地產博客 > 文亮言 返回
瀏覽人次:25899    回應:13
文亮言
買車位不如買港交所
 
湯文亮博士
紀惠集團行政總裁
2016年11月29日

  有年輕朋友打算買兩三個車位投資,問我有何意見,我話自用就沒有所謂,收租或者要向銀行借錢就唔好,自用即是自己係租客,唔買都要租,但買車位收租是很麻煩,冇物業代理願意做,每一件事都要親力親為,很困身,為了每個月收三幾千元租金,似乎不值,而且,租客的質素很參差,現在經濟環境尚好,租客交租還可以,我講可以,因為有少部分租客有錢都唔肯交租,如果經濟環境轉壞,欠租就會增加,或者,有部份車主索性賣走部車,因為養一部車的費用都唔少,到時候,車位租金就會大幅降價,直接令到車位價值降低,所以,買車位收租,如果唔怕麻煩,都可以考慮,不過,都唔係現在買,如果有多餘錢,而又身痕的話,不如買股票,深港通通車在即,買港交所都唔錯,回報好過車位,收息用嚟交租車位費仲有化算,點解要買車位,而且,當一個停車場拆售之後,各位業主一定各出奇謀爭取租客,減價就在所難免,租客可能是受惠者。

  年輕朋友話我同李小加賣廣告,問港交所有什麼好,我話乜都唔好,成隻大笨象,升又升得慢,不過,港交所就好似一個舖位,可以利用不同渠道增加生意,除滬港通之外,又深港通,他日唔知會唔會倫港通,紐港通,除此之外,又做埋啤機生意,不斷啤殻出來,大家都以為那些殼公司是最大受益者,當然唔係,而是那些幫人啤殼的顧問公司與港交所才是最大受惠者,有咁多人幫你搵錢,唔需要自己做到身水身汗,每月收雞碎咁多租金,如果等錢用,又可以即時賣走,何樂而不為。