地產博客 > 敢說亮話 返回
瀏覽人次:24135    回應:4
敢說亮話
愈借得多愈安全
 
湯文亮博士
紀惠集團行政總裁
2016年5月16日

  有老友同我講佢個仔準備買樓,不過只得三成首期,佢打算資助一成,問一問我的意見,我話千祈唔好,如果資金如此緊絀,暫時唔好考慮買樓,因為,如果佢個仔失去工作,就立刻沒有能力供樓,就算唔俾銀行收樓,都一定會求助財務公司,最後都是冇咗層樓,如果一定要買樓,就要借到盡,因為愈借得多愈安全,就算老友打算資助,不如留待日後,佢個仔有迫切需要的時候才資助,盡借是為上策。

  老友問如果唔向財務公司借錢,有什麼辦法借得多,我認為最好辦法就是買按揭保險,借盡八成半,還有一成半資金放在身邊,萬一失業,仍然可以繼續供款,起碼可以捱到一段時間,不怕銀行追數。老友認為要多付保險費,甚為不值,其實,現在利息偏低,即使要付保費,亦可以輕鬆負擔,如果為了慳些少保險費而他日被銀行追數甚至層樓被銀行沒收,就更加不值,如果擔心,倒不如唔好買。

  其實,買按揭保險亦不是什麼新穎方法,很多人都會採用,按保老總李令翔話,最近買按保的人比年初多了一倍,平均每日有超過90宗申請,比年初時多了一倍,而且申請人質素甚佳,我估計那些申請人未必全部唔夠錢付首期,買按保只不過是想多一些錢傍身,而且,買了按保,就算樓價下跌,只要保持供款,就唔會被人收左層樓,體驗愈借得多愈安全的精神。