地產博客 > 文亮語 返回
瀏覽人次:30113    回應:32
文亮語
老友千祈唔好拍檔做生意
 
湯文亮博士
紀惠集團行政總裁
2016年5月14日

  三國演義開始講,話說天下大勢,久分必合,合久必分,很多人認為這是金科玉律,我又唔完全同意,久分必合,是要睇時機,但合久必分則是常有發生,所以,我唔願意同其他人拍檔做生意,親人就例外,不過,我亦試過與人拍檔買樓,但一定要定出一個期限,到期就將買入的物業賣走,否則,沒完沒了,到錯失了賣樓時機,大家又互相埋怨,老友合作做生意,始終都是悲劇收場,就算是親人,更加要均真,老人家話,兄弟相和勤計數,絕對是沒有錯。

  有人問我,如果有人要求同我合作做生意,我點樣推,我記得有個朋友離婚之後,經常在其他朋友面前數他的前妻不是,有一日,我睇唔過眼,叫我朋友做人要有一些風度,既然已經離婚,點解仲要數對方,倒不如對其他朋友講,他的前妻樣樣都好,只是我朋友沒有福份,反而會得到別人同情。如果有人要求同我合作做生意,我會話,我的福份不好,恐怕影響生意,此言一出,來人立刻打退堂股。

  中原老C,老王早已反目成仇,大家早有所聞,不過為了搞上市而走到一起來了,但始終唔成事,最後可能要清盤,同時間,兩人將臭史揚哂出嚟,老實說,我冇咁多時間去了解,只不過覺得兩人年近七十,死就一世,唔死都接近一世,仲有什麼好爭,既然羅貫中話合久必分,兩人都唔合,點解唔分,其實,這亦是很多時合作做生意的夥伴終極結局,最完美的就是歸邊,鍾意做生意的繼續做,唔鍾意做的一方攞錢,幾多錢又是另外一個難題,唔容易解決,唔信,問一問鏞記甘家就知道。