財富與健康

　　從台北回來，立即冇得hea，要參加日間論壇講座，晚上應酬飯局，早上工作完畢，中午即刻要寫稿，連刨馬都冇時間，於是連續三次輸到灰頭灰臉，為香港慈善工作盡多一分力。

　　呢日吃完午飯，例牌到處逛，在ifc商場碰到賓架L，私人銀行專家也。賓架L問左丁山到ifc買嘢還是有約會，左丁山話：「午後步行十五分鐘起碼，醫生係咁勸喻我嘅！」賓架L回應：「你都幾聽話，適合做我嘅客仔，不如順便上嚟開個戶口！」嚇死，冇番一兩千萬美金閒錢，點敢搵賓架L開戶口呀，大家講吓笑啫，於是順勢問賓架L呢排時興甚麼投資產品，賓架L話：「唔係講笑，最時興嘅係健康產品，我啲客戶通常有大把錢放在戶口，唔喜歡我啲手下RM硬推銷投資產品，佢地只要有穩陣收息就滿足，反而最着緊如何保健，即養生之道，食療保健，有效嘅有機無農藥健康食品等等，大家都知道，淨係有財富係冇用嘅，一位大富婆長居港安醫院，佢啲有錢朋友去探病之後，就話健康第一，錢已足夠，喜歡我地同佢地研究補身多過投資！」

　　咦，咁搵唔到佣金收入嘅噃，RM點賺到花紅？賓架L嘅答案係：「我地第一要務係keep住班大客，令佢地happy，否則轉移戶口到其他銀行我就難以向總裁交差，我近兩年研讀好多自然療法，健康食品功效，邊度有真正功效嘅氣功師父，以至有料中醫神醫何處尋覓，收埋好多資料㗎！」哎呀，做21世紀賓架真係難，做私人銀行賓架尤其不易，並非考到CFA財富管理牌照咁簡單，總之要識齊好多嘢，做大客戶貼身私人顧問，藝術、紅酒、康健通識瓣瓣齊，但又千祈唔好犯下大錯，一下子介紹錯，「庸醫當神醫」，累親客戶嘅話，會帶嚟好大嘅無形損失。左丁山對賓架L講：「不如介紹客戶去中建大廈，連卡佛大廈或者萬邦行去睇醫生就算啦，駛乜搞咁多嘢。」賓架L大笑：「我地啲客戶識中環名醫多過我，乜科專家都識，駛乜我講，潮流係興清潔乾淨無添加劑無重金屬保健自然食品吖嘛！」唔怪得最近一位朋友與太太團去台北旅行帶番嚟嘅手信，唔係鳳梨酥、太陽餅，而是一級台灣米、有機蔬菜、超級黑芝麻等等。係窮就要搵錢，有錢搵到之後就追求健康第一，愈係有錢，愈想長春不老，賓架L真醒目，與真正有錢大戶講健康管理，少談「財富管理」，生意自然嚟。