地產博客 > 文亮言 返回
瀏覽人次:42540    回應:56
文亮言
葉冠霖唔敢問施永青,我敢
 
湯文亮博士
紀惠集團行政總裁
2015年9月18日

  我坐車返工時聽到施永青上千禧年代,立刻聚精會神,因為我想知道老施怎樣解讀陳茂波的樓價指數或受特殊成交價影響,以及新樓與二手樓同價的理據何在,我亦曾經上過千禧年代接受訪問,知道葉冠霖乃年輕一代名嘴,準備功夫做得非常好,上述兩條問題一定不會失拖,於是叫司機慢慢駛,但很可惜,聽完整個訪問,兩條問題影都唔見,只給予老施機會質疑政府有沒有能力在未來三至四年間提供八萬三個單位,如果唔能夠,樓價就會繼續飆升,老施並且講了一句話我真的不明白,他說,全世界講樓宇供應都是講過去,冇人講未來,如果這是真的話,董建華的八萬五就不會成為樓市大冧殺手,星架坡政府早已公佈在2030年會填多少公頃土地,興建多少組屋,將星架坡變成一個700萬人城市,這應該是講未來。

  我覺得葉冠霖唔敢問,可能末日博士提醒佢,當日他質疑樓價指數準確性,搞到一身蟻,葉冠霖大好前途,多一事不如少一事,俾機會老施反客為主砌政府,橫竪香港政府咁弱雞,陳茂波都算大膽,但最多都是講樓價指數,可見得老施的江湖地位的確高,如果葉冠霖唔敢問,不如叫老施到我在明報的會客室,明報班友,個個都膽生毛,冇有怕。

  當大家認為老施砌政府,我反而覺得老施是企在政府的一方,今次用的是激將法,現在全世界都知道CY,陳茂波等許下承諾,未來三至四年興建八萬三個單位,波哥更增加難度,話有機會增建多11,500個,老實說,老施如果唔搞大件事,我們的政府九成九做唔到,到時候問CY,答案可能與董建華答八萬五一樣,八萬三,已經冇咗啦,但老施釘死政府,唔到陳茂波等唔做嘢,我相信,八萬三一定可以做得到,大家千祈唔好掉以輕心,以為政府一定做唔到,樓價一定飆升,而地產商就信到十足,所以,他們以二手樓的樓價賣樓花,什麼叫做春江水暖鴨先知,大家應該明白。

 
 
我要回應
我的稱呼
回應 / 意見