地產博客 > 文亮語 返回
瀏覽人次:26671    回應:5
文亮語
唔夠膽寫叫人唔好買樓文章
 
湯文亮博士
紀惠集團行政總裁
2016年11月4日

  有老友見近日樓市急升,恐怕年青人不顧個人能力以高價上車,叫我寫幾篇文章勸籲他們,現在並非上車好時機,我問老友是否想陷我於不義,去年我鼓起勇氣才夠膽寫「細價樓爆煲論」,已經洩漏天機,所以我早早認輸,希望上天唔好懲罰,否則,毋需要用幾十萬擺認輸宴,而上天亦待我不薄,細價樓的確曾經向下調整20多個%,我亦調整預測,鼓勵打算買樓的人啱價就買,如果唔買,就不能確認因樓價下跌所得到利益,所以,我亦發表過一篇「不賭是贏錢是錯誤的」文章,如果我堅持樓價會繼續下跌,我想我行街的時候一定會被人駡,仲慘過兩位宣誓唔到的議員,今日叫我寫叫人唔好買樓文章,打死我都唔會寫。

  老友又話,既然唔敢寫叫人唔好買樓,不如寫叫人買樓,我話,這些事已經有很多人做了,唔需要我做,而事實上,如果有需要的話,現在買樓亦冇壞,需要當然是指自住,投資並不算是需要,況且,懂得買樓投資的人有自己的一套理論及計算方法,唔需要別人教他們,所以,現在我寫有關地產投資文章,都只會提及未來供應量,利息走勢,政治及經濟環境會不會轉壞,是否買樓賣樓,大家自己做分析及根據各人的需要而定,我唔夠膽講太肯定的說話。

  香港真的是很奇怪,好似樣樣都唔好,連香港大學排名都跌出百位之外,但國內人及資金不斷湧入,想截都截唔到,令到樓價飆升,反觀星架坡,世界指標性排名,起碼有一半排第一,又唔知點解,不但樓價年年下跌,連私人欠債比率已經上升至一個令星政府害怕地步,這點我的確不明白,但我知道,倘若香港政治形勢轉好,樓價的表現又會如何,所以,我的確唔夠膽寫叫人唔好買樓文章。

 
 
我要回應
我的稱呼