主頁 搵樓/成交 放盤 數據公佈 地產新聞 地產博客 置業手冊 背景 / 聲明 / 聯絡我們 繁體簡體English
瀏覽人次 : 41948    回應 : 9
文亮言
阿媽,千祈唔好叫人嚟拜年
 
湯文亮博士
紀惠集團行政總裁
2016年2月9日

  年初二,有去年中替兒子買樓上車的阿媽非常緊張,在過年前已經買訂不少餸菜,因為有不少親戚到來拜年,到時候,她就會耀武揚威一番,講下去年中替兒子買了那層樓的升值情況,做阿媽的想到親戚的表情,簡直由心底笑出來,於是,悉心裝扮一番,誰不知,阿仔打電話嚟話有事,今晚唔會返嚟食飯,仲話最好唔好叫人嚟拜年,係會被人窒,老公又話去睇賀歲杯,食飯時會返嚟,佢諗到,在耀武揚威時沒有人吶喊,會失色不少,於是下令唔准出街,做老公當然冇得反駁,惟有乖乖响屋企,但佢又講同一句話,老婆,最好唔好叫人嚟拜年,會被人窒。

  親戚朋友陸續到來,在阿媽未講替阿仔買的那層樓前,大家講吓昨晚暴動,又話會影響樓價,阿媽當然知道語帶相關,但她唔知道這只不過是前菜,大家講講下,自不然講現在樓價,其中一個親戚話,乜太,你知唔知道你替你個仔買入那層樓已經跌了兩成,仲話手上有幾個實盤,佢打算再鋤價兩成,就算唔成功,都已經被阿媽個仔買入那層樓慳了大約一百萬,即是少付四十萬首期,每月又少供二千五百元,阿媽聽到之後就想到,阿仔近幾個月都冇提及樓價,與當日在未買樓前,日日都話樓價創新高,分別實在很大,知道這是實情,望下老公,老公對那班親戚朋友說,買嚟自用,冇所謂,難得佢兩母子鍾意,大家於是唔再講。

  話題轉開,不過,仍然離不開物業,原來,成班親戚朋友後輩都打算買樓,不過就會買新樓,地產商為求去貨,一定會提高優惠,可以用比買二手樓還要便宜的價錢買新樓,是千載難逢機會,阿媽於是明白,點解兩父子都話唔好叫人返嚟拜年,不但不能夠耀武揚威,還會被人窒,仲有親戚朋友未到,起碼還有六七個鐘頭才完畢,期間仲要準備大菜小點,真的很難捱,阿媽想起當日在買樓之後,阿仔耀母揚威時是何等威風,不禁悲從中來。

 
我要回應
我的稱呼
回應 / 意見
驗証文字
 
回應 / 留言規則
  1. 禁止撰寫粗言穢語、誹謗、渲染色情暴力或人身攻擊的言論;
  2. 禁止以名稱/暱稱/綽號/同音字等批評或映射任何人士、機構、公司;
  3. 禁止發佈有關招聘、推銷、廣告等內容;
  4. 禁止公開任何個人資料(如電話號碼、電郵地址、即時通訊帳號等)。

敬請留言者自律。本網站保留刪除/堵截任何留言的權利。

1. 引刀一快 2016-02-09 11:38:43
直接約去酒樓咪得囉。
2. 拜年唔講恭喜發財 2016-02-09 11:59:25
拜年都講買樓,呢D咪潛在嘅剛需囉!
3. 無奈 2016-02-09 12:06:56
關鍵係怕比人窒,去哪裡都一樣。

調整心態很重要。
4. 樓市好友 2016-02-09 12:13:58
哈哈!我好喜歡博士呢篇文章。
祝博士身體健康。係呢一年寫多啲好文章俾讀者!
5. Tony lam 2016-02-09 12:31:03
買貴唔緊要、重有興緻大宴親朋、證明唔係炒樓、真係自住、改变吓概念買樓唔一定要升。
睇嚟噚晚旺角單嘢、到收網嘅時候嘞、 政府唔係冇力收佢皮、早收佢皮、造就班儍仔成英雄、要佢滅亡先要令佢瘋狂、阿爺策略CY執行得幾到位 ! 早打早收場、迎接好時年 !
6. 望東樓 2016-02-09 17:17:32
"下集"
話說仲有十五分鐘班親戚朋友就殺到,點知而家亞仔至話俾大媽聽CCL已經係四個月前轉勢.大媽震驚之餘唯有叫呀仔上網搵料.大媽記得呢排博士最潮,咁梗係第一時間上嚟property.hk. 博士嘅驚世錚言當然唔啱聽.不過係度比佢搵到好多樓市雖然短線有少少阻滯,但中線\長線\極長線都無敵必勝,交租幫人供樓一世無運行.而且仲係公仔我贏字就你輸嘅真理:
  • 經濟好,大家入息增加樓價當然上升/經濟唔好啲錢無定使,唔買樓買乜?
  • 減息當然買樓,供平過租嗎/加息?咁咪加租囉.簡單.
  • 發展商高價投地,每呎未來成本都兩萬,現樓有萬九真係平到震/流標咁梗係未來供應減少,咁啲樓遲幾年上得仲.勁
咁唔買樓仲買乜? 而家大媽好期待班親朋上門.
7. 蘋果 2016-02-09 21:44:08

曾淵滄湯文亮籲勿心急買樓 猴年新盤鬥散貨細價樓料最傷 

湯文亮曾淵滄:猴年咪買樓 

【本報訊】羊年樓市、股市風高浪急,升得快跌得更快,本報今年邀請到財經評論員曾淵滄及「細價樓爆煲之父」湯文亮論盡猴年樓、股、匯!兩人齊為樓市把脈,認為上半年樓市會繼續下跌,猴年仍然未有撈底機會。記者:程俊華攝影:馬泉崇

問:猴年樓市有何預測?

湯文亮:之前數年樓價不斷升是因為供不應求,但預期未來供應只會越來越多,今年最少有2.6萬伙供應。「長實(1113)要貨如輪轉,連新地(016)都話有6,000伙新樓要賣,大發展商今年好肯定要賣樓」,而中小型發展商更加要賣樓,要去貨。因此,相信一手樓定價一定不高,樓價依然會跌。

曾淵滄:樓價升跌在乎供求,近年每每以剛性需求多為由而推高樓價,但我從來不相信剛性需求,「每一個人買樓都希望樓價升,如果樓價跌,冇人想買完層樓之後又平咗,剛性需求都會冇咗或者推遲」。由於剛性需求是可以調節,樓價一旦下跌,需求自然又會減少。


■本報邀請到曾淵滄(左)及湯文亮(右)論盡猴年樓股滙。 馬泉崇攝 

問:樓市繼續尋底抑或會喘定?

曾淵滄:「樓市一跌會跌幾年,唔係一跌見底」。去年尾樓價見回落,但整體計仍有升幅。猴年樓市會否下跌,視乎發展商如何與政府博弈,如何定價賣新樓,如今發展商尚有周轉餘地,真正供應要到2018年才會湧至,所以猴年樓價未必會大跌。基本上樓市形勢只會越來越惡劣,未來只會更差,因為再無供不應求的藉口推高樓價。

湯文亮:相信樓價會繼續下跌,尤其是細價樓,估計上半年會急跌15%,會有少少恐慌,下半年會稍為回穩。至於中價住宅都會向下,幅度在一成以內;豪宅及超豪宅都不會跌價。

問:如何看發展商部署?

湯文亮:發展商不怕以略低價錢賣樓,因為如果樓價跌,賣地價亦會較低。如果大發展商繼續以貨如輪轉方法去貨,樓價跌未必對其不利,因為有足夠資金去以低價吸回土儲。惟中小型發展商項目不多,套現較心急,要散貨!

曾淵滄:「發展商今年仲有條件同政府玩落去」!因為2016年真正供應其實未到,而政府是否真正可以繼續推出土地?如果政府推出不到土地令供應斷層,發展商又可以推遲新盤時間表,影響供應,到時又儲到少少購買力。今年都是由發展商主導樓市。但肯定一手定價同二手樓相若,不會再有高價新盤。

問:猴年應否入市?

曾淵滄:「樓價周期太長,你miss咗呢個底,再等下一個底,要等十幾二十年,搞到啲人不耐煩,呢幾年咁高,啲人都不停衝入去買」。但要注意樓市一跌會下跌好幾年,不會一跌見底,所以猴年不是樓價見到底的時間。而細價樓每次都是「升到最後一浸先會升」,如果買得起不應買細價樓。

湯文亮:由於現時市場上以低價或蝕讓賣樓的人,好多都係被迫賣樓,因業主按層樓去借錢用來消費,要賣樓還錢。雖然平價盤源增多,但一如之前所講細價樓在上半年仍會急跌,所以猴年應該繼續「睇住佢跌」,除非有好逼切的自住需要才買樓。


8. LYC 2016-02-09 23:00:47
買層靚樓嘆下,又點會怕被人窒,就算買貴了,住幾年租金都係番到啦,買得起層靚樓不知幾有face,大把人都買唔起樓啦!
9. 真真薯片 2016-02-09 23:26:53
在下同意曾教授所講, 發展商今年其實仲可以惜售浪價, 不過在下覺得如果今年有金融動蕩既話都可能對發展商取態有影響, 大家買定花生