樓價高企，如何賭一鋪

　　有老友請我食飯，講明佢個仔有嘢想請教我，老實說，這餐飯，不食也罷，不過，我又好奇心大，想知道老友個仔想問我什麼。去到飯店，茶都未飲，老友個仔就話佢買了一個遠期樓花的細價樓，問我意見，我同老友講，你知我性格，既然米已成炊，唔好我都話好，老友尷尬的話，佢個仔見樓價高企，以博一鋪心態買遠期樓花，又過得壓力測試，首期只需付5%，供款當儲錢，就算樓價下跌，用作自住就沒有所謂，本來我就冇嘢好講，但佢話賭一鋪，挑起我條賭仔根，要賭，就唔好盲目咁睹，都要計吓數。

　　買遠期樓花並不是買入資產，而是買入債項，當收樓時，利息早已回升，已經享受不到低息的好處，實在不化算，如果要賭一鋪，就要賭樓價下跌，不如將所有應付款項，包括5%首期，印花稅，每月供款，全部都交給老豆，三年之後，如果樓價下跌，而細價樓回調兩三成，估計金管局會放寬按揭，那時候，可以慢慢揀一些細價樓優質樓盤，已儲起的款項隨時可以夠付一個比較像樣的細價樓首期，不過，有機會輸，樓市有機會升，就算輸，仍然有本錢，沒有欠債，並不是全輸。

　　但如果買樓花之後樓價下跌，不但首期盡失，而每個月的供款亦被蠶食，最慘就是還未有樓可用，除供款外還要付租金，辛苦之處實不足為外人道，到收樓的時候，如果樓價明顯下跌，銀行可能要求更多首期，估計，屆時有不少人被迫放棄物業，不過，他們並不是話放棄就放棄，因為他們一定要用私人名義購買，可能要加上父母擔保才可以做樓花按揭，他們被迫持有該物業，就算銀行不用他們多付首期，都會加利息，已買樓的人就百上加斤。所以，如果以賭仔心態決定是否現在買遠期樓花，就應小心衡量輸贏結果，他們會發覺，現在按金不動就是最好策略，即使輸，但仍有小小本錢，兼沒有欠債，還有翻身機會。