幾年前有朋友往大埔睇獨立屋，經紀向佢大力推薦一間，理由係：「地下下層有地庫，在裏面打牌、唱K、夾band，包唔會嘈到鄰居，好正，直情係買燒肉送多一嚿叉燒！」朋友當時知到有唐英年及梁振英之僭建新聞，知道僭建呢回事可大可小，唔願意買，經紀話：「怕乜啫，呢度有不少住客係律師、工程師、高級行政人員，人人都係咁，你唔好去做官就得㗎嘞！」
唔做官就無人理，故此潘樂陶鄭若驊夫婦住兩間相連獨立屋有無僭建物，之前無人過問，但鄭若驊官運到，有特首睇起，委以重任，坐上律政司司長高位，咁就令附近街坊好唔得閒嘞，地政總署有排調查、跟進，唔通公然大細超，偏心某人咩。
鄭若驊讀書十分醒，讀完土木工程，得到專業資格後，知道當年土木工程係男人世界，出入地盤辛苦，聽粗口機會不少，於是轉行讀法律，成為大律師，好快就在建築界走紅，原因好簡單啫，同時擁有大律師與特許工程師資格嘅法律界人士，甚為罕有，而香港建造業界興旺，遇上工程合約糾紛，向政府索償時（如起路時掘到古蹟，政府延遲工程），有位大律師一聽案情就完全明白（其他律師要仔細研究幾小時先知問題所在），第一時間進入狀況，擬定索償策略，往往令政府律政署人員吃不消，擋不住，答應仲裁、賠償，你話呢類大律師幾值錢呢。
鄭若驊大概已達視金錢如浮雲階段，「先生」潘樂陶又有大把身家，加入政府做高官，為香港法律界之首，幾咁唔好呀，亦人之常情，不過佢退出商界，令建造界人士若有所失，好唔捨得，以後搞工程仲裁，打工程官司，搵邊個好呢？商界之失，或會是政府所得。近日在馬場見到另一位女工程師，佢話過往幾年因立法會拉布，撥款延遲嘅關係，引起不少工程索償，建造界發一筆大橫財（故此全是建制派之工程界會不介意立法會拉布，暗地裏好歡喜），政府盡量擋住，但一啲富二代業者熱中於參加建制政治團體，不時上京與高人會面，順便就篤佢地唔順眼唔合作嘅特區高官幾句，令高官不勝其煩，現在有個熟悉情況嘅工程師大狀為政府擋駕，好使好用也！誰不知新司長又跌落僭建陷阱，聲譽受損，面目無光，鄭司長生於1958年，屬狗，狗今年犯太歲，幾煩㗎！
App下載
