地產博客 > 文亮言 返回
瀏覽人次:34445    回應:22
文亮言
准買唔准賣,結果是紙上富貴
 
湯文亮博士
紀惠集團行政總裁
2015年8月20日

  有很多人,不知道他們有沒有打算買樓,見到面都話給我害死,二月份聽我講唔買樓,現在樓價愈來愈貴,又話信錯我,早知信林一鳴,只要我答一句,他們便收聲,我對他們說,就算在二月份他們買了樓,到現在升幅有6%,但這又如何,又唔能賣走,只不過是紙上富貴,但未來兩年半內,若果樓價下跌而遭受損失,連講走避不及都唔得,因為唔走得,所以,在近半年內買了二手細價樓的人以為賺了錢,其實是紙上富貴,還未買樓的人反而會是未來的勝利者兼白武士,所以,千祈唔好鬧我住,大家先睇多三個月再說。

  如果沒有SSD,我可以說已經輸了,但有了SSD,我還有機會反敗為勝,大家認為我為了自己,一定不會希望政府撤銷SSD,其實,我是非常讚成政府撤銷SSD,不過並不是現在,而是大約一年前,當時我亦有撰文說這是撤銷SSD的最佳時間,如果唔撤,以後都唔需要考慮,其實,現在並不是沒有供應,只不過有大量供應被SSD鎖死,就算政府唔撤銷,亦會陸陸續續到期,供應亦會增加,如果撤招,供應會立刻大幅增加,樓價就會急速下跌,我的三個月之約立刻贏了,不過,在近半年內買樓的人就慘了,所以,他們應該唔希望政府撤招,紙上富貴好過立刻輸錢。

  不過,還有人比他們更加不希望政府撤招,就是現在準備售樓的地產商,在未來兩年,都唔知有幾多個新樓單位供應,現在地產商售樓口號是「與同區二手樓同價」 ,倘若撤銷SSD,樓價急速下跌,現時口號就叫唔響,政府官員亦相當了解,現在撤銷SSD是一個一勝二負遊戲,勝利者反而會是政府銳意打擊的炒家,受損的是最近買了樓的用家及地產商,不過這不是政府不會撤銷SSD理由,我認為冇膽才是,連限奶令都唔敢撤,講什麼SSD。