反更加令人买唔到楼。前辈话望自己发达都唔好望楼价跌,今时今日更加适用,只系今时今日要发达更加难。

预算案唔会讲辣招,唔系场合,但系记招讲咗政府有谂计。以前辣招冇一招可以推低楼价,市民唔开心。慎防最后一招真系可以推低楼价,到时你更加唔开心。

 
 
我要回应
我的称呼
回应 / 意见
验证文字
 
会员登入
登入ID 或 网名
密码
1. 十郎 2018-03-07 08:18:40


      楼价愈跌愈难上车 ? 这一论点要有待验证。市民难买楼可以唔买 , 但唔可以冇楼住 , 即系要租喇 , 楼价升直接影响租值上升 , 那么楼价跌是否一样令租金下调 ? 这是个民生问题 , 要看政府为民生定系为库房考虑 ? 亦是竞争力问题 , 再这样升升升 , 150元一碗云吞面随时都有得食。

      结论是推低楼价非为容易上车 , 系舒解民困问题。


2. 回1楼 2018-03-07 08:32:15
推低楼价舒民困?

你火星来的?不如回到小渔村?咁就全民富裕?再不然变成北韩?
3. 巴 2018-03-07 08:57:12
同意呢招唔错

至於楼价跌 市民上唔到车呢个推论,

唔知系2003年是否冇任何买卖反映返呢

心水清知咩事

70万一间屋,5%首期,唔使3.5万上车


4. 回1楼 x2 2018-03-07 08:58:15
楼价升直接影响租值上升 ????

不一定哦。
5. 巴 2018-03-07 08:59:10
唔好以为揸住支笔就当其他人唔识字
6. 回1楼 x3 2018-03-07 09:18:41

私楼租金回报创历史新低 大单位跌穿2厘


楼价急升,租金升势永不及楼价走势,导致租金回报跌至史上低位,其中,大单位回报更首次跌穿2厘。

差饷物业估价署资料显示,实用面积1,722方尺或以上大单位,截至1月底租金回报率按月下跌0.1个百分点,跌至仅1.9厘,是五类户型有统计以来,首个跌穿2厘关口的户型。


7. 十郎 2018-03-07 09:55:25


      AA

      租金回报历史新低 , 解决方法一是租金要上涨 , 方法二是楼价要下跌。租金回报新低 , 这样是否反映左楼价太高呢 ?

      租金升 , 跟著来的是楼价升 , 楼价升左 , 租金回报又新低 , 这种狗追狗尾式的追逐 , 通涨就升 , 利息跟升 , 竞争力下降 , 必矣 ! 政府要做什么 , 无法预测 , 推升定推低 , 心中有数的。

      我无视蠢人同蠢问题 , 唯独你特别蠢 , 所以表达下意见。

8. 回7楼 2018-03-07 10:30:10
真正蠢人系面对十几年升势而后知后觉、搞到依家幻想政府推冧楼市而全民皆富,然后有不同观点者便是AA.够蠢吗?
9. 回7楼 2018-03-07 10:42:23
我是6楼,我不是AA,我看完你文字,不认同楼价升就会带动租金升,又刚睇到东方,所以转发,我是独立的留言,不要见笑。
10. 十郎 2018-03-07 10:49:59


      9 楼--------对不起 !  我见你留字大大只 , 所以误会 , 我其实真系唔回应的 , 见到租金回报新低的误解 , 忍唔住手。


11. 孟波 2018-03-07 11:50:06
AA最紧要有买卖做有单开,理得佢楼价同租金升定跌,总之要易成交,个势易叫买家高追就吹升,现在二手盘源少业主心雄,就搏命选择性出D破纪录成交新闻来误导买家,唔畀破纪录价系买唔到野。

到买家冇承接能力或企硬时,就吹跌向业主锄价务求做成买卖,升市跌市都唔系问题,最紧要有单开。
12. 天水围林太 2018-05-16 13:46:11

面粉唔再用嚟整面包

2018年05月16日

方如玉帅:启德地王由新地以251亿元投得,成为地王。其实,如果唔系计错数,第二地王,长沙湾兴华街西都应该系新地投得。记得当年新地对住镜头回应记者提问,有关海航连环高价投得启德地皮,系佢哋话要等啲癫价投晒先。言犹在耳,今日,新地用更癫价投地。证明内地发展商参与,打破了本地发展商心理相通地用本地价投标,即时将土地真正价格释放出嚟。

点解本地发展商肯陪内地发展商用癫价投地?因为佢哋有本事用更癫嘅价钱卖出去,稳赚不赔。新地8年前都投了一幅百亿元地王,位置在佛光街同忠孝街交界,楼面地价每方尺1.25万元。那地方,隔篱是爱民邨。直线思考的你,在公屋旁边,每方尺1.25万元地价,相信你一心谂住将会有个太古城式中产楼盘。7年后,楼盘开卖,先唔讲楼价,车位是近500万一个,楼盘自然是一等一豪宅,尺价超过3万的天铸。发展商有本事在任何地方起一个豪宅给你,怕什么癫价投地?地皮会有地域价钱,但楼盘价钱已不问地域,不论大细,通通豪宅价。

同年有另一幅百亿元地皮,是山顶真正豪宅地段,尺价3.2万元。今天地皮变成MOUNT NICHOLSON,尺价全港分层住宅最贵,10万蚊尺,但计落都未必够天铸好赚。

面粉价钱不断提高,因为发展商唔再用面粉整面包,全部整结婚蛋糕,价钱卖高好多。本来市民只系想食个面包顶肚,有瓦遮头就心满意足,但发展商唔会咁简单,要你食蛋糕,全部有会所、泳池、健身室,管理费足以请多个工人姐姐。以前出现面包平过面粉,但你永远唔会见到蛋糕平过面粉。

未来你唔会见到楼价跌,而且习主席还亲自批准香港要发展科技,未来大量科技人才来港。要知道,科技人是现在最有钱嘅一群。

矽谷嘅楼价全美最贵,连纽约都要楼价下跌,加州开始思考应否租管。科技人才来港,唔买楼都租楼。咁多有钱人嚟香港,你觉得蛋糕会平?