禤國全話佢以前買樓,首期一成,按揭九成,造就咗佢積累財富,呢個方法自97金融風暴之後,已經行唔通,現在無謂仿效。供樓雖然難咗,但樓價升得更加快,係乜現象呢?經濟解釋就係香港人有錢,外來資金龐大,兩者合流,就將向來供應不足嘅香港樓市推上一個高峰又一個高峰。
外來人有大錢,專買豪宅,最近在星巴克就聽到隔籬枱講:「喂,某某市長嘅朋友來港用七億幾買咗一間house,預備落嚟長住喎。」講得唔知幾輕鬆,以前聽一位潮州大富豪講過:「賺一億係好難㗎!」點知佢啲後輩只當三幾億係零用錢,言必十億百億,都唔知係乜嘢概念。前幾日去上海總會食飯,一位退休潮州賓架對左丁山講:「一萬億係乜嚟㗎,我都數唔清有幾多個零,唔怪得我哋早退早着,以前見到一張一百萬美元L/C,我要翻來覆去睇五六次先至肯確認呀!」點解講到一萬億?原來有人話畀佢聽,騰訊市值三萬幾億,佢嚇咗一跳!按每股390元計算,騰訊市值係3萬7千億,折算美金約4743億,與阿里巴巴嘅4772億美元相距不遠,同是世界級科網股。左丁山對退休賓架講:「你哋潮州風水好,人傑地靈,香港新舊大富豪都係潮州人!」(按:馬化騰住在石澳,已變為香港人。)
香港人不屬此類富豪者,就專買納米盤,上車盤,為下一代置業。左丁山以前話香港藏富於民,父母為兒女買樓,已成時尚。現在呢個觀察已有調查證實,AIA做咗一個調查,發現45%父母指難免要為子女置業,約一半父母認為幫仔女買樓比自己退休更加重要,53%父母願意做「加按」來為子女取得首期,資助金額平均90萬元,最多一千萬元,呢個調查證實香港父母係24孝敬子女嘅,好願意為幫助子女買樓而犧牲自己退休金,此大概係梁振英政府推出辣招之前,完全冇人諗得到嘅,香港父母收埋咁多錢,對子女又咁偉大,將自己層樓加按借錢為下一代做首期,究竟呢樣做法啱唔啱,有得拗!沙田陳太在大埔街市碰到校友W,佢就一於反對。校友W話:「喂,我唔係潮州姓馬,退休金得來不易,我哋啲醫療保險費又貴,人老就要為自己打算,我叫兩個仔女食自己㗎,供完佢哋讀大學,仲要同佢哋供樓?我一於唔制!」此乃個人選擇,子女的確不應以為父母提供首期係必然之事!