主頁 搵樓/成交 放盤 數據公佈 地產新聞 地產博客 置業手冊 背景 / 聲明 / 聯絡我們 繁體簡體English
瀏覽人次 : 32218    回應 : 34
文亮言
莊閒不分的賭局
 
湯文亮博士
紀惠集團行政總裁
2015年10月24日

  有網友撩我輸賭,在未來一年樓價指數不會下跌20%,我唔明白點解要搵我,本來我唔想回應,不過,見網友寫到長篇大論,而且連賭的意思也不了解,所以,我作出小小解釋,既然是網友出盤口,自不然是他做莊,他出盤口我做莊,我肯接受,其他人都會話我蠢,我自小學賭但從來不賭,我的「細價樓爆煲論」盤口是我自己開出,我又認輸,沒有人話贏我,林一鳴都唔敢話贏,其實,即使我認輸,大家都知道我是贏了。

  網友以一年內下跌20%為界,如果下跌19%都算我輸,似乎勝之不武,應該是他自己開樓價一年內不會下跌20%的盤口,少於20%是他贏,叫佢攞出街,睇吓有冇人同佢賭,這並不是賭,是搵笨,我平時唔睇數據,今次不得不睇,在過去二三十年,有幾多年是每年上升或者下跌超過20%,唔係冇,是很少,所以,應該沒有人肯接受一年內樓價下跌超過20%的盤口,點解一定要我接受,很奇怪。

  就算我肯賭,網友用筆名,輸咗都唔知道去邊度搵佢,在地產網,只有一個蠢蛋叫引刀一快,輸咗又唔改名,企定定任人砌,我有時都替佢可憐,其實,我亦一樣是蠢蛋,無端端認輸,仲要使幾十萬請食飯。再講,財爺與陳德霖一再表示,當確認樓市下跌,政府是會調整一些措施,我認為最大機會是放寬按揭,當樓價下跌一成之後,政府有機會放寬按揭,不但使下跌速度減慢,甚至可能微升,樓價要跌20%都難,莫講話一年內跌20%,所以,這個盤口是沒有意思,其實,什麼盤口對我都沒有意思,因為我唔賭,要我請食飯,容易到極,擺酒容易請客難,大家肯賞面就可以。

 
我要回應
我的稱呼
回應 / 意見
驗証文字
 
回應 / 留言規則
  1. 禁止撰寫粗言穢語、誹謗、渲染色情暴力或人身攻擊的言論;
  2. 禁止以名稱/暱稱/綽號/同音字等批評或映射任何人士、機構、公司;
  3. 禁止發佈有關招聘、推銷、廣告等內容;
  4. 禁止公開任何個人資料(如電話號碼、電郵地址、即時通訊帳號等)。

敬請留言者自律。本網站保留刪除/堵截任何留言的權利。

1. 歷史長河 2015-10-24 09:22:16
引刀一快威武!
2. 引刀一快 2015-10-24 09:35:43
同湯先生賭牙鉸係人間美事,贏到的確皆大歡喜,就算輸,有機會請大孖灑食飯,總有得著。
3. Desmond 2015-10-24 09:37:43
引刀兄應該沒有輸吧。
4. 自我陶醉 2015-10-24 09:40:07
原來自己講句話都唔敢認先係聰明人,明解!

引刀兄,看來我們都是蠢蛋啊!  

共蠢之,呵呵!
5. Small Potato 2015-10-24 11:06:42
其實有乜好攞呢D嚟睹,大家睇番自己能力就是了!計掂數既話,幾時都可以買!從來有升必有跌,吾跌點會升...
6. 魚蛋仔 2015-10-24 11:29:46

賭局的成立往往是兩個人或一群人對一件事件有不同的意見即興而成立賭局。適當的獎品例如負方請勝方吃碗魚蛋粉,不但可以增加賭局的趣味性,也可以借此一聚。頗有趣!

7. 中產求生隊長 2015-10-24 12:09:29
其實博士不要太在意,網友中現在只有絕大多數會睇樓市一年內跌過二成,所以才會在等大跌市後才入市,隊長亦好想等有平貨買,只不過聽到陸東一言猛然醒覺,隊長是執陸東口水尾,話樓市不會跌過二成,只有大人物與大人物開口對賭牙駁戰才有意思,隊長只係想所有中產投資者或業主一定要守住這不到兩成的跌幅而不要作出錯誤決定,如果陸東今次再預測樓市會跌三到五成,我隊長自己也會趕快賣走所有物業等。而且博士亦已講出不會大跌的原因,因為政府到時一定會採取救樓市措施,既然大家都知道結果,睹局也沒有意思,大家不如把酒談歡,人生幾何!
8. Oscar Lam 2015-10-24 12:13:19
湯博士,


在下認為,您開出的「細價樓爆煲論」盤口可以說是輸,也可以說是贏。輸在您跟市場不同歩,比市場走快了至少半年。贏在目前已經沒有人敢說未來二年樓價一定會上升。嘻嘻!
10. 打工仔 Andy 2015-10-24 12:14:25
如果博士請網友食飯, 我第一個報名! 多謝博士!
11. 打工仔 Andy 2015-10-24 12:22:01
昨日食飯時, 聽見對面台一班C 9在高談闊論講樓市, 佢地都好似係收租一族, 你言我語的, 有人話有 d地區d 樓差不多跌左一成, 大家點睇? , 有人話,只是好個別單位, 並無見到好多盘減價得多, 仲有, 如果真係跌一成, 佢地會去入貨!
12. Desmond 2015-10-24 12:29:48
7樓隊長,陸東於2013年說樓價於兩年內會跌50%,你當時有沒有將所有物業賣了?


13. yyfan 2015-10-24 12:38:05
就算跌兩成,計及一買一賣成本,根本唔值得去搏,除非賣完樓收到舊錢有其它用途,正因為好多業主明白呢個道理先令到依家二手買賣幾乎冰封,也可以解釋到依家代理機乎一面倒唱淡嚇業主放盤嘅現象
14. 回13/F 2015-10-24 12:42:26
点解係地代一面倒唱淡嚇業主嘅?早前你唔話地代一面唱好等D儍瓜追價入貨?呵呵!
15. 回中求隊長 2015-10-24 12:47:57
講股票,我信陸東;
講樓市,我信博士。
湯博士,我永遠支持你!
16. 打工仔 Andy 2015-10-24 13:00:45
yyfan兄

完全同意! 
因為來回差好多錢, 如果日後購回的單位要搞裝修仲金! 現在裝修費好貴!
當然每個人條數都不同, 要自已計數。
17. 如是 2015-10-24 13:09:27
就係因裝修費貴,若地區尺數相同,為何仲要以一手價錢買二手樓? 傻的嗎!
18. 蕭峰 2015-10-24 13:11:38
樓價最少跌兩成先值得買,三成就係執到。等!
19. yyfan 2015-10-24 13:15:14
TO:14/F

我幾時講過地代一面唱好?
20. 回19/F 2015-10-24 13:32:49
咪話你無講地代唱好囉,睇清楚D。
跌市就話地代一面倒唱淡!輸打嬴要!

21. Small Potato 2015-10-24 14:15:50
我都報定名啊!謝謝博士😊
22. yyfan 2015-10-24 15:16:11
To:20/F,原來你認為我怪責地代唱淡樓市?可能我中文水平有限,令你有此錯覺真是唔好意思,我一向都respect 地代呢個行業,好理解人地搵食梗係對人講人話,對鬼講鬼話,不過老實說如果要聽佢地意見去決定買賣就算把啦

講番地代,呢幾年同美加港打交道,感覺香港年輕一輩確實技不如人,而住宅部果班又比工商鋪更差一皮
23. 歷史長河 2015-10-24 15:56:18
Fan 兄,您的表達冇問題,可能有人誤讀。我對地代也會尊重,有時佢humble,搞到我都會好窘迫。
24. yyfan 2015-10-24 17:31:08
河兄,事實地代再艱難,又點會難得過係街邊sell人信耶蘇果班人,佢地一曰都唔知俾人拒絕幾多萬次,有時我同D同事講笑,不如咪登廣告請人,去街邊問吓班信徒有冇興趣搵份工做下好過
25. 無奈 2015-10-24 17:50:22
要跌20%?各國量寬的銀紙去了哪裡?還有哪些正在加印的歐元呢?人行又出手了。美國竟然以中國經濟風險為由不加息,太冇吉士了。估量著一眾才金官員講大咗,收吾番,顧左右而言他去也。
26. 引刀一快 2015-10-24 19:39:38
To 3樓 Desmond兄

2014年底CCL118呢個打賭的確係輸咗,輸到應一應,當時共5個輸家,三個非常駐讀者,加埋懶人同我。

27. 引刀一快 2015-10-24 20:07:22
To 4樓 自我陶醉兄

聰明人好難做,勞心勞力,遊走於多個身份間,不過我依家反而希望某些聰明人繼續聰明,就好似酒桌耍矛拉嘅人咁,令到酒桌變得更有趣。
28. 歷史長河 2015-10-24 20:31:52
6樓魚蛋仔,如果冇油菜+凍豆漿會不會動力唔大?
29. 魚蛋仔 2015-10-24 22:43:22

長河大師,

恭喜你贏得美酒和一衆網友的讚賞!如果你能夠贊助油菜+豆漿,咁就very good啦。

30. 無奈 2015-10-24 23:24:27
11樓打工兄:報導話睇樓又多左啲,看來所言非虛。何如此迫不及待耶?
31. 打工仔 Andy 2015-10-24 23:45:49
無奈兄

现在大量熱錢流入, 股市又回升, 樓市真係好難大調整呀! 回少少就會有吸引力!
32. 過路人 2015-10-24 23:58:35
To 30/F 無奈兄

我都“蠢蠢”欲動,把自住的三房轉四房。。。哈哈哈!

愚蠢是福也!!
33. Desmond 2015-10-25 01:04:32
To 26樓 引刀兄

輸了不要氣餒,重要是再接再厲。
34. 歷史長河 2015-10-25 22:37:40
33樓Desmond兄,

說對了一半,輸了不要氣餒是對的,再接再厲豈不是接着輸?輸了要總結經驗教訓才可再戰。

當年香港有幾樁豪門婚事(兩樁富豪,一椿前高官),小弟同人打賭唔看好,結果輸咗第一椿。小弟認識到佢哋口味不過如此,於是再同人打賭,結果連下兩城!
35. 望東樓 2015-10-26 09:32:55
CPI adjusted YoY change in RV housing price index