地產博客 > 文亮語 返回
瀏覽人次:27618    回應:33
文亮語
貴買平用與平買貴用
 
湯文亮博士
紀惠集團行政總裁
2016年2月1日

  我自小的時候,家母都已經買她能夠負擔的最好物件給我們姐弟,但有一個要求,就是要我們經常使用該物件,因為使用次數愈多,那件物件每次使用率的價值就愈低,家母簡單的叫貴買平用,所以,我們亦養成習慣,毫不吝嗇買一些貴價用品,但同樣物品的數量不會太多,甚至只得一件,因為,如果多買一件相同,使用的次數就會減半,相對來說,那件物件的價值貴了一倍,作為一個用家,貴買平用的確是一種投資心法,但亦要用得其所,否則,就會對那些貴價物件做成不必要損耗。

  不少香港人在國內擁有物業,甚至不止一個,他們對其他人說,那些物業會作為渡假之用,最初兩三個月,的確可以每個星期到那些單位住上一兩天,但兩三年後,一年都不會住上幾日,而且他們發覺,當再到那些單位居住,要做一輪衛生工作,渡假變成工作日,久而久之,差不多會忘記擁有那些單位,但他們又不會將那些單位出租,因為,國內法例是非常保障租客,就算租客唔交租,業主都無能為力,而且,冇租收仲要交稅,那些人在買物業時話所買的物業有幾抵,又有花園,空間又大,如果在香港山頂,一定超過十五億,貴過馬化騰買嗰間屋,我聽到之後會同他們說,幾平都冇用,平買貴用,激死他們,仲叫他們賣咗個物業,用那些錢買藍籌股票,他們當時一定不理會,十幾年之後,有些人將物業賣走,收回樓價竟然不及當年,而在這期間付出了不少稅項及管理費,那時候,他們才領會到什麼是平買貴用。

  買樓要做到貴買平用,一定要肯定會用到那些物業,而非因為地產商所提供的優惠,更非因為恐怕以後買不到而買,以後根本很少用到,如果沒有需要,又唔係用作收租,暫時不要買樓,無謂得物無所用之餘,更因為樓價下跌而遭受損失。

 
 
我要回應
我的稱呼
回應 / 意見
驗証文字
 
回應 / 留言規則
  1. 禁止撰寫粗言穢語、誹謗、渲染色情暴力或人身攻擊的言論;
  2. 禁止以名稱/暱稱/綽號/同音字等批評或映射任何人士、機構、公司;
  3. 禁止發佈有關招聘、推銷、廣告等內容;
  4. 禁止公開任何個人資料(如電話號碼、電郵地址、即時通訊帳號等)。

敬請留言者自律。本網站保留刪除/堵截任何留言的權利。

會員登入
登入ID 或 網名
密碼
1. AH-HO 2016-02-01 09:05:54
沙發.

貴買平用,日常生活我都會用到。。
平買貴用,我都試過。。。貪便宜買返來跟著無咩用過。。。汗顔。。。共戒之。。。
2. 凝風 2016-02-01 11:34:40
精簡一句:"貴精不貴多"

小弟一直都奉行這法則~
也是長輩教的智慧~深深體會過"常用&實用"的道理
3. Ca1on 2016-02-01 12:25:54
買一件好嘢用五年、十年, 好過買 cheap 嘢用幾個月就爛.
4. 引刀一快 2016-02-01 12:42:23
香港人買大陸物業,最重要兩點,首先係交通,然後係管理、環境。

大陸物業幷不單單純爲渡假而買,其意義應該係香港生活嘅一個中程延伸,最明顯作用就在于面積,就算喺香港住劏房嘅,都可以喺大陸買得起過千呎屋,除咗好多雜物有地方放之外,寬敞嘅環境大大彌補香港居住環境嘅局促。

會出現平買貴用情况,最大原因係買家不但唔瞭解大陸物業,更加唔瞭解自己。

一個大前提,到底自己對大陸生活環境,係熟悉、親切還是陌生、抗拒?回到大陸物業嘅時候,感覺是回家、還是去投盞?買大陸物業之前,有冇經常喺大陸活動?

用作放租的話,最好買商用物業,住宅回報率相當低,但係鮮有租霸,業主遇得最多係俾人偷搬傢俬走,因爲大陸業主可以開鎖、換鎖、停水、停電,租霸唔交租都頂唔到幾耐。不過唔會有咩執達吏幫手做嘢係真。而商用物業欠租,工商所會即日瞭解、查封。

大陸生活同香港生活係有質嘅差異,但係亦日漸趨同,而且大陸亦有不少香港享受唔到嘅嘢,人地話食在香港,而香港食唔到嘅嘢真係唔少,禾蟲都要整熟先至俾賣。

大陸物業對于富人嘅意義,當然係遠不及對小康之家意義大。


5. 無奈 2016-02-01 12:53:42
刀兄,你篇嘢足可以另行文發表了。謝謝。
6. 無奈 2016-02-01 12:59:47
收到樓算相當好啦,好容易有爛尾樓,拎唔到契。
7. 望東樓 2016-02-01 13:14:19
吓『禾蟲都要整熟先至俾賣』唔通係禾蟲Sashimi !!OMG。
8. 引刀一快 2016-02-01 13:25:40
無奈兄

依傢大陸一綫好少爛尾樓架,因爲要封頂先發預售證,而且,我覺得香港人番大陸買二手都唔錯,因爲可以清楚小區人口來源結構,即係話更清楚居住同管理情况。
9. 引刀一快 2016-02-01 13:38:43
東樓兄

我意思係,香港街市唔俾賣生禾蟲,街市賣都係整熟嘅,唔正斗!

不過,高州依傢真係有餐館賣禾蟲SASHIMI,有乜奇怪喞?十幾年前我自己好奇試過,不

過好似冇乜味道,唔知係咪因爲冇配魚生豉油呢?

沙蠶科動物淡水海水都有,唔止中國人食,我記得好多年前睇過一集BBC嘅紀錄片,講述 

地球上最美味食物,居然就係沙蠶!有個太平洋小島嘅人會睇月色,去海邊用小網收集由

珊瑚礁游出嚟嘅沙蠶,條條好生猛游水,好似話係一年一次集體出洞交配,冇禾蟲咁肥短

,D土著燒嚟食。
10. 新抱仔 2016-02-01 13:39:44
貴買平用及貴精不貴多也是我們家的法則。無論樓及物件,我們也會這樣選擇,生活質素高之餘,也不會造成浪費。
11. 引刀一快 2016-02-01 13:51:15
To 10樓 新抱仔

前提係妳家買得起。因爲買得起貴嘅,所以有資格貴買平用。

問題在于,現今香港好多人,就係根本買唔起,其實只要做足功課同思想準備,買大陸屋係平買平用。
12. Oscar Lam 2016-02-01 13:53:04
引刀兄,

請問大陆租客不交租,業主是否可以要求城管帮手做嘢?嘻嘻!
13. 西門吹雪 2016-02-01 13:57:09
博士講既例子,我立刻想到一屋名牌手袋同名貴高跟鞋既女仕們。哈
14. 向飯民說不 2016-02-01 13:57:52
樓上,可以要求停水,停電,可以叫管理處幫手,聽講還可以將物品仍出馬路。韓劇好像也有這樣的情景。
15. 引刀一快 2016-02-01 14:08:54
Oscar Lam兄

呢樣嘢,居委干預權力應該大于城管,僭建、非法劏房就一定係城管理。商用物業主要搵工商所。好多時係各處鄉村各處例。

不過,你知道城管係“強力部門”喇,適當“認識”“使用”,冇蝕底。

爲咗正解,晏D我搵朋友核實下再俾更可靠答案你。


16. 引刀一快 2016-02-01 14:15:11
向飯

停水、停電,係攞房産證去供水、供電部門申請。

管理處幚唔幫手就不一定,但係護送你收樓一般都肯嘅。

扔人D嘢出街,係反面先做,一定要帶埋鎖匠。
17. Tony lam 2016-02-01 14:50:52
大陸樓買嚟等香港撈唔掂、先自己着草用、平買平用咁嚟咒自己?
18. 引刀一快 2016-02-01 16:01:31
Tony Lam兄

香港撈唔撈得掂,同買大陸屋冇必然關係,平買平用係實事求是嘅態度,好過依傢攞兩老積蓄去幫人接火棒丫。
19. Tony lam 2016-02-01 16:22:52
大陸平得嘅都係山卡啦,D火棒邊個叫你多手啫!本小点解仲走去D山宄揾着數、收租吹盡得果三幾千、有囉唆時單拖上去係心震、唔係去深圳、唔計人工都計吓車費啦!
20. CD ROM 2016-02-01 17:04:22
貴買平用最適合用係消費品, 特別係有一定保值能力的, 如手錶或珠寶, 日日用佢10年8年, 之後睇返件野現值幾錢才去除番開平均每日用左幾多錢, 你就知乜野叫做抵用~~~

不過要打破 "唔捨得用" 呢個心魔......
21. 引刀一快 2016-02-01 17:27:28
Tony Lam兄

我幾時講過返大陸買屋收租?買大陸屋係用嚟補港樓不足,呢D嘢唔啱大孖莎聼嘅,大家自己對號入座喇。
22. 引刀一快 2016-02-01 17:38:26
Tony Lam兄

大陸平貨不一定山旮旯,廣州市區都有筍貨。就睇你熟唔熟區份,有冇落心機搵。
23. 二少 2016-02-01 18:11:10
舊年深圳層樓升咗4成,好彩無聽人老點…
24. Tony lam 2016-02-01 18:26:53
掂嘅冇理由番去住、唔係買嚟收租、即係錢多得滞、型D就叫分散投資啦。
山長水遠行番廣州、重要勤力去揾、咁勤力照計香港實揾到食、使乜行咁遠呢、重要嘅係而家先行路上廣州、遲咗哪!廣州老表嘅衫尾都掹唔倒嘞!
未夠本咪勤力D使少D、夠本先落場、唔好周身瘾、雞仔注通常會墊底、賭唔係必要嘅!
25. 香港土著 2016-02-01 18:33:04
博士貴買平用理論,去到買樓實戰時,其實同香港買樓三大原則差唔多… 地點、地點、地點。
26. Tony lam 2016-02-01 18:55:35
大家講房屋已經走火入魔、好似冇自己樓就係政府責任、我地要扮嘢做國際城市、樓点可能平、香港有條件財力建足夠嘅公屋、老友話計租複雜要好多人手、我簡單咁講根據入息百分幾嚟計租、越高入息、佔入息越高、比喻入息8千比10%、入息4萬比30%夠你租私樓或供樓、頂槓去到6萬比40%、而家科技㩒制就小數位都即時計埋、攪乜Q居屋一鑊泡吖!
私人市場就又佢越滚越過瘾、香港事實好似麻雀館、打得越大抽水先溶嘛!政府抽水甘、咪我地福利多囉、分分鐘年年有錢派、香港人仲使乜做。
27. 引刀一快 2016-02-01 19:15:06
有錢就地點,冇銭就拆件!

買一件平嘅喺大陸,頂頂先係好有性價比做法。
28. Jackynnnnnnnnn 2016-02-01 20:59:25
睇黎香港人對大陸咩野都有偏見,我朋友依幾年炒深圳樓,發ed
29. Jackynnnnnnnnn 2016-02-01 20:59:37
睇黎香港人對大陸咩野都有偏見,我朋友依幾年炒深圳樓,發ed
31. 麗娜 2016-02-01 21:40:50
關於消費品,我喜歡平買平用;但是,如果是投資的話,那是兩回事。
那內地的樓宇是否一定是消費品?不一定。只不過,現在時機已經不對了。
那些在十幾年前買了一線城市房的人,絕對不介意平買貴用。

刀兄確實是內地通。
32. Tony lam 2016-02-01 22:27:50
大陸而家買唔買到平平地呢?老表今時唔同往日嘞,頂瘾因住變頂氣、死頂就更無謂!
得咗果D老友係講緊早幾年落搭深圳樓嘛,早幾年揸香港樓而家咪仲甘、冇意冒犯、不過而家樣樣貴口、無謂過度樂觀、D牛奶B以前冇羸過錢、一出閘即爬低、好惨㗎!
33. 引刀一快 2016-02-04 03:15:12
To 31樓  麗娜小姐

睇嚟妳對大陸樓都好有體會喎,依傢得閑過嚟睇盤兼消閑,遲一排就會有好多靚嘢揀。

香港同大陸嘅交通同交集都會越來越多,未來會實現進一步嘅“平用”,至于是否還有“平買”嘅機會,我好相信一綫會冧,反正先多睇,一定會有好嘢等妳。
34. 引刀一快 2016-02-04 03:26:16
To 32樓 Tony Lam兄

大陸依傢有冇平平地?有!睇你有冇花時間心機搵。早幾年大陸樓到今日升幅,完勝港樓,我09年執嘅到最高點都係兩倍幾到三倍幾,最平同最靚嘅貨升幅最大。