包租，其實是替別人養仔

　　曾經有人問我教仔女方法，我老實說，我唔識，就算我一對仔女在別人眼中是唔錯，但我仍然沒有資格或者能力教人怎樣教仔女，教仔女其實是吃力不討好，若果自己教唔掂，就千祈唔好認為其他人可以將自己仔女教得好，雖然古人話易子而教，其實是錯的，大飢荒時雙方易子而食就會出現，易子而教究竟出自那一個典故，我又不得而之。

　　不過，替人教仔就不可以，替人養仔就時有發生，如果跟一個物業投資者去巡舖，他會話那些舖位租客是替他養仔，十多二十年後，當這個仔長大，就身價不菲，有人就會懷疑，那些租客豈不是很蠢，絕對不是，那些租客利用舖位做生意搵錢，與業主各取所需，雙方都不能夠講蝕底著數，但如果該物業在業主與租客之間，多了一個包租的人，除非他有豐厚的利潤，否則，他就是最蝕底的人，因為他其實是替業主養仔，或者會有人不明白，做包租等如做無本生意，怎會蝕底，應該是大有作為，我只能夠說，如果大有作為，包租行業就應該非常蓬勃，唔似得好似今日咁式微，結果就是答案。

　　做業主其實是唔喜歡租客將他的物業分租，因為租客不能保證三房客的質素，而且，一個單位本來是一家四口之用，分租下變成有十多人使用該單位，想唔快殘都唔得，如果業主肯接受分租，只有一個理由，就是他的物業長期空置，不得不向現實低頭，所以，一般租約早已講明，租客是不可以分租。至於三房客，他們亦知道該單位的市值，相比之下，就會認為所付租金超貴，而且，三房客既然住同一單位，就有可能聯合起來向二房東壓價，否則，就會集體搬離。就算上述的是我過份憂慮，二房東所賺的始終是蠅頭小利，而過了一段時間，物業始終會升值，他們只不過替業主養仔。