地產博客 > 絲絲細語 返回
瀏覽人次:16728    回應:0
絲絲細語

專業精英冇面

 

左丁山

2018年1月15日

  到喜萬年吃午飯,九十歲保險界行尊L前輩做東,頭盤就係燒乳豬全隻,老人家喜歡懷舊,食燒乳豬就一定想起喜萬年,難得佢胃口仲非常好,食得擦得飲埋靚紅酒,左丁山到咗九十歲,都希望有如此健康狀態。單尾係生炒糯米飯,好多人話比較難消化,前輩L照樣吃一小碗,好福氣也。

  大家談話,離不開警覺性,敏感度,無意隱瞞,以後大家如有蝦碌,失魂,撞板等等事情,當然已從兩位鄭女士身上,學曉咗點樣講,以求甩身,例如對交通警察講:「阿sir,我冇警覺性,睇唔到你就企在角落,我又冇敏感度,以為在雙黃線停低架車,入去7-11買包傷風丸啫,我好忙呀,周身唔得閒,趁住前面紅燈塞車,偷三十秒落車之嘛!阿sir請你有啲包容性啦,我又冇禍及他人,依家開車走嘅嘞!」

  香港人見得呢啲事例多,愈來愈「犬儒」(cynical),對政府高官不信任,非香港之福也。賓架H為潘太辯護,大聲講:「香港人有邊個冇僭建呀,使乜咁緊張啫,啲反對派想中央阿爺難堪就真!」

  問香港邊條街冇僭建,確係難答,港九新界建築物僭建之多,難以勝數,如果話邊位精英要做官,屋企要事先(任命之前)請屋宇署去檢查過先,恐怕幾難有政府以外嘅專業精英肯加入政府做事咯,故此某程度上,賓架H講得好實際,不少人有同樣意見。

  之不過,兩位鄭女士之最大敗筆係佢地「自殘」,說話前後不一,與專業精英身份不符。林鄭特首在港英時代加入政府,學師時大概睇到理民官鍾逸傑及位位港督都好似睇唔到新界有僭建,港九有僭建,林鄭有冇問過英國師傅why why why呀,鍾逸傑唔識陳日新、張人龍、劉皇發乎?要發力篤破呢個蜜蜂竇嘅就係林太,心口寫個勇字,未有全盤計劃,未有Plan B就以發展局長身份聲言全力整理新界僭建,摧毀唐英年九龍塘家居僭建,依家居然叫香港市民包容潘太僭建,果然係精英心態,雙重標準。潘太呢個特許工程師,資深大狀,香港建造業分包商聯會榮譽顧問,曾出版一本書(與Gary Soo合著):Construction Law and Practice in Hong Kong(2011年第2版),精裝本賣三四千蚊一本,學生版本賣五百蚊,居然敢膽話自己忙,冇警覺性,唔察覺屋企有僭建地庫?星期三跑夜馬,一位工程師對左丁山講:「潘樂陶前輩、鄭若驊大狀話唔覺屋內有僭建,令我地工程師好冇面,我地邊有咁渣㗎,我一睇就知嘅嘞!」

 
 
我要回應
我的稱呼
回應 / 意見
驗証文字
 
會員登入
登入ID 或 網名
密碼