恒生指數收報25389點，跌395點，成交988.7億，單是騰訊（00700）一隻股票已經推低指數110點。昨天恒指跌幾百點完全係因為騰訊俾官媒鬧兩句，但你相唔相信騰訊就此一沉不起？目前股價跌番去6月頭嘅水平，俾人有機會追番錯失咗嘅入市機會。除非你認為有機會冧市，否則要買就趁手。
股票如果可以穩定派息或者穩定增長，係可以做到股價斜線穩步上升，騰訊同領展（00823）就係呢啲。穩定派息容易睇到，穩定增長好多時候要事後先知。騰訊增長次次都可以交到功課，但係基數愈嚟愈大，遲早有日增長放緩，到時就要靠派息或回購支持股價。騰訊市值只有蘋果嘅一半，後者嘅市場已經係全世界，騰訊仲有待進軍全球。除非官媒繼續攻擊手遊荼毒少年，否則呢個增長故事仲未有耐停。
股票都可以斜線上升，冇理由樓價一定要上上落落，唔可以斜線向上。股票收息要除淨，買樓收租冇除淨呢回事，價息兼收。股價要上升，一定要靠盈利上升，永遠唔賺錢嘅公司冇可能股價持續上升，遲早有回落嘅一日。你唔使諗計幫層樓賺錢，只要銀紙保持貶值，你層樓自己就識升，無論你買得幾貴，時間一定企喺你嗰邊幫你，只係長定短嘅問題。樓係升得慢過股票，但股票會買錯，又要識落車，兼且冇自用價值，除非你用嚟貼牆紙；樓可以自用，10年唔升都起碼住足10年。在香港，平常百姓缺乏保存財富嘅工具，唔係買股票就買樓。香港嘅股票咁凶險，藍籌股都可以被沽空機構狙擊，大價股都唔一定穩陣，有乜辦法唔係一窩蜂走晒去買樓？
未來港股同A股會背馳，A股愈嚟愈多人買，港股愈嚟愈縮，因為港股買得過嘅已經買晒，A股就剛剛開始逼人買。內地房地產同香港房地產亦都背馳，因為內地房地產嘅泡沫厚過香港，香港樓價貴得嚟都比內地扎實。香港嘅樓價以收入中位數嚟計係全球第一，不吃不喝要儲18年先可以買樓。但係同類計算並未包括「北上廣深」四大名城。用同樣嘅計算方法，四大名城
嘅市民要幾多年不吃不喝嘅生活先可以買到樓？40年！辛苦過香港！中國作為世界第二大經濟體，香港身為國家主要城市之一，樓價係最「宜人」嘅地方，冇空置社區，冇爛尾樓，兼且係住得人，空氣、食物、交通都適合居住；加上移民政策極之寬鬆，幾乎任何內地人有心要嚟香港居住，總有辦法成功，試問樓價又點會唔升？政府辣招其實係有效，如果冇辣招，我肯定香港人過去幾年更冇能力買樓。
記住，全世界政府只會防止樓價下跌，你見政府出招㩒住樓價上升，只係因為驚升得太快將來會爆煲暴跌。新加坡樓市跌足15季，從2013年高位下跌12%。4年跌12%，濕濕碎，都已經要減釐印，希望扭轉市場氣氛。
對股市，政府可能任你輸；對樓市，政府從來都係積極干預。近期股票嚇怕咁多人，又會趕一批人入市買樓。
App下載
