主頁 搵樓/成交 放盤 數據公佈 地產新聞 地產博客 置業手冊 背景 / 聲明 / 聯絡我們 繁體簡體English
瀏覽人次 : 24413    回應 : 15
敢說亮話
打風食乜餸
 
湯文亮博士
紀惠集團行政總裁
2016年8月1日

  天文台在十二點前掛3號風球,有不少航班早已取消,無論幾時掛8號風球,明天上午都不用返工,下午亦有八成機會,不少白領都可以有一日有薪假期,但從事娛樂,飲食,醫療等等很多行業仍然要返工,打風更加會造成不便。

  小時候又的確喜歡打風,除了可以有一日假期之外,更加可以食一些罐頭食物,平時是唔可以食,但唔知點解,打風就可以,當中最熱門的是豆豉鯪魚,其次是午餐肉,當時我覺得很奇怪,那些豆豉鯪魚,好似樹皮一樣,不過,工人用嚟炒菜,又幾好食,我相信很多人在國內食過豆豉鯪魚炒A菜,據他們說,因為A菜很削,用來炒豆豉鯪魚就最好,A菜千祈唔好白灼,因為太削,很容易肚痛。

  另外一款是午餐肉,幾十年前,運到港澳的午餐肉比在大陸發售的好得多,工人煎一罐午餐肉,唔知點解,平時我唔食,打風就很想食,或者我知道外面環境惡劣,有午餐肉食都唔錯。

  現在打風已經唔需要食罐頭,街市仍然開檔,就算街市收檔,超級市場有大量新鮮蔬果肉類,又唔會臨時加價,打唔打風都沒有關係,現在打風食乜餸,大多數人都會同平時一樣。

 
我要回應
我的稱呼
回應 / 意見
驗証文字
 
回應 / 留言規則
  1. 禁止撰寫粗言穢語、誹謗、渲染色情暴力或人身攻擊的言論;
  2. 禁止以名稱/暱稱/綽號/同音字等批評或映射任何人士、機構、公司;
  3. 禁止發佈有關招聘、推銷、廣告等內容;
  4. 禁止公開任何個人資料(如電話號碼、電郵地址、即時通訊帳號等)。

敬請留言者自律。本網站保留刪除/堵截任何留言的權利。

1. 舍神 2016-08-01 14:06:05
豆豉鯪魚+午餐肉 的確是另一集體回憶
2. 引刀一快 2016-08-01 16:54:01
A菜以前係綠色食品,因爲冇乜虫咬唔駛打藥,唔知點解近年變成其中一種農藥殘留嚴重嘅蔬菜,依傢大陸流行炒A菜嘅,唔止豆豉鯪魚,仲有罐頭廣東鳳尾魚,肉質略比鯪魚細緻,而且鮮甜D。

講到午餐肉,大陸品牌輸港貨色依然靚過內銷嘅好多,香港超市白豬仔同天壇基本上靚過晒大陸見到嘅,肉質口感差異明顯,所以我都係帶返去食。
3. 2011年開始 2016-08-01 17:01:41
罐頭仲貴過新鮮食物,好耐冇食囉!😆
4. Oscar Lam 2016-08-01 20:09:08
八號風球習慣和家人出去飲茶。街頭、酒樓人不多,另有一番感受。
5. MSK 2016-08-01 20:11:42
孩時白豬仔午餐肉炒蛋及煎厨師腸伴白沙糖,至今難忘。
6. CD ROM 2016-08-01 22:18:32
白豬仔係我至愛,但質地問題炒蛋有d難度,煎塊完整既都唔易。。。

同埋其實真係貴過急凍豬扒ga! 
7. 引刀一快 2016-08-02 10:09:51
CD ROM兄

兩者完全迴異,白豬仔有幾個優點,雪豬排冇嘅。

1,唔使冷藏,保質期兩年三年冇問題,隨開隨有,方便之極。

2,風味獨特,午餐肉係已經烹調好嘅嘢,唔係廚藝好嘅人,煮豬扒未必可以好食過佢。

3,同生豬肉比,佢算係食材亦算成品,煮熟左嘅嘢,成數比雪豬扒高。

4,退一萬步,唔煮,直接放幾片落杯麵淥都得。

5,好奇怪,呢類香口嘢,氹老婆氹細路都好效果。
8. 引刀一快 2016-08-02 10:13:24
To 5樓 MSK兄

你有白豬仔食都幾好架喇,我細個食梅林圓罐架咋。
9. 引刀一快 2016-08-02 10:21:52
CD ROM兄

煎午餐肉冇咩難度,只要你隻鑊唔黐底就得喇,依家我最鐘意用生鐵鑊,唔黐鑊,點用力鏟都唔駛錫住D coating,有鑊氣。
10. 望東樓 2016-08-02 10:37:25
而家係香港要係外面食碗餐肉公仔麵都唔係咁容易。好多求其整塊垃圾級別充滿粉感嘅所謂餐肉你嘆,一係就煎都唔煎吓就咁俾你食。當閣下投訴佢就二話不說換兩塊用祖傳千年油深炸過嘅餐肉俾你。所以可以去嘅地方越嚟越少。
11. 元朗人 2016-08-02 11:13:39
感情上希望梅林午餐肉爭氣D,點解冇進步㗎!

歐洲牌子午餐肉一般較鰔,煎炒後更鰔。

豬仔牌早幾年差了少少,這兩年好似回復水準。觉得比黑毛豬更好吃。哈哈!

12. 引刀一快 2016-08-02 15:02:58
元朗人兄

梅林都有隻火腿豬肉,不過風格偏離咗午餐肉範疇,當火腿食又有點不倫不類。以前個年代感覺好高級名貴,依家就定位尷尬。

梅林依家最失策嘅地方,係將午餐肉加上字母型號標註,本來午餐肉已經係加工嘢,加埋字母就直頭覺得似化工嘢。


13. CD ROM 2016-08-02 18:59:06
一般男人對 《餐。蛋。丁》 呢3樣野有唔同程度既要求同執著, haha~~~
14. 引刀一快 2016-08-02 20:12:09
以前坐船,有餐蛋麵,3蚊,“餐”係圓罐飛薄餐肉,薄而不散,蛋就係煎蛋,麵就係統一福字麵,用滾水一沖。

諗起果時靚仔,3蚊都好赤,坐去大嶼山個幾鐘,睇住人食,自己唔爭氣冇自制力,食!
15. 打工仔 Andy 2016-08-03 00:13:27
以前打風美食, 午餐内, 福字即食面 !