地產博客 > 文亮言 返回
瀏覽人次:25922    回應:35
文亮言
政府將會迫自己撤招
 
湯文亮博士
紀惠集團行政總裁
2016年4月9日

  有老友話,樓市在政府的三款特別印花稅以及7次逆週期措施之下,雖然令到樓價下跌,但要上車的人依然很難上車,問我有沒有辦法令政府撤招或者放寬逆週期措施,老友跟住話我都是冇計,只不過是多口問一句,老友講得冇錯,我真的是冇計,就算我有計都冇用,政府話唔撤就唔撤,不過,我估計政府唔需要幾耐就會撤招或者放寬逆週期措施,而撤招壓力並不是來自任何人,是政府本身政策迫使不得不撤招。

  如果政府沒有重推居屋,又沒有港人港地計劃,要政府撤招就非常艱難,因為沒有包袱,私人地產商是否能夠賣走手上物業,政府完全沒有責任,但房委,房協,市建等公營機構所建成的樓宇,如果因為政府的打擊樓市措施而未能賣出手上物業,政府是責無旁貸,到最後,都要批准減價,亦即是確認樓市下跌,金管局就要履行承諾,放寬部分逆週期措施。其實,金管局早已打算放寬,否則的話,財爺及陳總就毋需在公開場合話,如果確認樓市下跌,就會放寬逆週期措施,而且講了幾次,唔通冇事搵事做,但如何確認,就很難有一個準則,無論如何,當資助房屋要減價,樓市下跌根本是事實,亦毋需確認,所以,政府遲遲不批准資助房屋減價,就是不希望樓市下跌事實被確認。

  今次,真的是十分多謝申請買市建資助單位的市民,他們縮沙其實是向政府施壓,如果今次滯銷,或者只能賣出幾十個單位,最後,迫不得已都會減價,而且幅度不少,我估計大約20%左右,因為幅度太少是沒有效用,如果這樣都不能夠確認樓市下跌,倒不如政府列出條件,怎樣才能確認樓市下跌。