电影里面经常睇到嘅绑架情节，绑匪一般会几个人分工：内鬼、侦查、司机、落手、看守、谈判、收赎金、撕票，善后等等。
而现实世界里面，原来可以单拖做绑匪，半身不遂都得，仲可以一日做几单?！
2014年某月某日.广州
铃铃、铃铃（电话响）
杨玉环小姐：“喂，你好。”
B先生：“你好，请问你系咪杨玉环小姐？”
杨玉环小姐：“系呀，你边位呀？”
B先生：“我系广州市禁毒支队嘅特警，今朝快递公司上报一件大型可疑邮件，收件人名称、所留电话、地址，都系你嘅，里面有三公斤4号海洛英，我地怀疑有人利用你嘅身份运毒。”
杨玉环小姐：“下？？唔系呀，我冇呀，唔系呀，我冇呀，我唔系呀，冇呀....”
B先生：“杨小姐，唔驶咁惊住，呢个情况最近发生过几次，我地已经掌握咗毒贩嘅犯罪模式，我知道你清白。毒贩对你背景非常清楚，可能已经监听紧你甚至你家人嘅电话。”
杨玉环小姐：（更加惊）“哑....哑....哑.....哦......哦.......哦.....”
B先生：“佢地未知件嘢俾我地截咗，会搵机会从你手上攞返件嘢，爲咗保障你嘅安全，你依家要完全配合我嘅指示，否则俾毒贩快一步就好危险，我依家用政府隐蔽频道打电话俾你，毒贩系好难监听嘅，你必须尽快离开屋企，坐的士搵一间远D嘅酒店，开间房匿喺里面，我地捉到毒贩之后会通知你。”
杨玉环小姐：“哦～～～～”
B先生：“你去之前，先录一段口讯同家人报平安喇，唔系佢地会担心㗎，我用隐蔽频道打俾佢，佢都会冇事嘅，你自己唔好随便打，你想我打俾边个？”
杨玉环小姐：“哦～～～阿妈喇。”
B先生：“我讲，你就跟住讲啦，阿妈，我冇事，我好好，我地照住指示做就唔会有事㗎喇，你讲啦”
杨玉环小姐：“阿妈，我冇事，我好好，我地照住指示做就唔会有事㗎喇。系咪咁呀？”
B先生：“系，冇错，你阿妈几号电话？你俾多几个亲人电话我，我怕有时打唔通。”
杨玉环小姐：“哦，阿妈系XXXXXX...，阿爸系XXXX.....阿.......，”
B先生：“依家系最后嘅指示，听完就照住做，关手机，因爲手机关闭情况下依然可以追踪嘅，身上唔好带任何手机，带身份证同现金，马上打的去从化开间房，入房马上反锁大门，为保证安全唔好开门俾任何人，亦唔好接酒店电话，好嘞，唔好嘥时间，快去！”
杨玉环小姐：“哦！”（挂电话兼关机）
八个钟头后...........
因爲杨小姐冇手机玩，好闷，冇零食食，嘴里淡出鸟来.......
故事讲到呢度，唔驶畵出肠，大家已经估到发生咗咩事！当杨小姐玩手机欲望战胜生命安全之际，“绑匪”早已袋袋平安，饱食远扬。真人真事广州发生，为避免模仿，此版本与原案稍有出入。
骗徒使用僞基站，假冒公安局来电打第一个电话，然后假冒杨玉环小姐电话号码来电打出第二个电话，难爲“阿妈”睇到阿女来电，再听到清晰真实嘅爱女“报平安”，仲唔发晒矛？就算阿妈几醒目，几个钟头搵唔到个女，一样要服软，“赎金”乖乖奉上。
对比於电影中一群亡命之徒，伤天害理、劳师动衆、以身犯险、工作量大、成本高昂、甚至各怀鬼胎、后患深远，电骗只需一份个人资料，打两趟电话，等你自己绑架自己，赎金就佢收，真系干手净脚、悭水悭力。
近年大量电骗跨境袭来，原因除咗中港往来日益频繁之外，香港人文风气相对单纯、法制意识浓厚被视爲弱点而成上佳攻击对象。电骗喺大陆，可谓无日无之，哪怕一个集团已经将阁下号码筛走，另一集团又会捡拾用之，早已经系生活一部份，下篇，将会讲讲如何与电骗和谐共处。
App下载
