地產博客 > 文亮語 返回
瀏覽人次:29924    回應:18
文亮語
人有悲歡離合 月有陰晴圓缺
 
湯文亮博士
紀惠集團行政總裁
2015年10月15日

  星期一,明報大篇幅報導施永青與我在明報湯文亮會客室唇槍舌劍講樓市,老實說,我講樓市一定唔夠老施講,老施手下猛將如雲,求其搵一個都可以將我擊潰,何況,老施有昇哥的精密數據分析,想輸都難,不過,我只睇形勢,數據只用作參考,最大原因是我沒有壓力,唔似得老施有幾千夥計要兼顧,講嘢都有多少避忌,唔夠膽實牙實齒,唔好以為我同老施一定會拗到面紅耳熱,不歡而散,其實,本來我們在訪問之後一起午飯,可惜我約了銀行家,已經約好了下一次聚會日期,我做東。

  當日,施永青到我在明報的會客室,我先禮後兵,除了準備靚酒外,更加預祝中原成功上市,集資超過百億,因為在接著訪問,我一定問老施中原指數有沒有受特殊成交價影響,誰不知老施心情甚靚,除有問必答外,更加表明中原指數會斬頭切尾,對於創新高成交,一定要等到簽妥正式合約後才入數,咁樣,我仲懷疑什麼,所以,我估計,中原指數在未來一段時間會平穩發展,現在成交量已經不多,再斬頭切尾,樓價指數唯有在窄幅上落,當時我好奇怪,點解老施咁順攤,以佢的性格,一定死撐到底,我心想,唔通佢同王文彥講掂數,老王同意中原上市。

  我趁中段休息時,問一問我在中原探子,嘩,原來王文彥回中原上班,令到老施及中原領導層非常雀躍,認為有機會上市。其實,唔好講天下大勢,就算是人與人之間交往,都會是分久必合,合久必分,老施同王文彥不咬弦,全行人都知道,不過,但沒有人猜測到他們可以再次合作,即使有合久必分,分久必合這條大道理,於是我問老施,點解王文彥會摒棄前嫌,再次回中原上班,老施話,無他嘅,現在除了是物業代理的冰河時期外,大家還要應付外來的物業代理,除Q房網外,還有鏈家等,如果唔上市,泵錢都泵都心慌,做生意,做拍擋都是一樣,人有悲歡離合,月有陰晴圓缺,面對困境,一定要作出讓步,兩個人再次走到一起來了,又有什麼稀奇。

 
 
我要回應
我的稱呼
回應 / 意見
驗証文字
 
回應 / 留言規則
  1. 禁止撰寫粗言穢語、誹謗、渲染色情暴力或人身攻擊的言論;
  2. 禁止以名稱/暱稱/綽號/同音字等批評或映射任何人士、機構、公司;
  3. 禁止發佈有關招聘、推銷、廣告等內容;
  4. 禁止公開任何個人資料(如電話號碼、電郵地址、即時通訊帳號等)。

敬請留言者自律。本網站保留刪除/堵截任何留言的權利。

會員登入
登入ID 或 網名
密碼
1. 歷史長河 2015-10-15 08:48:33
老師真是一個既精明,情商又高的商人!
2. David 2015-10-15 08:55:58
湯博士, 你總是太謙虛了, 老施D剛性需求, 都唔夠你D龔應量小怪打,老施手下D剛需, 唔提也罷, 下次係明報會客室, 除了靚酒外,亦可請老施食吉列豬扒 :)
3. 望東樓 2015-10-15 09:37:34
好奇怪點解佢地而家先去搞IPO,個樓市成交幾好大家眼見。每星期各大屋苑成交中原都好似名列榜尾,有時仲抬蛋。最可能係眾小股東求去。
4. 真真薯片 2015-10-15 09:54:33
如果中原真係搞上市, 就真係樓市既壞消息
5. Kitty Ng 2015-10-15 10:35:17
樓市好時呃佣呃到盡,樓市衰時靠上市cap埋最後一啖水,老C真係算到盡,盡到連渣都冇得剩!
6. 引刀一快 2015-10-15 11:12:28
早少少出壞消息,好過突然一炮出一堆,都唔知依家阿爺想點。
7. 回3樓 2015-10-15 12:49:06
有錢賺,他是不會上市的。就是因為沒錢賺,情況惡劣。才上市,並不是因為多了競爭對手啦。。
8. 蕭峰 2015-10-15 13:17:50
上市可以集一筆錢,為未來的寒冬做準備,同埋,未來籌錢更容易(配售)。
9. 打工仔 Andy 2015-10-15 13:22:37
博士與老師的對答十分精彩!
10. 大家放心 2015-10-15 13:47:00
中原地產現在攪才上市,簡直是自討沒趣,當D股民儍嘅⋯⋯
11. 西門吹雪 2015-10-15 15:59:44

股民可以拾平貨~等佢IPO完再插多幾插拾平貨~

香港地地代生意邊有拾粒,過幾年咪又抄過~係IPO入貨個D人就慘D LAW


12. IPO 2015-10-15 16:29:39
大陸對手黎搶生意,對手多左,餅得咁大

呢幾年有稅鎖住 地產難做,講到用大陸估值中原有600億市值,而係香港上市既美聯得23億市值. 爭25倍, 1間中原=25間美聯

IPO 目的係集資,股東目的一係集資同人打,一係想走佬。
13. Freda 2015-10-15 17:57:23

沒有壓力是假的... 担心指數會再向上.

沒有臉子了.

14. 鄧學士 2015-10-15 18:32:35
咁千奇唔好抽佢既IPO,怕佢係第二個嘉能可。
15. 上市集資活動 2015-10-15 20:09:38
指,富瑞蔣永寗:料爆裁員潮,樓價跌逾三成。美資投行富瑞(Jefferies)香港中國房地產研究部主管蔣永寗表示,內地經濟增長放緩為本港各行各業帶來負面影響,除零售旅遊業首當其衝外,金融業亦難獨善其身,預料本港減薪裁員個案將增加。
16. 中產求生隊長 2015-10-15 23:48:43
最近放租盤比中記,代理根本無心工作,只是用上涼簿的説話想業主平賣單位。

博士不要客氣地只係讚中原,博士如果是真的敢言無顧慮及為小市民/股民着想,應該大膽寫番翻篇地產代理行爆煲論。
老實說,當行業走下波又風險大增時,老闆用埋最後一招⋯⋯上市圈走小股民的錢。
17. 向饭民说不 2015-10-16 00:16:11

中原上市,不就等于益了隔离台个王生,还有随时控股权会落入他手。

18. Desmond 2015-10-16 06:32:43
聽說近月中原在虧錢,要主板上市會不會有困難呢?