地產博客 > 文亮言 返回
瀏覽人次:33634    回應:40
文亮言
為何一定要少年識得愁滋味
 
湯文亮博士
紀惠集團行政總裁
2015年10月8日

  我有一位有錢朋友,他為了使他的兒子領會基層以下的人生活,於是托社工安排入住籠屋,做其籠民,為期一個星期,誰不知,他的兒子只住了一日,便逃離籠屋,回到家裡後猛彈,又話那些地方根本不是人住,食物只適合給狗食,我朋友無奈,欲語還休,知道那些現在住籠屋的人,當中亦有不少有過一段叱咤風雲日子,只嘆了一句由辛棄疾所說的,少年不知愁滋味,於是搵我飲酒訴苦,我朋友可能識得我的日子太淺,唔知道我是包頂頸,搵我開解,一定會比我窒多二錢重。

  我話我朋友是傻佬一名,冇事搵事做,佢個仔明知老豆有幾十億身家,就算肯住足七日,都是睇錢份上,氹吓老豆開心,根本領會唔到基層苦況,更加與少年不知愁滋味無關,我心裡想,倘若到了那個地步,他一樣會適應,那個清朝大貪官和珅,什麼美酒未嚐過,有一日,突然要嚐勞苦大眾所飲的二窩頭,當然唔入得口,後來因貪被判死刑,行刑前的晚餐有小瓶二窩頭,和珅當時認為是人間美酒,唔同時間,有唔同演繹,我同我朋友講,唔好要年輕人玩這些遊戲,佢哋唔適應,話佢哋少年不知愁滋味,佢哋適應,又話佢哋冇大志,老實說,不知愁滋味好過冇大志。

  我朋友的資產來源是投資房地產,投資以來,失敗的次數很少,甚至可以說從未失敗,佢同我講,好想知道失敗的人心情是如何,我話千祈唔好咁折墮,賺錢有什麼不好,賺到錢又可以幫助別人,點解要嘗試失敗滋味,要知道,花無百日紅,當他日樓價下跌,個人財務出現危機時,就會懷念過去風光的日子,一切隨緣,何必強求做一個失敗的人,我朋友當然唔敢講嘢。

 
我要回應
我的稱呼
回應 / 意見
驗証文字
 
回應 / 留言規則
  1. 禁止撰寫粗言穢語、誹謗、渲染色情暴力或人身攻擊的言論;
  2. 禁止以名稱/暱稱/綽號/同音字等批評或映射任何人士、機構、公司;
  3. 禁止發佈有關招聘、推銷、廣告等內容;
  4. 禁止公開任何個人資料(如電話號碼、電郵地址、即時通訊帳號等)。

敬請留言者自律。本網站保留刪除/堵截任何留言的權利。

會員登入
登入ID 或 網名 <