地產博客 > 文亮言 返回
瀏覽人次:37109    回應:23
文亮言
政府會不會撤銷辣招
 
湯文亮博士
紀惠集團行政總裁
2015年12月10日

  星期一,市場上突然間有很多聲音要求政府撤銷辣招,有記者問我政府會不會撤招,我話不會,並不是政府唔夠膽撤招,而是樓市下跌形勢未被確認,而且是業界還有人表示樓價仍有上升空間,有人就會話,最近那麼多劈價盤,還不確認樓市下跌,老施話,那些劈價盤只不過是傳媒渲染出來,數量根本是非常之少,不足以影響樓價指數,而我認為,那些劈價盤並不是業主心甘情願賣,而是銀主要業主賣,所以,售價不能作準,就算幾低價都冇用。

  美國加息,本來是一個極負面因素,但有人話加息代表經濟理想,樓價應該上升,我話美國加息是因為美國經濟理想,失業率低,與香港無關,而香港經濟正在下滑,加息令樓價下跌亦是很正常,如果唔加息,有人話這是一個好消息,樓價會升,我話唔加息,只是一個未發生壞消息,樓價就算唔跌都唔會升。股市升,樓價當然升,股市跌,樓市就是避難所,樓價一樣會升。人民幣升值,國內同胞購買力強勁,樓市升,人民幣貶值,港幣就是避風塘,連帶港樓都會升。這些似是而非理論,在每一個星期當樓價指數公佈之後,負責人都會搵到一些支持樓價上升理據,但無形中幫了政府一個大忙,在什麼情況下樓價都會上升,就算現在下跌,都只是暫時性,稍後就會回升,既然如此,政府又點會撤招。

  撇除上述似是而非分析,其實,是我們自己封了門,令到政府唔會撤招,在政府推出DSD之後,業界擔心政府隨時出招,於是,迫政府作出一個沒有約束力的承諾,就是再加辣就要立法局通過,減辣就唔需要,如果政府現在撤招,樓價突然飆升,再出招就要立法會通過,唔俾班立法會玩到殘都唔得,為官者的物質不變定律就是少做少錯,唔做唔錯,多做一定會錯,又點會撤招,大家死左條心好了。

 
 
我要回應
我的稱呼
回應 / 意見
驗証文字
 
回應 / 留言規則
  1. 禁止撰寫粗言穢語、誹謗、渲染色情暴力或人身攻擊的言論;
  2. 禁止以名稱/暱稱/綽號/同音字等批評或映射任何人士、機構、公司;
  3. 禁止發佈有關招聘、推銷、廣告等內容;
  4. 禁止公開任何個人資料(如電話號碼、電郵地址、即時通訊帳號等)。

敬請留言者自律。本網站保留刪除/堵截任何留言的權利。

會員登入
登入ID 或 網名
密碼
1. 自我陶醉 2015-12-10 08:44:20
博士, 那些似是而非的,不算得上是分析,只是主觀願望。
2. 神算 2015-12-10 09:13:58
自醉兄,

還有一些感性的因素嘛。
3. 真真薯片 2015-12-10 09:24:59
博士既分析每次都睇遠幾步加埋換腦思考, 實在令在下佩服

撤左出唔返, 當然唔會撤. 有point
4. Jerry 2015-12-10 09:59:42
謝謝博士分析。在今時今日既立法會,看來政府想有所為都困難。可悲! 香港還有多少本錢再被玩下去?

5. 神算 2015-12-10 10:19:57
特首一句「政府冇責任保證樓市只升不跌」,已經劃出腸!
6. 打工仔 Andy 2015-12-10 10:37:52
撤招, 真係無可能!
7. 真真薯片 2015-12-10 11:35:05
地產霸權當初借議員逼到辣招可減不可加, 搞到依家冇灣轉, 真係冇得怨

琴日五樓果篇講三任特首既文章其實有道理, 689雖然搞赤化, 但係佢又的確應香港人要求對付緊地霸, 可惜香港傳媒同大部份人都唔議事論事, 一味對人不對事, 唔鐘意個人就否定佢所有政策, 其實應該唔理個人係邊個, 啱既政策就支持, 唔啱就唔支持, 係咪?
8. 笑啖渴飲 2015-12-10 11:57:51
真真:
我都好認同特狗係樓市方面既努力, 始終早幾年地產商真係玩得太寸!
不過紅色資本更可怕, 交過手就知, 班生番做野冇譜冇底線, 求快錢
有得簡情原要地霸好過紅資, 小子自問冇能力同佢地玩, 唔到你唔驚
9. 真真薯片 2015-12-10 12:27:48
笑談兄,

冇錯, 紅色資本家做野冇底線, 亂咁黎賺快錢然後移民走佬

但係香港已經實際上比老共控制, 老共要搞赤化, 689只係手套. 反左689, 老共可以搵N個689黎做一樣既野, 結果係冇分別

有人話除非可以反左北京中央政權, 在下睇反左北京都冇用, 成個國家民族性本來就係咁, 換走左老共. 第二個上場都一樣, 歷史已經說明反左n次d人都係咁, 香港只係曾經被隔離學好左少少, 依家只係回歸民族原來文化既大潮流而已, 任何人都無辦法阻止
10. 朗晴 2015-12-10 14:04:59
點解二手市場會死得咁膠關,重衰過沙屎果陣,答案好簡單,就以本人為例,5年前買左個兩房半單位兩公婆住,依家連兩個細佬同工人一共三大兩細,本來換間大些少係好正路,但現行政策下賣樓可以套現三至四球,但買個一千嘅單位要比五成即5球嘢,你叫我換條鐵咩! 因此,

我有個少建議,未知是否可行,如下:

所有香港永久居民如只持有一個自住物業,可向銀行貸款最高75%,唯必須乎及以下條件:


(1) 加3.5厘壓側

(2} 單身上限樓價500萬(下同)

(3) 二人家庭750萬

(4) 三人家庭1千万

(5) 四人或以上家庭1,250萬


過去數年由於按揭成數越貴越低導至有很多需要細樓換大樓的人動彈不得,時間拖得越長,市場將越被扭曲,後果可以相當嚴重的,因此在盡量避免令市場波動的情況下盡早回頭是岸,未算太晚也!

我提出嘅方案應算全䇔方案:
㣭英 - 我無減辣無切蕉,只係方便D換樓客換樓姐☺
市民 - 細換大真係方便左好多,首置客首期都小左.☺
AA - 市場成交量由谷底千幾單二手升返上平均一萬宗以上.老闆同前線都笑左.☺
銀行 - 貸款額大左,客仔多左,壓側加到三厘半保障亦大左,股價除時都升左.😊
律師行,裝修佬,+C舖,電器鋪及9百幾個相關行業全部生意多左.☺
儍英你同意小弟的愚見嗎? 
見字後請回覆,否則全民大大碌😪

11. Oscar Lam 2015-12-10 14:28:56
政府的能力,再上政客拖後腿,是我不敢過於看好香港前景的最重要因素。
12. 引刀一快 2015-12-10 14:32:26
朗晴兄

佢囬覆咪即係自認傻英?邊個都唔製喇。
13. 浪子心聲 2015-12-10 15:04:00
朗晴兄:

換樓都不用太心急,正如湯博士所說政府是有機會放寬逆周期措施,但我相信也要樓價下跌了兩成才有機會放寬。

就算不放寬逆周措施,如樓價跌了兩成,換大單位都易啲啦,兩年後可能是比較好時機,等下先啦!!
14. MT 2015-12-10 15:06:49
對朗晴的提議有點不解。1人家庭上限500萬,2人家庭上限750萬較易理解,但為什麼3人家庭的上限是1000萬? 如果3人家庭的組合是兩大一小,他們的供樓能力不見得比2人家庭好吧。
15. 真真薯片 2015-12-10 15:43:17
郎晴兄, 

換樓既話, 可以考慮新樓, 超人元郎盤有唔少三房未賣晒, 又平又新又有高樓按, 仲有的入伙先比辣招稅, 算係咁啦
16. Ca1on 2015-12-10 16:23:19
作為少數的所謂政績, 特首自然死命不會撤消辣招, 否則反對派又可以大造文章說他官商勾結了. 
17. 朗晴 2015-12-10 16:34:06
引刀兄,我本來相寫振英,但係我手寫我心,無計.
18. CD ROM 2015-12-10 16:48:53
博士好似都講過, 最先退既招如無意外應為按揭成數. 如朗晴兄既一換一case, 一至兩年內應可以重啟呢d換樓行動啦...

其實以租養租, 呢個市況都不失為一條好出路! 出租舊居細單位而補d$租大單位, 一般當1萬差價, 一張約24萬, 好過又SSD, DSD........... 仲要一般大單位呎租仲平過細單位, 不失為短線既辦法呀!!!

19. SKY 2015-12-10 18:30:34
曾經聽朋友講,係一間中資公司做,按程序驗收外判公司之物料,竟被外判公司向其上司投訴,其上司又竟然接納,並當衆指責朋友,並說: 我地係中資公司,一切講求關係,你咁樣收人貨係唔應該喎,結果我朋友翌日即遞信……
20. 朗晴 2015-12-10 19:01:08
浪子兄,
我自己覺得有需要又有能力未來一年係細換大黃金期,諧因新樓盤大部份都是開1,2,3點少,未來C類即750呎打上單位必會嚴重短決,升勢肯定比今次A類升浪更驚人.
21. 朗晴 2015-12-10 19:07:14
14/F MT兄,
你說的也對,所以我第一點己指明要乎合加3厘半壓力側試.
22. 引刀一快 2015-12-10 19:50:14
To 9樓 真真薯片兄

好同意你呢個歸結,基本上就係咁嘅一回事,崖山之後無中國,試問民族性出問題、有嚴重缺陷,又焉能長治久安,大概係時侯埋單,希望籍此可以全民族來個警醒,借鑒世界成功例子,讓民族有再起之日。
23. 真真薯片 2015-12-10 23:20:47
引刀兄,

睇隔離篇文, 點解印度洋土人怕外來人, 似乎想強國全民覺醒, 難矣