http://hk.on.cc/hk/bkn/cnt/finance/20160722/bkn-20160722183851180-0722_00842_001.html
【on.cc東網專訊】 呢排業主轉強勢，唔好話議價，唔反你價已經偷笑喇。有網民嬲爆爆，喺討論區開帖話：「第三次睇樓諗住減少少或原價即買，今日竟然要加20萬，我話考慮幾日，佢夠膽死話到時未必係依個價，你班業主不如去搶啦！」發帖者睇吓問吓，真係「越問越傷心」，最後搞到樓都買唔到。
買唔到呢間，咪睇過第二間囉，話晒自由經濟市場，買賣都係你情我願啫！有網民就覺得呢個係發帖者嘅問題：「三月大把盤睇，又冇人爭出價，你唔買，等，幾時都要代價！」咁嗰時人人都覺得樓市仲有得跌架嘛，唔買都好平常。有網民再踩多腳：「時間永遠是未上車的朋友的敵人，時間愈耐，愈不利！」唉，有早知就冇乞兒啦！最好喺2003年買樓，然後細樓換大樓，大樓換house啦，係咪？
留意番個重點，發帖者明明已經「第三次睇樓」，應該係有心想買，業主做乜趕客咁款？有網民都忍唔住問句：「你做咗啲乜？」因為「唔開票睇三次，同開咗票睇三次唔一樣，佢其實想『送客』。」今時今日，帶票睇樓是常識吧！不過真正原因可能係「你睇成3次，露晒底知你想買，梗係反你價啦！」其實都好正常，邊個賣樓唔賣到盡啊，呢位網民就中晒point，「你可以叫業主減價，業主唔可以加價？咁有趣嘅你。」係喎，只可減價，不可加價，發帖者你咪必贏？有業主更哭訴：「我覺得有啲買家先食錯藥，正常市價放盤(600萬元以下)夠膽死一劈劈一百萬！」
睇番成件事，食錯藥嗰個，其實未必係業主，咁係邊個呢？有網民仲要抽水：「你係咪冇去接機？」唉，真係冇眼睇，發帖者惟有繼續等吓啦！
原文出處在此：
依家D 業主係唔係食錯藥呀
http://finance.discuss.com.hk/viewthread.php?tid=25957107&utm_campaign=discussedm_2016-07-21&utm_source=regular&utm_medium=hottopic
依家D 業主係唔係食錯藥呀 
依家D 業主係唔係食錯藥呀 【暫時話題嘢嚟230個留言】
[隱藏]
第3 次睇樓諗住減小小或原價即買,今日竟然要加20萬,.我話考慮幾日
佢夠膽死話到時未必係依個價
你班業主不如去搶啦
[ 本帖最後由 henry12345 於 2016-7-20 09:24 PM 編輯 ]
http://hk.on.cc/hk/bkn/cnt/finance/20160722/bkn-20160722203408796-0722_00842_001.html
樓市勁哥金榜：向準買家道歉大賽【有片】
【on.cc東網專訊】 歡迎收睇第一屆向「準買家」道歉大賽！最近樓市進入瘋狂狀態，就算班業主吊高嚟賣，啲買家都照衝入市，可惜未必買到心頭好！就等勁哥帶你哋，向班失落嘅買家逐一道歉！今個星期樓市勁哥金榜：道歉大賽！
----------
第3位 維景灣畔放盤試水溫
將軍澳維景灣畔有個低層單位業主放盤試水溫，當撩起買家嘅興趣嗰時，佢就話：「對唔住，我志在見吓票㗎咋，出到580萬元都唔賣㗎」嘩！咁算唔算欺騙人感情？似乎呢個準買家，同一心諗住睇娜姐喺fb直播，率先玩港版Pokémon go嘅網民一樣都好想講句：你呃人！
----------
第2位 新達業主有票即潛水
大埔嘅天空很藍，新達廣場更加有罕有睇到吐露港海景嘅高層單位放盤，有買家連樓都唔睇，就嗱嗱聲開票...不過最後都買唔到，對呢位準買家，我只能夠講：我很抱歉！
鬼叫個業主一聽到代理「有票在手」就即刻「潛水」咩，唔通好似洪卓立咁，由彌敦道行到陰陽路！？
嚇鬼咩！原來只係電話冇電啫～個業主幾日後就自動打番畀代理話要加價，睇嚟下次買樓畀票嗰陣，要畀埋個尿袋業主先得，但千祈唔好用人口普查員嗰款囉...
----------
第1位 好運買家連夜接機簽約
4年前就話做茶記係一生一世，服務市民嘅承諾；4年後就話賣盤乜乜乜！所以呢，口講無憑，身體最誠實！
好似沙田好運中心榆林閣兩房單位嘅買家咁，明明業主講好旅行完返嚟就成交，但個買家都驚被人截胡，三更半夜同代理去機場接業主機交票簽約...最終用高於市價嘅418萬成功買到心水盤！睇嚟佢心急嘅程度，同書展想買雞排妹本寫真集位人兄有得fight，可惜佢排咗7粒鐘都買唔到，真係好對唔住喇！
App下載
