向巴斯挑戰，輸了亦無話可說

　　有老友問我點解咁夠膽挑戰巴斯，話香港樓市一定唔會衰過97，我話我沒有挑戰巴斯，不過，要我挑戰亦冇所謂，我生於斯，長於斯，在地產市場搵食，連樓市會衰過97都睇唔到，要由一個外國基金經理提點，我輸了亦無話可說。

　　我雖然在去年話細價樓會爆煲，但並未睇淡樓市，不過，當時樓價的確偏高，可以的話，最好忍下手，尤其是細價樓買家，毋需急在一時，等樓價回調兩成以上才考慮，而爆煲理由是當時有不少打算上車的細價樓買家在未能支付首期下向財務公司借錢上車，這是一個非常危險動作，當樓價從高位下跌，財務公司便會向那些上車買家追數，有機會出現爆煲，即使我有理由，而現在又被證實我所言非虛，但當時仍然被人質疑，今次，巴斯高調發表香港樓市衰過97的言論，但又唔見佢同時發表有關理由，叫人信服也難，所以，我並不怕與他輸賭。

　　其實，巴斯亦有他的觀點與角度，試問一個外國基金經理又怎會可能了解香港樓市，他必定參考本地人的言論，再作出一些折讓，例如本地評論員話升兩成就當平手，話樓市沒有升跌即是有機會跌兩成，在今年以來，不少本港有份量業界人士都表示樓市會下跌三成以上，既然香港人都咁樣講，巴斯話香港樓市衰過97又可以理解，但巴斯有一點不明白，那些話香港樓市下跌三成以上的業界人士，他們是想講俾政府官員聽，希望政府可以及時撤辣，並不是樓價真的會下跌三成，所以我話，外國評論員在未了解情況下昂昂然發表樓市衰過97評論，很容易被人質疑，或者，巴斯認為有咁多人談論他的預測，其實已經達到目的。