一位老友在中午飯局指左丁山偏幫領展及兩電，問左丁山有冇股票，於是申報利益，左丁山揸住幾隻REIT，但偏偏冇823領展，主要原因係嫌佢價格高，息率比較低，又唔似得曾智華咁醒，領匯一上市就持有，年年增持，退休後收息收到笑。曹仁超生前亦同左丁山講，佢在某一間大學畀意見：建議大量持有823收息，嗰間大學嘅永續基金回報率因此得以大大提高。
左丁山私人持有港燈（2638），個人管理一隻獎學基金同時有中電及港燈作收息用途，但無揸823。依家銀行存款幾乎冇息收，有基金而無利息，如何每年支付獎學金畀學生？故此投資於中電港燈係一個幾好嘅做法。
偏幫與否，由讀者判斷。左丁山只係講事實及個人意見，12月18日香港時間凌晨，美國最繁忙機場之一──亞特蘭大機場發生大停電近十一小時，過千班航機取消，令旅客高度不便，如果同樣事情在赤鱲角發生，本港市民及傳媒會鬧到拆天，但亞特蘭大卻若無其事，可見香港人及媒體之要求幾咁高，直情係高到世界罕有！香港絕對負擔不起大面積及長時間停電，決不能局部地區性限電，否則在高樓大廈滿佈，居民密集嘅香港九龍新界，一定會產生大混亂，危及生命。
對左丁山來講，因曾在外地受過停電不便嘅經驗，對香港電費並無抱怨，亦唔覺得貴噃，德國人民交嘅電
費，每度電比香港貴得多，點解會咁值得一啲「反加電費」關注組去研究下。上一次環境局做諮詢調查，得到嘅一個結論係香港人高度重視供電穩定性，電費水平尤其次要。至於領展，領匯上市時已有大辯論及司法覆核，卒之法庭並無阻止領匯上市，但反對者至今不肯罷休，似有心結，有啲人至今話仍在反對前線，一共12年，不知是否浪費青春？還要下決心趕走領展！怎麼樣趕走？葉劉淑儀有份嘅董建華政府當年決定分拆領匯上市，你叫林鄭月娥如何收回？回購領展喎，唔好再講笑啦，講得多都嫌嘥口水，林鄭一定搞唔掂，葉劉更加冇符，現在領展市值1540餘億，在市場全面收購仲要付溢價，唔駛問陳茂波司長，都知道政府唔肯孭呢條數啦，冇邊間銀行做政府顧問認為回購領展係一個good deal嘅？即使百分百政治掛帥，立法會都唔會通過，用千五億嚟大量興建公屋豈非對基層市民更有好處？
App下載
