上文题要，引刀搏到咗磨烂席嘅机会，不但可以继续伴君侧，仲可以转新宿舍，至于进修、深造、充实、上进之类嘅讲法，则不太在意，引刀认爲学校社会各有所学，只要学术基础到位，所有愿意动脑嘅人，任何时候都系学习中，不过呢D系学渣思维，千祁唔好俾细路仔睇到。
今次去到新宿舍，我系最后一个进驻，宿舍格局好得意，两房共用一个厠所，一边两张床，一边四张床。四张床果边已经满人，两张床呢边有位！同房系旧同学，虽然同呢位仁兄四年来都冇乜交集，但系好歹都系多年同窗，睇怕又可以交个新朋友。
入住新宿舍几日，发现有个好得意嘅现象，呢位仁兄日日放一粒搣开咗嘅糖喺我床头窗边，我丢咗佢又再放一粒，问佢就支吾以对。
引刀好钟意养鱼，两个人住嘅房，每人有一个大铁架，人家用嚟放杂物，我就用嚟放鱼缸，又有个好得意嘅现象，只要引刀走开两日，鱼缸就会出现古灵精怪嘅事故，次次都有死伤。
慢慢，我发现遇上魔鬼室友，怪之佢本科冇乜人同佢好，呢种心理唔平衡嘅人，好可怕，当出现喺群体嘅时侯，由于受到多数人嘅制约，碍于压力而隐藏自己，当佢同人单对单嘅时侯，大部份嘅阴暗面都会表露岀嚟。
不久前，复旦投毒案凶手正法，呢类事件喺大陆学界唔系第一次发生，轰动与不轰动我地一直都聼唔少，主要系冇搞出人命就未必会传到香港。相见好同住难唔系呢种事件嘅唯一原因，甚至唔系主因，主因往往系二人“较劲”（比较）。
如果一大班人一齐住，当中有一个系学霸，那麽其它几个人齐齐无缘问鼎，有人陪冇所谓，比上不足比下有余。如果有一个系学渣（比如引刀），咁又系冇事，因爲个个考试成绩都好过我，唔通嬲咗成村人咩？早就认命。但系二人宿舍就有一个问题，大家只有胜负，任何一方面，都系只有胜负！非胜则负。
学生之间，最攀比嘅一点，无可置疑就系头脑，呢样嘢男生紧要D，但系女生都差无几，然后依次大概系拖友嘅水平、家庭背景、个人外貌、人缘及交际能力、运动天分.....等等。因爲高校里面嘅人，大多都系相信智商支配未来人生格局规模。
引刀贵为 当年级中八大学渣之一，本来就可以与世无争，不过呢位港灿同学都唔系完全身无长物，虽然大部份科目考笔试都徘徊於榜末，但系入到实验室，引刀系王者，动手能力以及对实验嘅规划能力，非但授课老师欣赏，连学院内冇带实验课嘅老师都知道引刀嘅表现，所以改卷都会补贴多少印象分，否则引刀分分钟毕唔到业！当年港澳生读我地呢科甚少，以至造成一种港澳生答题差而偏重於动手能力嘅假像，老师们问我，从实作表现我应该充份理解学科，系唔系因爲唔识中文所以答题写得咁差呀？我梗系忍住笑顺水推舟话系喇，唔通照实讲话我读书屎咩！好歹总算冇太丢英女皇嘅架。
言归正传，当年班中强手如云，天资敏悟者比比皆是，呢位魔鬼室友想做学霸当然排唔上号，如今见到有学渣同佢同房，心里自然涌出一股期待，以爲自己有压倒性优势，未来三年都可以顾盼自豪，可惜初步接触之后，佢完全尝唔到甜头，越系尝唔到甜头，就越系急切去证明自己，因爲，聪明唔过学渣，系呢种人无法想像兼无法接受嘅事情，别人一切稍爲灵巧嘅表现，都会触及佢神经，视爲威胁。
慢慢，本来小打小闹嘅小动作，演变成每每有宠物伤亡嘅爆阴毒，引刀觉得极爲困扰，加上对方两次追女仔失败，面容日渐阴暗，引刀已经开始担心人身安全，因爲大家都要做实验室工作，而对方嘅实验室，毒物真不少。
有那麽一点相似，复旦投毒案凶手独身、完美主义、内向、多面性格、勤学，而且胆大手黑。官方发布凶手嘅供述，大部份都系律师精心为免死而铺排嘅，经常要思考同设计实验嘅人，也许会好容易推断勾划出另一个一石数鸟嘅恶毒计划，凶手系牺牲对方身体健康作爲自己宝贵实验资料，人如何能够如此贱待一个熟悉嘅人？就系恨。既生瑜，何生亮，周瑜谷死自己，林某就毒死人地。每次谂起呢件事，引刀“后怕”。
恨，使力量变成无限大，当时引刀差D想同佢死过！忽然，眼前出现一个转机，到底系乜好嘢？唔卖关子，下篇就系引刀败走买大陆楼。
App下载
