小陽春與陽春麵

　　有物業代理質疑我話今年唔會有小陽春，應該是錯的，最近二手樓成交量不俗，勉強都可以講是小陽春，我話成交價如何，大多數都是低於市價成交，低一成甚至多過一成比比皆是，成交量多對於物業代理來說，的確是小陽春，但對於業主來說，並不是小陽春，物業代理問，究竟係乜春，老實說，我都唔知道，老樓話係假陽春，我覺得都幾貼切。

　　我走去上海飯店食麵，見到最便宜的麵叫陽春麵，我問夥記點解叫陽春麵，有什麼配料，夥記話，陽春麵即是光脫脫麵，什麼配料也沒有，碗內個麵好似個太陽，所以就叫陽春麵。夥記咁講我就明白點解物業代理話現在是小陽春，因為現在賣樓的人在賣樓，還清所有銀行或者財務公司債務之後，大多數是光脫脫，唔需要贖身已經是好好彩，或者，可以夠食碗陽春麵，所以，用小陽春來形容現在樓市亦頗為正確。我問夥計有冇假陽春麵，佢話有，順手俾碗湯我。

　　有物業代理話，先有量，後有價，所以，成交量增加都可以說是小陽春，用假陽春來形容似乎太過份，物業代理千祈唔好嬲，我絕對同意樓價唔好但有成交量都是小陽春，雖然只得半個，總好過價量都冇，其實，成交量增加代表市場上仍然有足夠購買力，只不過價錢未能為此向上，大家亦不要奢望今年樓價會上升，如果跌少過一成都當贏，打算買樓的人其實是有很多選擇，大量新盤供應不在話下，銀主劈價盤熱潮剛剛開始，在市場慢慢搵，鋤下價，一定可以買到心頭好，不過，一定要有一個心理準備，買樓之後樓價會繼續下跌，這亦是正常，試問有幾多人可以在物業市場撈底，唔好要求咁高，不如想下現在買樓已經比去年慳了兩成，心情就會靚很多，在個人心理上，亦可以說是小陽春。