左丁山儍儍地問一位教學二十幾年嘅教師V:「點解你地行家要讀兩三個碩士學位?有碩士未必有人工加,又唔保證可以做到GM(學位教師)嘅噃?」教師V答:「教中學有兩張必需文憑:一張係學士學位,另一張係教育文憑,如果冇,你根本冇資格入行,如果有,亦未必入到行,因為人人都有吖嘛,我間學校嘅TA(教學助理)都有碩士學位呀,你話我地壓力幾大吖!」唔怪得,教師V一早讀完本科碩士,再讀一個通識碩士,先至可以保到份教職,比佢年輕嘅教師更係讀完一個MA又一個MA,例如一位歷史教師在大學讀歷史,畢業後讀教育文憑,幸獲教職後就讀教育碩士,再讀歷史碩士,依家又讀一個IT與教育碩士,讀完冇人工加噃,只係維持自己嘅「文憑競爭力」嘅啫,讀咁多個學位究竟對佢嘅學生,佢嘅教學績效有甚麼好處,還待專家研究,香港中學教師如果講學位數目之多,相信在全世界排名榜上走唔甩前五名,星期日知道老師V已經開始放清明及復活節假期,對佢講一聲:「你真得閒?」立即俾佢鬧:「你都唔知我有180份卷要改!」唉,即刻唔敢出聲。當佢地得閒去旅遊時,就一定碰上旺季,飛機票酒店房租急升,令老師不知廉價旅遊為何物!
當今社會,樣樣講文憑沙紙,係不停、不斷考試嘅世界,在社會做事,考唔到一張半張文憑,就成為廢人,做唔到水喉匠、電燈技工、地產代理、證券保險、銀行職員,考試之多,前所未見!倒教左丁山懷念四十年前入銀行,行內有十幾位師傅級人馬對銀行內部系統及運作,瞭如指掌,但佢地全無文憑證書,有幾位只係中三程度,由信差做起,但銀行就肯俾機會佢地一路向上爬升,絕無歧視,如果當時有今天之金管局睇實,嗰班師傅級一定係做低級文職,點可以升到做VP!以考試資歷扼殺中學生上升機會,係今日社會怨忿因由之一,導致到年輕人覺得升唔到大學,一世冇出息,於是俾自己太大壓力去考DSE。即使讀完大學,考完一個專業又一個專業試,都考到神經緊張也,何況會碰到荒謬之事?見習生Y聽左丁山講,入銀行之後,專心考銀行學會(HKIB)試,已考到FRM,考IB去到最後階段,只欠一科就大功告成,點知今年銀行學會宣佈呢科冇得考,點解呀,只有一個人報讀,開唔到班喎,冇得讀亦唔准自修報名考試,於是呢科冇得考,換言之,見習生Y白白要等多一年,浪費光陰,明年又唔知有什麼人為阻滯,銀行學會簡直唯利是圖,阻人前進!