不要子女買樓

　　陳德霖警告「買樓靠父幹」有風險，主要係指有父母加按物業，向銀行再借多三幾百萬，為兒女買樓做首期，於是如果樓價下跌嘅話，父母與仔女齊受衝擊，特別係父母已經退休之後，應付加按供款嘅能力，值得關注。

　　任何時候借按揭供樓都係有風險嘅嘞，問題係如何應付風險嘅啫。父母、子女如懂得量力而為，職業有保障嘅話，經驗告訴我們，即使香港碰到建華七年不景氣加上沙士，衰到貼地，仍然可以安然無礙，渡過難關；左丁山不少朋友便有此經歷，最怕係一旦失業，便無險可守，所以供樓人士往往要考慮此點，一份穩陣嘅工作勝於今日花紅多、明日會炒魷嘅職位，供樓期內，不要輕言搵工跳槽，要諗清諗楚。

　　因陳德霖之言，幾位朋友有不同意見。原來「買樓靠父幹」呢個命題具備相當爭議性，亦成為家庭關係緊張之源；香港嘅社會學學者，若研究香港家庭組織，家庭社會學，一定不能忽視呢個命題。有朋友A自幼家貧，全靠考上港大，畢業後（當年）係天之驕子，好快成為「打工皇帝」，於是送兩個仔去英國留學，回來成為乜師物師，總之係高級專業人士，月薪相當高，但十年前兩個兒子分別結婚，朋友A話：「我自己辛苦捱上嚟嘅，我唔敢要你兩個回饋我嘞，但你地唔該買樓結婚靠自己！」十年前禮頓山千四呎市價約係千二至千四萬，朋友A可以拿得出三成首期為大仔買樓，但大仔未有足夠積蓄，父親不肯幫助，於是租樓住，住靚樓喎，十年來一路加租，而今每月交租（不是禮頓山樓盤）已係六萬幾元，因兩夫婦係青年「財俊」，交租還是冇問題，另一方面，禮頓山千四呎已經升到五千萬以上，今天按揭只能按五百萬元，朋友A已無力為大仔提供首期，朋友A妻子為兒子每月交租六萬幾，非常肉痛；朋友A呻笨不已，但為咗維持尊嚴，點都唔敢出聲，仔同新抱就絕口不提此事，此乃香港家庭一景。朋友B係中大畢業，唔肯為女兒結婚時提供首期，依家女兒為避市區租金昂貴，搬咗去新界住，朋友B想見吓外孫女要預約時間入屯門，做阿婆嘅B太自然大講哦文。朋友C呢，炒樓發達搵長咗，三位仔女長大成人，剛好俾佢借名字一用，三仔女分別買入新樓，作收租用途，首期全部由朋友C出，似乎又係「買樓靠父幹」形式，實際上就係仔女「第一次買樓」，唔駛交懲罰性印花稅，明益老竇買樓投資是也。