地產博客 > 文亮語 返回
瀏覽人次:47347    回應:28
文亮語

光明磊落是否不適用於網絡世界

 

湯文亮博士

紀惠集團行政總裁
2015年6月16日

  一大清早,有做律師老友來電,問我可不可以一起去食早餐,佢已經在在樓下,唔可以都唔得,在食早餐時,老友問我想唔想打官司,我想都不用想就話唔想,我三十多年都未打過官司,唯一一次同澳洲佬 Alan Bond 打,打打吓佢都走咗去,官司還未完結,現在佢人都走埋,根本沒有官司好打。我想咁樣說應該可以推咗佢,點知我老友死纏爛打,佢話今次一定贏梗,咁奇怪,我又聽吓。

  佢話有一個網站,出了很多誹謗我的文章,我可以告這個網站及那些專欄作者,我說早已知道,因為那個網站的負責人較早前放了一條 link 在我的回應箱內,叫我的網友去睇那個網站,我覺得無傷大雅,但我發覺,那個網站的文章很多都是影射,甚至誹謗我,我唔想講內容,但我發了一個訊息過去,內容很簡單,只有“是的”兩個字,對方一定明白,我對律師老友說,對方唔明白我再麻煩佢,大家繼續食早餐,談天說地。

  有人曾經問我,怎樣去演繹光明磊落,我說,光明磊落是一種行為,是令人感覺到的行為,不過,在現今世界,有很多人在其他人面前就表現得光明磊落,但躲在網絡世界裡就變成另外一個人,用唔同筆名,捏造事實,任意向其他人任意攻擊,認為是沒有人知道他們的所作所為,但網絡世界,如夢幻化,亦假亦是真,我那位做律師老友精通網絡世界,亦知道怎樣打網絡世界官司,如果唔收斂,小李飛刀都冇情講,我不多言,一定會有人收到這個訊息,或者,他們認為我只不過是危言聳聽,反而變本加厲,我亦希望如此,我這位律師老友平時就牙擦擦,我都想試下他的功力。

 
 
我要回應
我的稱呼
回應 / 意見
驗証文字
 
回應 / 留言規則
  1. 禁止撰寫粗言穢語、誹謗、渲染色情暴力或人身攻擊的言論;
  2. 禁止以名稱/暱稱/綽號/同音字等批評或映射任何人士、機構、公司;
  3. 禁止發佈有關招聘、推銷、廣告等內容;
  4. 禁止公開任何個人資料(如電話號碼、電郵地址、即時通訊帳號等)。

敬請留言者自律。本網站保留刪除/堵截任何留言的權利。

會員登入
登入ID 或 網名
密碼
1. chinamanfung 2015-06-16 09:33:58
我認為作為一個知名人仕長期在網上發表文章是必須有心理準備受到批判,所以他們的文章大部分寫的一般很客觀沒自己立場,但這樣的做法一定沒有知心及忠心的讀者。看了幾年博士的文章,感覺上在細樓論後有部份言論,特別在回應上亦過了火,其實經過整頓後這裏已大不如前、很可惜!
2. Carson 2015-06-16 09:42:26
真金不怕洪爐火, 得罪地產商及地產代理的後果可大可小, 君不見以樓市為重中之重的梁特首如今插到滿身箭, 雖然打不死但都舉步維艱. 大炒家、大戶一般睇到的資訊比較散戶為多, 但正因如此, 往往比市場快一步, 甚至很多步去發現危機. 巴菲特當年沽中石油, 沽完差石多升了一倍才見頂, 市場亦有意見認為佢燈咗, 往後發生什麼事大家很清楚。最後, 今天中石油的股價仍比當天低出很多, 更不用說A 股了。
3. 流浪漢 2015-06-16 10:11:39
丁蟹再世
4. chinamanfung 2015-06-16 10:26:37
當一個專欄越來越少人看,越來越少人回應,寫與不寫已沒大分別!
6. chinamanfung 2015-06-16 10:38:44
不知道3樓寫了甚麼被刪除,香港是法治地方,不知Admin 用什麼準則去刪除別人發表的意見,若做得不好就會傷害專欄本身,要做到光明磊落亦需要胸襟廣闊,不知Admin有沒有和博士溝通過你採用的尺度呢?
7. 引頸一切 2015-06-16 10:44:08
ADMIN同方丈一樣都係咁X氣, 唔知現實中光唔光明磊落呢(笑
8. chinamanfung 2015-06-16 11:21:50
看了這篇文章我恐怕會附上文事責任,冇錢賠會破產,決定不再發表意見,拜拜。
10. 地產版ATV化 2015-06-16 12:48:47
新post就好似把酒當歌咁既水平。
可以每日返出博士以前既post重會多D人留言。
12. 磊落志 2015-06-16 12:59:10
律師朋友說, 誹謗官司從來都是燒銀紙, 屬有錢佬遊戲, 或有錢人以大欺小遊戲, 以大欺小還算英雄? 還算光明磊落?
13. 占士 2015-06-16 14:07:28

Chinamanfung兄,一路好走,請不要回頭了!

14. 亮劍 2015-06-16 14:27:29
我做人的宗旨,係有嗰句、講嗰句!
若果我不同意你的見解及分析,如果係:
引為知己者……例如法子、PP,小弟會據理力爭!
我尊敬的人……例如湯博士及蔡老闆,就選擇不作回應!
其他朋友……盡量唔討論敏感話題。
其他人……唔好畀位我入,一定狂数,唔會同你客氣講廢話!

我由20多年前開始,都是堅持寫「真」話,而我亦深信,呢個世界真的假不了。
講到尾網主你請放心,第二個我唔知,但我绝對不會寫文章寸湯博士的,全因我係一個念舊之人。
15. 流浪漢 2015-06-16 14:49:58
Admin係唔會容許人地話佢唔比百姓點燈

坐等Delete
17. CD ROM 2015-06-16 15:27:53
亮劍兄, 相信唔係講緊你寫既野, 係其他有心人寫既野jel............
18. 打工仔 Andy 2015-06-16 15:32:03
亮劍兄, 我相信你 !
19. Delete me 2015-06-16 15:50:40

Sad to see the decline of this forum but I guess it deserved it ..........

20. CD-COM 2015-06-16 15:58:42
我都有過隔離見文章,  亮劍兄、法子、PP繼續真心 share 我都會支持, 但我覺得個邊有壞人幾廿歲仲日日起自己個竇出 post 抽人水實在有 d 那個...
21. 知足 2015-06-16 16:25:26
呢句已經夠串

但我绝對不會寫文章寸湯博士的,全因我係一個念舊之人。
23. 引刀一快 2015-06-16 17:09:04
To 7樓

你大佬就係我見過最“光明磊落”地去做陰濕嘢嘅人,水上爬龍船,路上有人見,你以爲自己聰明,其實好肉酸。
24. 引刀一快 2015-06-16 17:11:14
To 14樓 亮劍兄

你的確唔係陰濕人,就算係你對手都會尊重你。
25. 引刀一快 2015-06-16 17:16:30
To 12樓

一班玩忍術幾十個假名、假身份嘅人,同一公開身份、姓名嘅人比光明磊落,你係咪想笑死人?
26. 引頸一切 2015-06-16 22:12:40
To 23
總好過陰濕濕地做陰濕野, 留名待刪^^
27. 引刀一快 2015-06-16 23:16:42
To 26樓

點講都係你大佬陰濕,人家打開門做生意,光明正大開自己名出文章。

你改埋晒D咁嘅名,為咩喞?咪又係用嚟影射人,好幼稚。




28. 按居 2015-06-17 00:19:54
自從上次有人send咗條link過嚟之後我間唔中都有去睇。主要是睇法子兄與PP兄的文章。一如既往,只講facts, 加埋 substantiated opinion. 我亦知其他作者文章可能較激。

博士你光明磊落,但時代唔同了,以前有顛佬當街話你係「肥仔、四眼仔」,聲音兩秒後煙消雲散,可以華麗轉身;但現在網絡可以把那些留言流傳萬世,得閒可以打「湯文亮」找找有冇人十年前唱衰過你。現在的處理手法應不同:

1)
當初睇法輪功覺得好驚;之後覺得煩;再而唔想佢地阻街。

2)
新屋想裝修,覺得上網查黑店很方便,但最後發現所有舖頭都是黑店,結果都要靠自己去傾,探對方虛實,或找朋友介紹。

3)
病人現在上網可查資料,以為自己攪得掂,但最後資訊太多,唔知真偽,最後都要問醫生。

要經歷這個過程並不容易, 但是過了便是睛天。中途自亂陣腳可能就輸了。

梁特首話要告練乙錚... 可能佢想連唔睇社評嘅人都吸引去睇....

博士請不要氣餒。如果孔子出生於現在,我估佢都要「九十才耳順」。

博士食鹽多過我食米,理應我毫無資格去説三道四。

愛惜你的讀者上


29. 笑三笑 2015-06-17 00:30:20
笑而不語。
真的假不了
30. 引刀一快 2015-06-17 01:05:04
睇埋落去喇。
31. 看不過眼 2015-06-17 02:49:18
我見香討地產版早排有些攻擊帖文,博士應是指那些吧!
32. 引刀一快 2015-06-18 02:34:36
看不過眼女士

湯生可能係講緊“投資粉絲”.com
33. LaLa 2015-06-18 16:54:10
也是這句吧,愛看看,不愛看就不看,拜讀別人文章每人睇法不同是正常的,不可出言攻擊。