SHEIN 唔来香港上市

　　从神州大地返到香港，听闻“快时尚”零售商 SHEIN 喺美国上市遭受到困难，依家打算去伦敦上市，其是否顺利过关斩将成功 IPO，睇来依然系末知数。呢间喺近十年来异军突起嘅网上服装公司，系已经有世界名牌如 Zara、H&M 同埋日本品牌 Uniqlo 等竞争激烈嘅产业中依然能够快速崛起，真系异数。真系好嘢，值得一赞！每年以百分百嘅速度增长，销售额已经同 Zara H&M等平起平坐，唔话系一个成功嘅最佳标志。

　　呢间来自南京嘅 Startup，来到广州嘅服装生产基地番禺，在极速嘅时间内组织咗供应链，运用神州大地嘅基层廉价劳动及其原材料供应，以火速更新网上嘅服装款式设计，超便宜嘅价格做噱头，受到 Z Generation 嘅青睐。呢间原本喺神州注册嘅公司，唔知何时何日迁拆到新加坡，供应链依然喺广东，但业务已经铺陈到全球。我就系由 Z Generation 年轻朋友度首先听到 SHEIN 嘅产品，真系好彩自己冇俾时尚潮流忘记。

　　香港作为远东金融中心，SHEIN 作为中国人嘅企业，唔知佢点解唔来香港 IPO? 佢依家身为新加坡公司，又唔考虑新加坡，系唔系觉得香港同埋新加坡嘅股市唔够 Sexy?当然，近期香港恒生指数低迷，唔系好嘅上市时机，咁新加坡呢？睇来 SHEIN 嘅 Business Model 好似抖音，啲服装价钱便宜到人唔相信，已经有人话佢走法律窿旯，引起唔少法律争议。如果咁睇，SHEIN 来唔来香港上市，都唔需要觉得可惜。依家华尔街及东京股市创新高之际，恒生指数继续低位盘整震荡，香港更需要对症下药，吸引有份量嘅高科技公司来香港 IPO至系当务之急。