10) 萬無一失的樓市預測

　　在往年年底，各評論員、分析師不約而同預測來年樓市走勢，有升有跌，熱鬧非常，但每一次我都與大多數的預測不一樣，今年我自己攞嚟衰，我在年初時預測樓市是一個先升後跌格局，不過，到年底，仍然有幾個%升幅，本來好準，但好衰唔衰，在今年二月初，唔知點解寫咗一篇「細價樓爆煲論」，仲要話細價樓六個月內爆煲，不但輸到貼地，未到年底已經要認輸，仲要擺埋認輸宴，很多人同意我的爆煲論，不過，認為六個月太短，多三個月就可以證明我的爆煲論是正確的，但冇得好講，輸就是輸。
 
　　今年預測樓市的人一反常態，唔敢講升，亦唔敢講跌，只是話樓市在窄幅內橫行，波幅在+-5%之間，其實，這個預測的準確性是最低，如果他們識賭百家樂，便會知道我在說什麼，百家樂，賭莊贏要抽水，賭閒贏唔使，賭和一賠八，以此類推在預測樓市走勢，講升的勝算是最高，講跌的比較差一些，如果講樓市走勢在窄幅上落，這個預測最難實現，如果沒有必勝把握，都唔會預測樓市在窄幅上落，今年有咁多專業人士作出如此預測，莫非他們有秘密消息支持，不過，我就很懷疑，我只夠膽講，明年整體樓市最少下跌一成，細價樓的跌幅最大，中型住宅微跌，豪宅甚至會上升，如果我的預測沒有錯，細價樓有機會下跌兩成以上，只有這個跌幅，才會令明年整體樓市最少下跌一成。
 
　　有人問我，怎樣預測樓市才可以萬無一失，我的確唔知道，不過，我記得指數公司負責人在兩三年前在一份月刊話，樓市一係升，一係跌，一係打橫行，這就是萬無一失的預測。