主頁 搵樓/成交 放盤 數據公佈 地產新聞 地產博客 置業手冊 背景 / 聲明 / 聯絡我們 繁體簡體English
瀏覽人次 : 26866    回應 : 15
文亮言
年底會有幾多個負資產
 
湯文亮博士
紀惠集團行政總裁
2016年3月15日

  有記者WhatsApp我,問年底會有幾多個負資產,我去了打波兼晚飯,唔記得回答,翌日我睇報紙話到年底有一千個負資產,二月底有二百個,我覺得數目太少,就算那些已買走的負資產唔計算,我估計最少都會有三千個,因為,就算物業業主一直有供款,財務機構又沒有沒收那些物業,只要物業估值低於市值,就可以歸納為負資產,其實,唔需要等到年底,現在已經有超過三千個負資產,一定又會有人話我危言聳聽,當然不是,我的預測是有理冇據,有道理冇數據。

  現在負資產數字只是由按揭證券公司及拍賣行提供,銀行在如此低成數按揭,基本上沒有負資產,而拍賣行所提供的負資產數字,是財務公司沒收的物業,委託拍賣行拍賣得來,就算是財務業界人士,他們根本唔知道有幾多負資產。在過去一年,有大量物業不斷加按轉按,就算他們連利息都還不起,但物業仍然不會是負資產,不過,一但樓價停止上升,那些人若果唔還利息,物業很快便會變成負資產,所以,任何人都不會有確實數字,大家都是靠估,我話有三千個負資產,有財務業界人士話我太保守。

  現在那些持有最多負資產的財務公司,資歴是非常之淺,對財務公司業務認識不足,大多數的按揭都是轉按得來,成數是非常之高,業主利用轉按所得還清上手欠款,其實,那些新進財務公司是接了火捧,當債仔收錢,還清上手財務公司欠款之後,基本上已經任由接火捧的財務公司處置,不過,他們會盡量拖延,那些新進財務公司亦唔知道怎樣處理,在樓價急跌之下,不少物業已經變成負資產,不過,財務公司還未有行動,或者他們根本唔知道怎樣行動,所以,我估計負資產個案陸續有來,數字會急劇上升,我相信唔使我講,大家都知道,今次受損失最嚴重的就是那些新進財務公司,如果,當時他們願意花138元買一本「細價樓爆煲論之始末因由」,今日就唔會咁頭痛。

 
我要回應
我的稱呼
回應 / 意見
驗証文字
 
回應 / 留言規則
  1. 禁止撰寫粗言穢語、誹謗、渲染色情暴力或人身攻擊的言論;
  2. 禁止以名稱/暱稱/綽號/同音字等批評或映射任何人士、機構、公司;
  3. 禁止發佈有關招聘、推銷、廣告等內容;
  4. 禁止公開任何個人資料(如電話號碼、電郵地址、即時通訊帳號等)。

敬請留言者自律。本網站保留刪除/堵截任何留言的權利。

1. 真真薯片 2016-03-15 10:50:04
文件怪仲困擾緊全城
2. 屋村師爺陳 2016-03-15 11:19:51
老實講,而家過百宗蝕讓嘅業主,半數都係去年高位入巿嘅人,普遍新界樓溢價太深,連同不足三年SSD就放售,這種人多數係自覺「錢唔知辛苦搵,再買唔覺笨」,負資產冠環帶上身過幾年又一條好漢「又如何?」。

近日地產商因應巿場追貼二手價硬打一場,二手減10%,一手死跟;二手劈2成,一手喪跟,相信報章及媒輩爭相谷谷這類新聞,但普羅大眾又點知一手發展商為咗Gimmick,其實所謂貼二手價只係該屋苑「只此一間」,有人幫手宣傳,大快人心。

具實力的業主群「腳踏實地」,一向從不黏股票巿場,一直也不釋放手頭上持有的優質盤,正所謂「持貨享升值,掟貨等乞食」心態,而且租金回報有些供了十年八年嘅人,享有8-10厘回報,供款期廿至廿五載離岸不遠,相對兩公婆年紀老邁借款能力不及從前,一買一賣不只雜費多,煩鎖手續亦多籮籮,也不如按兵不動。

奉勸年青一族,「路,沒有得怨對與錯」,「路,只有行得好定唔好」,就算條路你揀得有幾好,但自己從不行好都係徒然。社會怨恨大,係上一代嘅紛爭帶到現今。「唔食唔用18年才能儲到份首期~」是真的嗎?我夠話日本人買樓要「供三代」仲得人驚。整日自怨自艾係無用,跟隨別人自怨自艾更無用,更何況人生點只18年。

有心上車嘅人,唔好再等政府公屋,三年上樓根本無可能,單身人士起碼要等超過十年,與其要人幫倒不如自己幫自己。襯而家有腳軟業主因股傷身,佢哋劈價當然要追打落水狗,若要等發展商大劈讓,請你馬上搬入「堅尼地城」,因有這種諗法真係「堅過堅離地」。做生意不是開善堂,只要稍微改變銷售策略仍可大賺。

未儲夠上車首期嘅人,「世上只有老闆好、銀行好」有起事上嚟真係可以患難中出生入死,所以要好好打好份工,唔好返工遲放工早鬆,要建立好嘅職業操守,要保住份工同博表現,老闆就會準時出人工,定時就比你升職加人工,就算經濟唔好都唔會第一個諗你,買樓上車就「離地不遠」。

「人哋話買保險要襯後生好,我就話買樓上車襯早好」。苦心自問有沒有一位老友可以借錢比你買樓?仲可以灘長三十年時間還?有邊個老友可以?有都留比自己啦。計我話銀行先至係真心幫忙嘅老友,我敢問呢個論壇嘅前輩叔輩們做咗咁多年人,有邊個同銀行關係唔好?只要不要搵$10蚊就洗$11蚊,還款記錄良好,沒有太多貸款記錄如車、音響、電器,或分期還款過往及過多卡數的話,銀行都會當你係「老友」。
3. 并 2016-03-15 17:54:38
WhatsApp
4. Admin 2016-03-15 18:02:04
謝謝3樓, 文章已作出修正
5. 引刀一快 2016-03-15 19:34:36
去年3月17日,三年1萬負資産個案牙鉸打賭,睇嚟又邁向目標一步。
6. 真真薯片 2016-03-15 21:25:08
原來依家仲有人信日本人供樓要供三代
7. 好 2016-03-15 22:26:38
真片兄,我都信㗎,乜原來唔係咩?請指教!
8. 無名小卒 2016-03-16 01:57:00
仲話日本人一層樓供三代嘅,就真係住堅離地城。除咗東京近幾年反彈咗小小,日本樓已經跌足二十幾年。樓價一早平過香港。

9. SHUN 2016-03-16 07:24:15
一定無97甘多(十萬)因為畸形樓市連上車都無乜可能、不過呢三年上到車嘅………………屎梗!
10. DSY 2016-03-16 09:04:32
琴日無聊數了下身邊有幾多人買樓或者隨時買樓,原來2015年有5個朋友或同事買左,2016暫時1個,仲有2個知佢哋搵緊隨時入得市!買樓眾裡投行才俊有,商學院Dean有(邊間梗唔講得),高級督察亦有,原來最大共通點就是人生贏家,有錢任性^_^  
11. 動物愛好者 2016-03-16 09:06:01
屋企隻叫『旺財』嘅老虎狗真係負資產嚟嘅,又生多兩隻狗仔,睇嚟又要買多兩間屋比佢哋住,啲錢真係唔多夠洗添。
12. 怒婦炒魚柳 2016-03-16 09:24:32
我一炮買一棟東京樓,去吃陳皮啦師爺陳
13. DSY 2016-03-16 09:29:25
補充少少,千祈唔好覺得我串緊淡友,很多淡友亦是成功人士,但我相信他們不會每日在這裏說人「負資產」!聽過句話,excellent is not an action, but a habit! 我只想說,人生贏家一定因為什麼才成為贏家,或學識或經歷或判斷力或命好,試圖說服別人之前請先看看自己achieve過什麼!因為凡事必有兩面,沒什麼是絕對的,辯來無意思!計畫趕不上變化!

另外我贊同9樓一個 point,這年頭有機會「負資產」也需要實力的!
14. 引刀一快 2016-03-16 18:41:41
唉,成班天之驕子都要搞到上年先買到樓,真係天妒英才喎!哈哈哈哈哈
15. 引刀一快 2016-03-16 18:43:16
9成5按揭,原來都叫實力,怪之成街都“才俊”喇。