主頁 搵樓/成交 放盤 數據公佈 地產新聞 地產博客 置業手冊 背景 / 聲明 / 聯絡我們 繁體簡體English
瀏覽人次 : 22017    回應 : 14
文亮語
居屋訂價與揀樓時間要接近
 
湯文亮博士
紀惠集團行政總裁
2016年5月13日

  有老友同我講,佢個仔以白表抽居屋,機會率只得1/26,又竟然抽到,究竟要唔要,我唔敢答,如果我話唔要,恐怕又有人搵我傾計,但如果我話要,又過唔到自己的心理關口,於是我學祥益汪敦敬話,要有風險,不要也有風險,老友當然唔收貨,換著是我,一樣唔收貨,至於點解中籤的幸運兒要考慮要唔要,歸根究底都是房委自己做成,點可能在去年九月訂價,今年五月才抽籤,在這8個月,部分細價樓樓價下跌超過兩成,居屋的折讓差不多己被消耗,變成以私人樓樓價買居屋,要唔要的確是見仁見智,今次唔要是正常,要是唔正常。

  房委在樓市最高峰的時候訂價,在生意人眼中,他們的確好功夫,但可惜捉到鹿唔識脫角,九個月之後才抽籤,如果樓價上升,中籤人士一定要,樓價下跌,一定會出現很多人甩底,如果今次居屋滯銷,而政府又唔准減價,都唔知道要等到何年何月,這批居屋才可以全數售罄,我相信房委各位委員現在很頭痕,我無謂落井下石,我只想講,如果房委訂價時注意抽籤日期,就唔會落得如此田地。

  下一次房委會出售居屋時,不如先訂出抽籖日期,在抽籤日兩個星期前才公開居屋售價,當然是以市價七折發售,只得兩個星期時間,就算樓價下跌,都唔會跌得太多,中籤者一定會揀樓,居屋一定可以賣個滿堂紅,唔會好似現在咁頭痕,如此簡單道理,冇理由房委各位委員想唔到,可能他們是對樓市太有信心,認為樓價可以繼續上升,變成中籤者可以低過市價七折買居屋,他們會受到歌頌,可惜事與願違。

 
我要回應
我的稱呼
回應 / 意見
驗証文字
 
回應 / 留言規則
  1. 禁止撰寫粗言穢語、誹謗、渲染色情暴力或人身攻擊的言論;
  2. 禁止以名稱/暱稱/綽號/同音字等批評或映射任何人士、機構、公司;
  3. 禁止發佈有關招聘、推銷、廣告等內容;
  4. 禁止公開任何個人資料(如電話號碼、電郵地址、即時通訊帳號等)。

敬請留言者自律。本網站保留刪除/堵截任何留言的權利。

1. 引刀一快 2016-05-13 09:05:38
非常同意,買嘢當然係應該要貼市價,如果樓價九個月升咗一倍的話,又會有社會輿論話唔公平。
2. Ca1on 2016-05-13 09:10:35
再加埋幾年超長樓花, 橫睇掂睇都係一個局. 一個為咗滿足領導者篤數需要的局. 2019嘅樓, 講句唔好聽, 正常嚟講應該係下一屆政府嘅事.
3. 蕭峰 2016-05-13 09:37:31
好多年前,曾經有個朋友遇到過類似問題,佢都選擇放棄,多年後再後悔。

我估,佢後悔既係未入市,而非未買居屋。如果放棄居屋,買到更高質素的私樓,又係另一樣野。
4. CD ROM 2016-05-13 10:06:51
博士, 我又唔係咁睇, 我反而幾支持唔調整價錢.............

試想想, 假設樓市確認向下, 你呢刻減完價賣, 我買完之後再跌, 我都係鬧鬧鬧, 鬧到博你賠差價比我為止. 何不一開始表明立場, 呢口價鐵價不二, 你唔買就下位.

更何況, 就當只有10%最後會買, 5000個單位有5萬份申請就賣得晒, 應該無太大問題. 就算賣唔晒, 唔想擺咪放埋落居2市場law, 特別係綠表市場, 人地買空又吉返間公屋出來, 1石2鳥.

再講, 如果可以咁樣形式get幾萬市民involve過呢個過程, 何樂而不為? 順便用政策教育下市民, 政底係資助你地價買樓, 唔係包你賺, 只係你層樓既股東, 買居屋都係買樓, 都係有風險. 特別係綠表人, 乜都驚就返去你間公屋過世好了, 唔見到未來有機會真的大打公屋富戶.....
5. 居屋滯銷,政府一樣唔會減價。 2016-05-13 11:02:38
想當年,董事長大量興建居屋,留下幾棟短樁居屋及,部分在入伙後規定期限兩三年內,原價售回房委會的二手蘇州屎,由第二任特首曾稍後時間在較高位售罄,相隔樓宇落成後四五年都冇問題。
6. 居屋滯銷,政府一樣唔會減價。之二 2016-05-13 11:34:48
而且,現任政府可以大條道理,即時停建所有資助房屋,所謂的剛需、市民對住房的強勁需求,在CY的英明領導下,提早勝利完成任務,為香港市民解決了長久以來積存甚久的居住難題,作為連任的首選政績,咁就皆大歡喜啦......!
7. 股票投资人 2016-05-13 11:44:59
CD

博士文章應該係話 定價同檢樓時間不應隔太遠, 這個就好比 你打電話給股票經紀話市場價買匯豐, 他應馬上落盤, 價格應不會變動太大, 但你上午order, 他下午先做, 如果差價太大, 你買貴左, 你一定會嘈, 但如果一早買左無論升定跌就是你自己得事, 同經紀無關了 
8. 新人 2016-05-13 15:09:24
7樓比喻唔係咁啱, 如果用有隻股票要供股, 喺牛市或高位定價, 但供股時係熊市, 或者供股價同市價參唔多, 你會唔會供? 咁會似d
9. SHUN 2016-05-13 18:06:15
經濟增長近零、裁員、減薪又開始………………仲買樓?青山走左病人出街了!
10. 睇唔過眼 2016-05-13 19:12:40
Shun, 你又妖言惑眾,經濟不好不用住嗎?結婚生仔後都要買樓住,難過經濟不好就瞓街?唔買都要租,難到幫人供樓好過自己有個安樂窩?裁員減薪一定係發生在經濟不好時嗎?經濟好時就無裁員?咁即係叫人一世不要買樓!幫人供一世樓!一味在這網站鼓吹樓價下跌係無用!做人積極D,你都會有上車嘅機會!
11. 睇唔過眼 2016-05-13 19:13:20
Shun, 你又妖言惑眾,經濟不好不用住嗎?結婚生仔後都要買樓住,難過經濟不好就瞓街?唔買都要租,難到幫人供樓好過自己有個安樂窩?裁員減薪一定係發生在經濟不好時嗎?經濟好時就無裁員?咁即係叫人一世不要買樓!幫人供一世樓!一味在這網站鼓吹樓價下跌係無用!做人積極D,你都會有上車嘅機會!
12. 睇唔過眼 2016-05-13 19:22:14
Admin, 點解見唔到我的回應?
14. 何時脫角 2016-05-13 23:03:44

現時太多人想脫角,包括大發展商至到小炒家,就是因為現在的經濟狀況及樓市供過於求下,人人都想脫角,無奈政策所限,想買的買不到,想賣的又想賣到好價錢,便形成買賣雙方都不成事。
大小持貨者係早兩三年已經錯失了脫角的機會,或者要等待下次升浪時才捉隻鹿吧。
始終都是首富誠哥才董甚麼時候脫角,但因長和系近年已經很少捉鹿了,而且誠哥年事已高,恐怕未必有機會再次看到了!
15. 引刀一快 2016-05-14 04:33:39
To 4樓 CD ROM兄

我睇睇下,又開始認同你講法,雖然係九個月之前申請,大家當時必然係認同呢個價格先至會申請,如果做決定係因為預期樓市會再繼續升,要怪就怪自己相信樓市只升不跌嘅傳說囉。

住,係剛需

賺錢,係剛需中嘅剛需

唔想蝕錢,就係剛需剛需剛剛需。

喺呢件事件中,充分體現。