地產博客 > 文亮言 返回
瀏覽人次:34141    回應:65
文亮言
啱價是因人而異
 
湯文亮博士
紀惠集團行政總裁
2016年4月14日

  近日我講啱價就可以買樓,甚至現在都可以買,雖然未至於被人轟,但很多人都會認為我講左等於冇講,因為啱價並不是一個數字,其實,啱價是因人而異,有許多在去年高峰時有需要而又打算買樓的人,現在見到當日啱心水的單位,樓價比去年下跌超過兩成,如果鋤下價,分分鐘有意外收穫,所以,他們亦不妨大膽還價,如果認為可以負擔得起,現在買樓又未嘗不可。

  如果買樓收租,現在的確未係時候,因為租金正在下跌,幅度比樓價還要大,而且空置率在經濟環境轉壞之下上升,買樓收租的人一定會考慮到這個因素,他們要求更大折讓,所以,對於他們來說,現在的樓價未必啱他們心水。

  對於資深物業投資者而言,啱價並不是指整體物業,而是他們有興趣的物業,例如相連單位,隔離鋪位等,價錢只不過是其中因素之一,如果唔啱用,沒有協同效應,就算價低都不是啱價。

  最後有一種人,追價買樓就夠膽,樓價跌就唔夠膽,在他們而言,樓價在屢創新高時反而會是啱價,樓價下跌,即使他們可以輕鬆負擔,都不是啱價,這種人賭錢就會贏左縮,輸左谷,是必輸的人物之一,總之,啱價這個名詞是非常抽象,不但因人而異,而且亦會因應時勢而有所改變。

 
 
我要回應
我的稱呼
回應 / 意見
驗証文字
 
回應 / 留言規則
  1. 禁止撰寫粗言穢語、誹謗、渲染色情暴力或人身攻擊的言論;
  2. 禁止以名稱/暱稱/綽號/同音字等批評或映射任何人士、機構、公司;
  3. 禁止發佈有關招聘、推銷、廣告等內容;
  4. 禁止公開任何個人資料(如電話號碼、電郵地址、即時通訊帳號等)。

敬請留言者自律。本網站保留刪除/堵截任何留言的權利。

會員登入
登入ID 或 網名
密碼
1. 歷史長河 2016-04-14 08:46:55
如果租金和樓價走勢大體一致,則有人會認為任何時候都啱價,也有人會覺得任何時候都唔啱價。

所以有人會講,即使樓價跌五成都唔會買。
2. 85後已上車 2016-04-14 08:51:15
最近買左樓, 比上一年平左幾十萬, 同最高位比平左百幾萬! 雖然仲可能再平D, 但係想到呢幾十萬其實幫我慳左十年時間。

非常, 感謝博士。


3. 屋村師爺陳 2016-04-14 09:31:49
CY點解要配合年青人則低個巿?然後營造人人買得起嘅感覺呢,「太共產化了」毛骨悚然,其實「跌7成」佢哋都唔會買,皆因佢哋「等緊公屋」,供樓如果不能一炮過,只會比銀行賺利息,父母教落而家間公屋都夠住,再排下隊先啦。

所以我好懷疑CY落錯藥,中產們「被共產邊化」,應該收返啲地「多起公屋」。而家所有新盤,折幾多都好,都要成萬蚊尺,講真,「輸在起跑線上」果班年青人邊有首期?年年「月光族」何來有$儲份首期呢?

如果「只為政策」而要「則低個樓巿」實在太魯莽嘅行為,「經濟好時」就話政策夠成功,「經濟差時」甚至是環球性實在太潦倒,樓巿被嚴重扭曲大家只在「沉溺在政治情緒中」,而忽略經濟危機。

政府再唔適時檢討或只會在「有起事上嚟」才臨急抱佛腳的話,大家預佢「跌7成」年青人都係「買唔到樓」,因為香港已淪為福利港「共產港」了,年青人何解還助CY推向共產策呢,昔日的獅子山精神也被扭曲意思了。

共勉之~
4. 自我陶醉 2016-04-14 09:42:36
中肯!  非常同意。唔知博士對有錢就買嘅策略又有何看法?  係咪同有錢就賭大啲一樣?  
5. Ca1on 2016-04-14 10:05:54
2樓, 慳十年時間就太誇張, 你買得起樓嘅, 幾十萬最多咪一年人工!而且而家回落只係嘔返2015年4月之後忽然玩大時代爆升嘅升幅,如果你同大時代後樓價比,好多地方都平左幾十個,但最多都係返返去舊年年頭水位。如果你睇樓市會再大跌,咁即係個市問題會好嚴重,如果真係出現跌三五七成嘅現象,你咁計法咪即係輸球幾嘢。
6. 是必輸的人物之一 2016-04-14 10:27:45
02年以一百萬買入一個上車盤,朋友中一樣有人向我表示樓價貴買錯,住到今天結果是 無得輸,無得輸。02-04年內共有1095天,無論那一天買樓做業主,只有買貴唔會買錯,到今天都是 無得輸!

因此,買樓哩樣嘢,好似同檯食飯,各自修行,因人而異,好難一概而論!所以,對市場走勢各有解讀,才能形成市場上的交易,同時,做成財富不等的現象,貧窮的其中一種情況在於不懂得把握機會投資,『夠膽輸,而唔夠膽贏』!
7. 打工仔 Andy 2016-04-14 10:44:00
租金真係回調左? 一區區啦, 旺區現正已經平穩! 
8. 路人甲 2016-04-14 10:49:02

博士 早晨!!

對, 有啲人, 買樓成日細眉細眼, 想再跌多D, 到跌好多時, 都仲做緊'' 叔父''輩;
買樓係要長遠的. 尤其一早已經對巿場有留意的人, 
根本就好容易知道樓價走勢已經跌左幾多%..

樓價升佢追;樓價跌佢縮的人, 一般都係羊群心態,兼拿不定主意的人,
這些人其實唔适合買樓, 去澳門可能爽D :))
跟人買!! 哈哈.....

多加一句, 呢個世界係咁架, 你唸住唔會輸, 到頭來再跌D, 又唔忿氣的人, 都係唔适合買樓!!
買樓的人心理質素要高方可!
9. Ca1on 2016-04-14 11:18:42
其實辣招已經幫咗好多人「睇定啲」,啱啱買樓唔會即刻俾人震走,已經算係起咗穩定樓市嘅作用。
10. Small Potato 2016-04-14 11:31:40
我都不能同意更多😊😄

自醉兄,我覺得係香港,有錢就買樓呢個諗法正確,但至少都要配合時機,買樓既野,靜市或跌市時候,有多D靚盤揀,又可以鋤價,最好不過。我都好想,如果博士可以分享一下呢個就好😊

11. 周顯大師 2016-04-14 11:34:46
香港有272萬個住宅單位,但只有248萬個家庭,那為何會有樓宇不足呢?事實上,住宅單位數目高於家庭數目,是一個出現了十年以上的現象,但只要察看客觀的事實,便知道以上的想法是錯的。

問題在於,錯在哪裏呢?

第一點,272萬個住宅,必須減去3.7%的空置率,這已經是10萬個單位,即是只剩下262萬個單位。如果按照國際標準,低於5%的空置率是為之供應不足,5%至10%是正常,所以香港在這幾十年來,是長期供應不足的。

第二點,很多住宅是商住用途,用來作了小型企業的辦公室。



廿年後爆舊樓危機

第三點,一些家庭有長大了但未結婚的子女,搬出自住,現時灣仔、九龍站、奧運站等便有大量這種面積小小的「豪宅」,專門供單身富二代自住。

第四點,人們對於新樓永遠有需求,正如日本的舊樓完全不值錢,但仍然有很多日本人去買新樓,因為日本人不喜歡住舊樓。這也好比美國的汽車普及率已經超越了人口數字,但新車照舊有人買。

第五點,不能單計單位數量,也要計算面積。香港的房子太小,很多家庭會買超過一個單位,我哥哥以前在滙景花園便有三個單位,一個是書房,當年金庸在北角恒景園也有4個單位,一間也是書房。

第六點,也是最多人忽略了的一點,就是樓宇是會折舊的。假設樓宇的壽命是50年,香港單單換掉折舊的住宅,每年要建造5.44萬個單位,才能夠維持樓宇的數目不變,縱是樓宇壽命有100年,每年也要有2.72萬個新單位,以作新舊交替。

現在惡果還未浮現,皆因危樓主要是五、六十年代的舊樓,但香港開始大量起樓是在七、八十年代,所以在二十年後,才是危樓大爆發的高峯期。


周顯
12. 半肥瘦C9 2016-04-14 11:43:23
我真係有錢就買樓,買樓就係草錢,買樓唔係賭錢呀,呀SIR !
13. 占士 2016-04-14 11:48:50

啱價是對準備好的人而言的,對沒有準備好的人來說,任何時候都不啱價! 哈哈哈

14. 自我陶醉 2016-04-14 11:56:45
Small Potato兄

絕對同意! 時機非常重要,結果亦係天同地之比。

有錢就買事實又係點?  當大部份人都覺得自己最有錢嘅時候,就係樣樣都已經炒貴哂,不但貴,而且質素差兼冇得揀嘅時候。睇下97, 同2015 就知。到啲嘢平時,又係人人窮到燶最冇錢嘅時候,永遠都係賤物鬥窮人,咁如果人人都有錢就買,冇錢就唔買,咪永遠都係摸頂入市囉!

15. 歷史長河 2016-04-14 12:05:22
多謝半肥瘦C9兄及小薯師妹認同,陶醉兄應該喺寫俾我的,不過佢今次同以往一樣,都喺冇咩新意,仲喺97,所以我不再回應佢。

陶醉兄,讓風繼續吹,請繼續在97沈醉。
16. TO: 11樓 周顯大師 2016-04-14 12:09:12
還有好似發展商的附屬公司所持有的住戶單位,有些只放租而不賣,有些租賣都唔放,最典型例子就檸檬茶:少甜甜,揸實約萬個已落成的單位十幾二十年唔賣唔租,只養老鼠曱甴,地租差餉照俾又點話啫,你吹咩!
17. 路人甲 2016-04-14 12:15:59

有錢買樓係應該的, 因為銀紙不斷貶值!
尤其08年金融海嘯起至今, 銀紙貶左一半有多,
100蚊相當於果陣50蚊咁上下, 哎, 真係令人難受....

仲有呀, 啲油價跌到歷史新低, 香港D油站仲係收番一樣價錢, 十幾蚊@升, 無減過價!!
(Y_Y)'' 真係令人火都嚟!! 
政府@升有幾蚊稅,唔敢出聲! 
石油商更加唔會減俾你拉, 
得閑囉, 咪一星期一次仲減少少, 兼好遲才通知MEMBER減價, 多數係MONDAY, 等你地班友仔工作都忙到死, 無心力嚟加油囉!! 簡直 係暴利, 點解無人嚟嘈!!

飛機燃油附加費都已經唔俾再加啦, 可能政府無著數吧!
入油站D油仲咁貴, 為何政府一言不發?
18. 2011年開始 2016-04-14 12:22:50
東九龍住宅5月初到期,原價續租一年
19. TO: 17樓. 路人甲 2016-04-14 12:24:47
無錢就唔好學人買奢侈品揸車啦,交奢侈品間接稅俾政府合理分配資源是件光榮的事情,是應該!
20. 橫行既樓市 2016-04-14 12:28:10
香港樓市點解一係爆漲一係爆跌,點解唔可以橫行20年,樓上橫行對社會益處多多。辣招有助橫行,點解幾位江湖大佬一直指責政府不撤辣招?
21. 蕭峰 2016-04-14 12:47:42
樓上仁兄

好簡單,請問97大家樂套餐平均售價幾多?個時25蚊一個餐好多選擇,今日大家樂最平一個lunch都要35,仲冇乜選擇。

如果民生產品唔加價、人工唔加、通脹又冇,可能樓市會橫行。

22. 苦前業主 2016-04-14 13:33:38
To路人甲,
我之前都有講過呢個話題,政府打壓樓價係為人設想,係應該。但講到油價,就話自由巿場無得干預。中產死得啦!

To19樓,
如果你咁諗就大錯特錯,是否只有高產才可以揸車?
車,可能你未有,所有以為車只是奢侈品,但搵食車就非也仲有好多都用電油,而且需要架車養活三代。

23. 苦前業主 2016-04-14 13:46:25
To3/F屋村師爺陳
講得好!!!其實我一直懷疑泛民其實本身先至係共產成員,無理由每次暴動捉哂啲人,果頭又放返哂出嚟,結果無事。而且呢班「泛共黨」煽動班後生仔推動共產化。所以呢班後生仔好可憐,以為自己係本土派,自己唔知比泛共黨利用。乜乜打倒地產霸權、電訊霸權嘅口號,連小學生都識,又叫政府回收電訊牌照,連打電話嘅錢都想政府找。即係由中產找數!仲唔係共產化!

24. TO: 22樓. 苦前業主 2016-04-14 14:07:02
你唔知政府對運輸業用油是免稅咗好幾多年咩?我承認無車,但有車位收租呀‧‧‧

仲有,你哋嫌油價費,可以花錢買新型電動車充電車頂當,車價入口稅政府仲有寬免添,咁咪可以避開政府的高油價稅。睇怕你無膽換電動車喇。
25. 引刀一快 2016-04-14 14:57:53
最後有一種人,追價買樓就夠膽,樓價跌就唔夠膽,在他們而言,樓價在屢創新高時反而會是啱價,樓價下跌,即使他們可以輕鬆負擔,都不是啱價,這種人賭錢就會贏左縮,輸左谷,是必輸的人物之一, ”

我就正正係唔追價,跌到咁上下,就會入。
26. 引刀一快 2016-04-14 15:04:58
To 21樓 蕭峰兄

97年我喺理工考試,當時裏面間美心我見到30蚊一個雞扒飯,過三四年左右,見到17蚊一個茄子飯。唔同時期,應對經濟環境,不單會調整價格,仲會調整供應品種,對應市場需要。

往後幾年,一定會有平貨。
27. LYC 2016-04-14 15:09:17
26樓刀兄,你有什麼理據將會有通縮呢,又係隨口亂嗡?現在股市已經率先爆上。
28. 蕭峰 2016-04-14 15:15:53
冇錯,97後過多幾年sars嘛,你咁比,冇野講。

29. 引刀一快 2016-04-14 15:18:19
To 13樓 占士兄

啱價是對準備好的人而言的,對沒有準備好的人來說,任何時候都不啱價! 哈哈哈”


咁請問對咩人嚟講,任何時候都啱價呢?
30. to 引刀 2016-04-14 15:25:39
見到引刀兄d貼,心中只係不快
31. 望東樓 2016-04-14 15:29:40
刀兄,有。細佬有啲朋友係有錢身痕果隻。最好用層樓吸乾佢未來多年嘅流動性。
32. 苦前業主 2016-04-14 15:31:54
To24/F
現時Model X 賣價1M左右,車廠保證五年內trade in 75%回收,電動車大勢所趨,嚟緊我都訂咗架Model 3 0.5M有找,要出年第二季先香港落地,目前呢個Model全球已接單35萬部,唔知你明唔明我講咩呢?電動車已進入量產化大時代,我意思係越嚟越抵玩,電油快成中古品了,我唔係曬命,而係話政府政策對樓巿過份操控,但對油價就粒字不提,財富偏向大財團手,作為有產嘅你同我都受緊!明冇?
33. 引刀一快 2016-04-14 15:32:41
答案: 長河san

啱價啫,冇話一定要買吖,係咪?哈哈哈哈
34. 引刀一快 2016-04-14 15:43:03
蕭峰兄、LYC兄

1997-2003係確實發生咗嘅例子,未來通唔通縮?借古喻今啫。

97之後三四年,邊係sars喞!
35. 引刀一快 2016-04-14 15:49:50
To 31樓 東樓兄

有個故事,講個日本仔同美國佬喺草原上遇到隻獅子,美國佬馬上走而日本仔換跑鞋,美國佬話:換咗跑鞋都跑唔過獅子嘅喇,仲唔走?,日本仔話:跑嬴你咪得囉!

社會上冇“美國佬”的話,又點會穩定呢。
36. 引刀一快 2016-04-14 15:54:09
大俠

我發現你呢排真係神叨叨,我幾時回應20樓喞?
37. 蕭峰 2016-04-14 15:57:57
引刀兄

所以話你係為窒而窒囉!

人地20樓係想問,「點解樓市唔可以橫行」,你即刻攞通縮來講,搵一切機會sell 你個point,都唔係人地想問既野!

38. 路人甲 2016-04-14 16:04:25

回:19

車 - 唔可以當係奢侈品, 某程度係必須品! 莫講話私家車啦, 公型車, 搵食車, 乜車都要用燃油, 即使唔係油, 都要GAS 或者電!

自由巿場係一件事, 我地可以選擇 ! 目前, 油商只有幾間, 全世界來來去去都係果幾間;
公平競爭法來講, 佢地已經同流合污, 普通汽車全部都14.XX@升; 你講無夾計賣油我都唔信. (相反, 國內做得好, 95/97等比較貴的油, 都已經明顯地減價了! )
香港政府係呢方面應該發聲! 這個與我有車無車無關係! 不平則鳴!

問題在油商價錢,沒有因應入價高低而調節, 這個與我們俾消費稅政府係兩回事! 政府已經有反競爭條例, 也有反壟斷情況, 事實係要出聲及跟進! 請19/F 搞清楚件事! 

我不可能因為這樣情況而怕左佢唔開車, 相反, 大家應該團結, 把社會倡議更加合理的行為, 這些也是良心回饋的做法. 賺錢之外, 也要有社會責任.

無疑, 大財團壟斷各行各業已經係大趨勢, 所以, 可以的話, 我會到小店去幫襯,買同樣的東西. 支持一下!



39. LYC 2016-04-14 16:05:35
刀兄所講係接近廢話,完全冇point,令人好失望啊!
不如去努力發展自己事業,好過在這裡浪費時間講廢話啦!
40. 鄉下仔 2016-04-14 16:10:46
啱價!自住又供得起,確實現在樓價平了不少
41. 望東樓 2016-04-14 16:27:11
刀兄,果個日本仔應該叫羊子。羊嘅本性係將另一隻羊放響自己同危險之間。
42. karl 2016-04-14 16:38:49
新盤一年供應2萬伙佐佑, 即每月/星期要賣幾多先可完全消化? 每星期又確實成功賣幾多伙??
作為發展商/好友,日日唱好點吊高來賣最終都要面對現實..... 二手樓業主始終都是後知後覺
43. TO: 32樓. 苦前業主 2016-04-14 16:46:09
俗語有雲:唔怕油貴,最怕你 運濟【唔怕樓貴,最怕你 運濟】一樣道理。唔通買入住宅後,怕美國聯儲局不停加息咩?你買樓買車,並未預算將來的息口的變動,及油價的漲跌咩?香港油價幾時都咁貴,這就不是社會的錯,而是你不自量力的錯。
44. 望東樓 2016-04-14 16:52:07
Karl兄,
現今業主就一年買兩萬個 (1858+1577)/2×12
三月份住宅物業交易中,該局已確定27宗須繳納SSD交易,按月多5宗,稅款額按月多63.3%至1,372萬元;同期錄147宗須付BSD交易,按月多逾1.37倍,稅款額按月卻少17.6%至約2.6億元;同期錄1,858宗須付DSD交易,按月多281宗,稅款額為12.71億元,按月增74.4%。
45. 占士 2016-04-14 17:04:40

To 29/F 刀兄,知道您會說是長河兄的! 哈哈哈

真是非常巧,當我問有關大陸相關事情的時候,長河兄也認為您會給出很好的答案的。您們真是心有靈犀!哈哈哈

 

To 31/F東樓兄,小弟認識的有錢身痕果隻通常是存不到錢的,對於買樓都是只能望樓輕歎的那種! 哈哈哈

46. 望東樓 2016-04-14 17:22:08
占士兄,

同意,細佬有個砂煲兄弟,儲夠首期都可以係東京一鋪清。不過呢類人通常好有人緣。所以幾個兄弟挾持佢上咗車。
47. LYC 2016-04-14 17:28:27
你覺得兩萬多只不過係因為過去十年新樓供應特別小啊!
如再睇前十至二十年,平均都接近三萬啦.何況現在人口多過以前咁多,還有國內人來搶貨.
發展商見賣得慢,咪停工唔起樓囉,所以真係有兩萬都係一個問號,賣了一大部份,鎖定利潤,咪直頭唔賣,擺幾年等個市旺先賣仲赚得多呢!
好多有錢人掃緊貨啦,睇野唔好太主觀願望,諗自己所幻想,股市都升番咁多啦!

指數已經由低位彈回幾個%啦!
48. 占士 2016-04-14 17:56:53

東樓兄,有您們這些那麼好的兄弟是他的福氣!不過,您們幫忙讓他上到車,往後是否能安全駕駛不出意外又是另一個問題!對嗎?

49. 打工仔 Andy 2016-04-14 17:57:10
今日係茶餐廳午飯時, 坐我對面兩個後生的嘅對話, 真係要思考下,
A同B講, B兄你結婚後住邊? B回答話住間一房私樓, 雖然是一房, 總是有私人空間, 都幾好! 
A就問, 租定買? B回答話, 不是租不是買的, 是老爸嘅收租樓, 結婚借來住下先!
A就問B, 现在 d 樓都回調不少, 點解唔買? 
B就話, 買左樓唔使去旅行, 乜都無得玩囉! 
B仲話, 已經申請左公屋, 日後工作不用搏, 因為有公屋, 有錢就去旅行遊世界, 不知幾好!
聽到我耳仔凸, 真係想讚佢叻仔! 

50. SHUN 2016-04-14 18:02:36
升得幾百點又叫爆上?跌成萬點(28000~18000)又叫乜呢?托市怪D乜春道理?
51. 引刀一快 2016-04-14 18:21:18
To 37樓 蕭峰兄

搞笑,我都唔係回應佢!點解你咁夾硬嚟嘅?
52. 引刀一快 2016-04-14 18:34:18
To 41樓 東樓兄

唷,經典經典。
53. 蕭峰 2016-04-14 18:38:39
樓上,我答左人地一句,你又跑過來撩我。

其實我冇乜興趣同你拗架,因為你份人係為拗而拗,同埋一個唔開心,鍾意爆粗口,同你講野冇乜意思。


54. 引刀一快 2016-04-14 18:39:16
答句嘴都叫“撩”?你唔係大俠,係大爺喎!
55. LYC 2016-04-14 19:02:23
刀兄,其實點解你咁得閒和無聊?你冇野做?
56. 自我陶醉 2016-04-14 20:05:43
引刀兄,

你通氣啲喇, 兩位超人都覺得你阻住佢發達呀!

今日我同大超人講:

如果係真正嘅長線投資者,個市跌只會等靚位密密入貨,就算係好心,都只會講一兩次提吓就算,點會日日喺度催促人入市?  會咁做只有兩類人,一類係地代,另一類係未走哂貨嘅炒家。

我問佢係邊一類,佢竟然扮懵答我:

“乜原來有樓人士只有兩類人啊?唔係地代,就係炒樓?”


咁你都仲唔明?
57. 蕭峰 2016-04-14 21:03:18
你要copy,就copy個full version啦,只會斷章取義!

582. 蕭峰2016-04-14 11:57:09
「點會日日喺度催促人入市?  」

幾時日日催促入市?好友post小小新聞,已經被人窒到暈。

你又唔講不停催眠買樓=跳樓、負資產的言論算咩啊?
58. LYC 2016-04-14 21:18:01
http://hk.on.cc/hk/bkn/cnt/finance/20160414/bkn-20160414180542773-0414_00842_001.html

創新高,宅友!有錢人不斷掃貨,新盤又加價,你又有乜理據通縮呢!
只識恐嚇人買樓=跳樓,有何居心呢?
59. 市民 2016-04-14 22:32:11
哦,原來D聰明人就係掃呢D一眼就望晒嘅公屋款居屋,真可憐,何文田新盤賣唔去,竟然‘有'人走去‘掃‘,唔緊要,用十幾萬就可造一造勢,值得嘅,之後撻諚就冇人知喇。
你話呢,地代幾可悲,劈佣都冇生意,繼續瞓天橋底啦。
60. 望東樓 2016-04-15 08:55:31
占士兄,我諗咁都算仁至義盡啦。
61. LYC 2016-04-15 09:45:51
傻仔,邊有人會為咗造一造個勢用新高價去買樓,講啲野是否智障!因為四周圍冇晒盤,焗住買,醒下啦!
我終於諗通咗班通縮王點解可以咁得閒,炒股更加輸多贏小,都可以唔洗做,.
原來得佢住個區有通縮,唔掛知得啲錢咁好洗啦,我地個個都捱緊通漲,佢地就生活在通縮的世界,真係最醒係班通縮王呢!
62. 引刀一快 2016-04-15 11:57:26
To 59樓  市民兄

“掃貨”呢招已經見怪不怪,依傢仲要請埋網軍日日吹樓價上火星,唔好以爲D網軍係壞人,其實佢地嘅真人好似白燕張活游咁,日日捧住半碗飯,對住碟冇鯪魚嘅豆豉流眼淚,好在菜葉唔駛錢買,喺街市垃圾桶執嘅,床上面瞓住黃曼梨,咳到鼻屎都跌埋岀嚟,你話馮寶寶係咪要畀心機做網軍,猛寫樓市go go go吖?
63. 引刀一快 2016-04-15 12:37:51
To 56樓 自我陶醉兄

有D人,就算自己走晒貨都係要繼續托市,因爲上年氹咗班姨媽姑爹入市,三年SSD,死都要死個市返嚟俾姨媽姑爹出貨喇,唔係點收科呀!

不過你又唔好以爲可以繼續見到佢地好耐,再跌多15%,佢地就會俾人放入紅毛泥封存。
64. 市民 2016-04-15 14:16:48
哈哈,智障超人,四週冇晒盤!?赞到C眼開花都仲得呀,得閒唔好成日係公厠門囗收銀仔,出嚟見吓人先得架!
65. 遊山玩水 2016-04-16 09:15:28
辣招一日未徹消,個市冇得玩!香港本是一個資本社會!自由市場!