放心,基本无剧透。
前日三八妇女节,大陆嘅院线用咗一种好特别嘅方式庆祝呢个节日,喺呢日首映一套万众期待嘅电影——经期队长,真系应节到应嘞!
笔者为感恩世上妇女为地球带来嘅贡献,当然响应买飞入场,侍奉家中老板剥花生递果汁咬耳仔。一开场,见到Stan Lee,相当感触,跟著睇咗大半粒钟左右,弊!出现思觉失调,唔知点解一路好似听到X档案首主题音乐,可能系因为一路画面、灯光、人物、剧情都系X档案式发展,连D对白都似埋X档案,仲要整一幕解剖外星人,就争在唔系郭丹娜操刀唧,到咗后面,经期队长解开封印使出龟波气功,我先至发现D熟口熟面嘅外星人原来系笛子魔童!
荷里活虽然财雄势大,但系题材桥段都系会有紧绌嘅一日,复仇者联盟3里面嘅灭霸魁隆,电影里面嘅形象,活脱脱就系北斗之拳嘅拳王雷奥,而占士金马伦就干脆拍铳梦,就算系顶爷史提芬史匹堡上年嘅挑战者1号,都要加入金田部战车同埋高达嚟撑场,坦白讲,call高达一幕,全院沸腾,跨年代嘅高度共鸣感瞬间攞返全部票价,而部戏整体嚟讲只系OK。
虽然美国佬开始借日本仔桥拍嘢,但系又唔见得日本仔有几好,上述所有借桥,都系70`s至90`s嘅日本动漫作品,系软实力最鼎盛时期,2000年之后可以话乏善足陈,乃至於今日仲有龙珠电影上画。
可悲嘅年代,令人生活舒适嘅科技高速发展,而抚慰心灵嘅娱乐文化水平就日渐肤浅衰落。