地產博客 > 文亮語 返回
瀏覽人次:26889    回應:13
文亮語
幸好供應充足
 
湯文亮博士
紀惠集團行政總裁
2016年9月7日

  近兩日,大多數專欄作家都講選舉,我唔講,因為我預測立法會選舉投票人數,錯到離晒譜,不如講返樓市,現在就算講樓市都唔容易,我相信就算有人預測到樓市在下半年翻身,但點都預測唔到連成交量也急速上升,在立法會選舉的星期日,不少人在投票完畢之後走去買樓,週末新樓盤的成交量有千一宗,這個現象已經有超過三年沒有發生過,各地產商各自盤算,加價的加價,去貨尾的去貨尾,今次,我亦要自認失威,在政府沒有撤招及放寬按揭之下,那些購買力究竟在哪裏走出來,或者是已經積聚已久,趁一個機會爆發岀來,我們沒有察覺而已。

  雖然我在去年非常大膽叫人暫時唔好買樓,但今年初我已有感覺樓市不會大跌,任何人問我是否可以買樓,我的答案都是若果能力許可的話,啱價就可以買樓,尤其是用作自住,據我所知,有不少年輕人都在那段時候買樓,但整體成交量依然慘淡,當時,業界有人要求政府降低供應量,我認為千祈唔好,因為提供足夠供應量是政府責任,如果成交量不足,最好就學國內的去庫存計劃,放寬按揭就可以達到目的,現在回想起來,房屋官員都應該抺一額汗,如果政府真的受壓,公開表示收緊供應量,地產商知道政府心意,開售新樓盤時就不會如此手鬆,一定會善價而沽,樓價必定會急速上升,都唔知道怎樣收科,現在當然唔怕,地產商是會因應時勢去貨,絕對不會有糊唔食。