地產博客 > 文亮言 返回
瀏覽人次:28247    回應:11
文亮言
美國人唔想做美國人
 
湯文亮博士
紀惠集團行政總裁
2016年10月1日

  美國人唔想做美國人   我有一個老友投資有道,坐擁巨額家產,而且早已入了美國籍,可以稱得上人上人,誰不知這個人上人竟然想放棄美國籍,不過,他只能夠想一下,現實是沒有可能,除非他願意付巨額稅金作為分手費,即使他願意,仍然要被美國政府折磨幾年,現在他回想過去,當美國發給他綠咭時,好似執到金咁開心,老友問我有冇計,我老實回答話冇計,總之,他成副身家一定會被美國政府閹掉,既然如此,不如多做善事,或者可以學蓋茨,成立一個基金,將成副身家捐哂俾基金做善事,唔好益美國政府,而且還可以得到其他人尊重。

  我老友一世英名,可惜就棋差一著,無端端點解要攞綠咭,佢又唔係反政府政治人物,攞綠咭即是送羊入虎口,任人宰割,其實,現在的美國人都唔想做美國人,尤其是那些年輕大學生,當他們大學畢業,仍然是窮光蛋一名的時候,便申請放棄美國籍,走去做英國人,加拿大人,澳洲人,因為,當他們他日發達,就毋需繳納重稅,當美國大學生有如此進化行為時,香港大學生正忙於填寫公屋申請表,真是欲哭無淚。

  現在做美國人真的是寸步難行,唔好好似特朗普講到咁複雜,在香港,只要閣下是美國人,去銀行開戶口必定受到岐視,不少銀行根本唔會替美國人開戶口,無謂無端端惹禍上身,被美國政府指責犯左唔知邊條戒律,罰款罰到驚,所以,千祈唔好以為美國政府肯俾綠咭,就可以在香港做反對派,遲下他們就知道,一入候門深似海。