地產博客 > 資深會員專欄 返回
瀏覽人次:40068    回應:38
資深會員專欄

專業機構投資者(九)政經

 

珍惜香港

法團專業投資者
SMIEEE.MSc(ICDE)
http://facebook.com/hongkongtruevalue/
2017年2月14日
大家或者唔為意,我將《選戰(一)出陣》一文嘅標題改咗,歸番入「專業機構投資者」系列裡面。講真,搞個新系列,閒閒地要寫三五篇,諗到要响兩個月內,出咁多篇文章,啲懶氣就喺咁飄出嚟,結果都喺放棄寫「選戰」系列呢個念頭,改番做平時用開嘅標題好啲。

各位對今次特首選戰嘅討論,似乎唔太踴躍,尤其註冊回應,都只喺得果幾位。我唔介意自己唔夠號召力,但後嚟湯博士一連出咗十二篇,啲反應都喺咁上下,坦白講,都幾失望。有朋友話,邊個做下屆特首都喺咁樣,大家要咁諗嘅,就難怪反應咁冷淡啦!其實,唔同人做特首,結果又點會冇分別?莫講話完全唔一樣,簡直就喺天淵之別。一個特首嘅理念、風格、行為,都會直接影響每一個香港人嘅命運。

特佬嘅真面目

就睇美國大選,特朗普定希拉里勝出,已經喺兩個唔同嘅世界。特佬上場果堆大動作,退出 TPP推本土製造逼車廠返美國生產重推輸油管工程勒令起邊境圍牆禁止七國公民入境,之類之類,簡直喺翻天覆地。佢又展示自己嘅強勢統治,將批評佢禁令嘅署理司法部長革職,更警告會扣起「庇護城市」嘅撥款;自己要起圍牆,就搵 MEXICO 埋單,唔喺就徵人地重稅。對中、日三大經濟龍頭,當然亦唔少得嚟個下馬威,連轟佢地操縱貨幣啦!咦?操縱貨幣呢家嘢,乜唔喺美國認第二,冇人敢認第一咩?乜乜 QE、乜乜扭曲操作,扮唔記得?

其實,特佬喺乜嘢人,唔難睇穿。生意人我見得多,呢一種,可謂至 CHEAP 果隻。攞人貨唔想找數,就拖你幾條街,跟手話你啲貨 QUALITY 唔得,聲大夾惡要告你呢樣果樣,最後扮哂好人放你一馬,同你傾五折找數。好似 TPP 呢種對等式圓桌會議,一於 BAN 哂佢,再逐個關門慢慢傾,唔喺點攞到你盡。同佢打工嘅,佢要裁你,就求其搵啲嘢出齊三封警告信,有殺冇賠,到炒你果日再出埋律師信,連最後個月都要你白做。佢真喺當成個美國,喺佢自己間公司,家陣搞到內憂外患,唔知佢點收科。

對付呢種人,一啲都唔難,當佢透明就得。同佢做生意,可免則免,個 OFFER 幾好都喺假,最後總要你賠突。一定要做嘅,都要同佢保持距離,FULL PAY IN ADVANCE 至開工,唔使俾面,你同佢熟,即喺找死;俾佢睇穿你冇得揀,咁你就可以死得。特佬上場,邊個國家最大鑊?好易睇啫,最熱情款待果件囉!果個國家,嚟緊呢幾年,唔使旨意有運行。MEXICO 就夠醒啦,即時取消會面,反正俾面你都唔會有數。阿爺仲勁,大家咁高咁大,使乜睇你台戲?你吹下水,我就 TAKE ACTION,等你吹得咁過癮?最後咪死地氣,乖乖地打番電話過嚟!你唔玩 TPP,人地就埋阿爺堆,喺日本先至咁低聲下氣,點解?對住中國人,就講民族尊嚴,對住美國佬,咪扒地膜拜囉!

未來幾年嘅展望

芳間嘅評論,以及呢度好多朋友、網友,對 2017 年嘅展望,普遍唔敢太樂觀。大家都著眼於特佬為市場帶嚟嘅不確定性,以及美國加息,對資產價格嘅潛在壓力。有評論甚至認為,十年一遇嘅 7 尾年份,可以準備彈藥撈底添。其實,任何一個年頭,對果年嘅展望,都喺咁不確定啦!未來,從來都喺預測唔到,正如 2015 年,中港股市大跌,都唔喺 7 尾;2016 年英國公投脫歐,又有幾多人估到?對於依賴「預期」去作出決策嘅投機者,年年都喺咁嚴峻,今年,又有何分別?

我就話特佬上場,最大嘅贏家,將會喺中國,而香港,更喺非常利好。不過利好,都唔代表唔嚴峻嘅,同美國有瓜葛嘅企業,就真喺要醒定啲,打起貿易戰上嚟,可以好大劑,就算只喺出下口術,都嚇餐死。我奉勸各位生意人,反正美國佬啲 TERMS,從來都喺咁難頂,喺時候要 DIVERSIFY 下啲生意啦!剔除呢方面,2017 以及打後幾年,香港會形勢大好,尤其响金融方面。至於可以好成點,就要睇邊個特首上場,有能力食得住呢個勢。

環球經濟嘅轉捩點

記得舊年年頭嘅祝願裡面,我話過,2016 年嘅投資環境,會非常嚴峻。作為長線投資者,我講嘅「嚴峻」,同投機者講果種,喺截然不同。你地追溯一下當中嘅連結,就會發現,早响美國加息當日,我已經寫出咗相同嘅展望,亦提到環球經濟,開始進入另一個階段。當時雖然冇講明,所謂另一個階段,具體上喺乜嘢意思,但其實响美國宣佈加息嘅前一刻,我特意出咗個回應,裡面已經透露咗,進入另一階段嘅轉捩點。呢個轉捩點,就喺美國响環球金融舞台上,喪失領導地位嘅果一刻:2015 年底加息!

各位千祈唔好誤會,以為所謂另一階段,喺指美國開展咗加息週期。我曾多次強調,環球經濟,已經進入一個新常態。其實,環球經濟新常態,根本唔算點「新」,十年低息,亦講唔上喺乜嘢週期,只不過,執著於傳統主流經濟學嘅死硬派,始終唔肯面對呢個現實。所以,佢地會將當中一系列阻礙加息嘅因素,形容為「突發事件」,但如果肯去細心剖析呢堆事件背後嘅因,就唔難發現,喺同新常態嘅因,完全吻合。

簡單而言,環球經濟新常態,已經成為咗「現在嘅基礎因素」,即喺唔會隨便受市場變化影響嘅長期因素。話說响 20152016 嘅年底,我都估美國唔會加息,仲俾人寸我估錯息口走向添。原來真喺有人,對啲估下估下嘅嘢咁認真,難怪呢個世界,咁多投機者。我話美國唔加息,喺基於「現在嘅基礎因素」作推算,但由於呢種因素,屬長期性,所以短期參數有所偏離,一啲都唔出奇。作為長線投資者,唔喺要估中呢啲短期參數,因為我地持貨,由幾年,到幾十年不等,點可以靠估去做投資決策?最重要,喺當見到事物有偏離果陣,睇清楚偏離背後嘅因,呢個就喺所謂嘅,真正去了解市場

兩個年底,美國都喺响冇加息條件之下加息,尤其 2016 年底果次,特佬都未正式上場,前景仲未明朗,加嚟做乜?再睇番兩個「偏離」嘅共通點,都喺環球投機市場,對加息落哂重注;加上聯儲局本身,亦持有大量資產,即喺佢自己,都喺一個投機者。加息,已經唔再喺乜嘢經濟週期嘅問題,而喺變成咗一個被動嘅投機決定,滿足投機市場嘅需要。所以點解我話,美國响金融舞台上,已經喪失咗領導地位,而呢個轉捩點,就正正意味著,環球經濟,開始進入另一階段。

新常態嘅陣痛

吓?又喺另一個階段?即喺乜嘢?簡單講,就喺响新常態嘅基礎上,衍生出嚟嘅一股反作用力。新常態之下,市場走向歸邊,對投機者喺非常不利,因為通過投機上位,會越嚟越困難,甚至近乎冇可能。投機市場對現狀失去耐性,結果積聚強大嘅反作用力,通過押注,迫使聯儲局加息。但呢個都只喺冰山一角,我講嘅投機者,唔單止响金融方面,而喺涵蓋每一階層、每一個體,因為任何個體,都難免有一定程度嘅投機性。個體嘅生活質素,持續優化嘅同時,亦要付出難以上位、難以自決嘅代價。結果,就出現反全球化,同本土嘅勢力;英國脫歐、特佬上場,就正正喺呢股反作用力推動嘅結果。

呢個現象,可以稱之為「環球經濟新常態嘅陣痛」。市場上陸續有聲音,預期黑天鵝出現,甚至渴望黑天鵝嘅降臨,意圖通過洗牌,從持份者手上搶奪資源。呢股歪風,席捲全球,包括我地嘅香港,甚至影響埋時下年青人,令佢地嘅所謂理想,建基於一個輸打贏要嘅心態。早前我寫《遺憾》一文,就喺要分享我對呢方面嘅感受,而唔喺好似某位網友話齋,表達對受攻擊嘅遺憾。佢睇咗我成篇小說咁長嘅文章,就只喺見到裡面嘅一條草,都幾可惜。

或者我可以再交代一下,告別回應箱,只喺順帶,唔喺《遺憾》嘅主旨。告別,亦唔喺因為受到攻擊,只喺「以文深交,不再」。我出文嘅目的,志在分享,但既然時空有限,回應箱又失去咗分享嘅意義,咁告別就喺好自然嘅決定。至於佢提到另一位經常受攻擊嘅網友,我諗,視得論壇為戰場嘅,佢應該唔太介意,甚至樂在其中,更講唔上遺憾啦。其實冇話邊個著,邊個唔著嘅,道不同啫!

息差與加息

回正題,稱之為陣痛呢個階段,為市場帶嚟嘅不確定性,甚至會影響到長線投資者,對「現在嘅基礎因素」,失去信心,而我話「嚴峻」,就喺咁嘅意思。不過對我嚟講,反而更睇清楚宏觀市場嘅真相,冇做出沽貨呢類錯誤決策。環球市場嘅陣痛,令香港成為最穩健嘅投資地,所以有評論認為,美國加息會令資金大量流走,我唔認同。資金喺會流向投資環境最好嘅地方,而所謂投資環境,唔喺單睇息差嘅。

講開息差,記得我有次提到,當市場預期加息果陣,低息現債就會被拋售,導致債價下跌。有人質疑,點解只講低息債,難道高息債唔會被拋售?原因好簡單,加息對債券最直接嘅影響,就喺息差,所以低息債喺首當其衝。但高息債基於回報率高,加息對息差嘅影響就相對輕微,所以受經濟預期影響,大於受息差預期影響。而加息對經濟嘅預期,又眾說紛紜,冇一致嘅睇法,所以高息債價,只會個別發展,跟加息冇一個必然嘅關係。就睇美國响呢兩個年底嘅加息,對我手持嘅高息債,完全冇影響,債價仍然高企。唔單止喺咁,我兩次提及果隻內房債基,2016 年底加息,無阻佢嘅升勢,到依家都仲喺繼續升緊。

香港嘅金融角色

講到債券市場,香港作為中國對外嘅融資窗口,加上未來一帶一路嘅龐大融資需求,我地嘅債市,前景將會非常亮麗。再加上美國响金融舞台上,已經喪失咗領導地位,而特佬「美國優先」嘅封閉政策,真喺落實嘅話,更會令美元加劇喪失國際貨幣呢個寶座,咁到時,聯系匯率,就真喺要脫勾。不過呢個脫勾,唔會好似芳間某啲評論話,喺為咗乜乜樓價高企、乜乜星加坡式金融自決呢啲咁無謂嘅師奶嘢,而喺就人民幣未能全面國際化呢段期間,通過港幣同人民幣建立嘅互聯機制,以港幣暫時充當國際貨幣嘅地位。大家可能會覺得我痴人說夢,不過,真喺發生嘅話,到時邊個有能力領導香港?林鄭?定喺林鄭旗下嘅任志剛?

歸邊》一文裡面,我提到尾班車事件,就喺要帶出,金融制度嘅優化,唔喺要阻人發達,而喺優化香港嘅投資環境,吸引嘅,喺長線投資者,唔喺果啲想嚟撈一筆嘅大鱷。你監管制度完善,金融體系穩定,可預期性高,咁就算外面加息,資金亦唔會隨便流走。CY 講到金融,開口埋口,就話要「服務」祖國,祖國使鬼你「服務」?香港喺絕對有條件,擔當前線嘅角色,「協助」同「貢獻」國家嘅金融大業,唔喺好被動咁「服務」人地。咁嘅理念,難怪 HEAD 唔住旗下嘅財金機構,搞到要另起爐灶,整個金發局出嚟,一開始就已經喺錯。

金發局對選舉嘅啟示

金發局成立果陣,講到明喺獨立運作,自給自足,即喺唔使政府支援啦!咁又喺,另起嘅爐灶,使乜要支援?不過最近,林鄭同葉劉一唱一和,竟然話金發局支援不足;葉劉我都算佢,但林鄭又唔通失咗憶?我諗鬍鬚曾嘅回應,已經好俾面,俾著我,就會好直接咁答:「其實金發局,早就應該要 DELETE」!話說舊年三月底,證監金管局分別發出咗通告同指引,之後香港嘅投資市場,正式分家,同時穩定咗債劵同基金兩個市場。呢單尾班車事件,發生之後半年,金發局就建議,要中港嘅散戶,齊齊玩債劵喎!當時,我真喺 O 哂咀。

果班人嘅理念,响基礎上已經好有問題。鬼唔知香港嘅債劵市場,有巨大發展潛力咩!但喺個遊戲,唔喺咁玩。我地要重質,唔喺盲煲大個量。債劵市場,應該要優化同專業投資者嘅關係,而對於散戶,就應該通過優化基金,作為投資債劵嘅橋樑,方為正道。點可以為咗做大佢,就亂咁嚟?林鄭批金發局支援不足,喺自暴其短,咁嘅料,點請得郁任志剛?不過,睇咗任志剛公開讚林鄭嘅講話,加埋為佢拍果段片,我終於明白點解。記得當年任總撐唐英年,真喺勞心勞力,相比今日,完全喺兩個截然不同嘅景象。今次,我對呢位堪稱金融界嘅沙皇,都幾失望,你撐邊個,唔喺問題,但你交行貨,都唔該做得似樣啲。

吉祥物與龍頭

我真喺想問下林鄭,究竟點解要參選?臨危受命,即喺唔喺妳自己嘅意思,喺人地叫妳做。鬍鬚曾喺由一個施政理念為基礎,推動佢參選特首嘅決定,所以佢嘅思維,非常清晰,而領導能力,就自然生成;但妳就調轉咗,喺因為要做特首,先至去尋覓一個施政理念,去迎合呢個決定。兩者,喺天淵之別,所以剔除所謂「中方」支持嘅話,妳喺輸鬍鬚曾九條街,但絕對唔喺因為起步遲,而喺因果錯配。妳得到嘅支持,同一切粉飾,都喺人地為妳安排,彷彿妳就喺選舉嘅一件吉祥物。咁妳嘅領導能力,從何而來?任志剛,喺好難 HEAD 得住,如果佢又喺人地安排俾妳,塞去妳旗下,妳點 HEAD 住佢?妳咁「打得」,唔通到時又另起爐灶,搞個乜發局出嚟,夾硬要佢支援?

我果然冇睇錯,今日成個選舉形勢,已經俾鬍鬚曾呢個龍頭 LEAD 住,而其他三個參選人,都喺被牽住走。佢每一步嘅 TIMING,SET 得非常準確,一舉一動,取消 TSA丁居屋混合發展網上眾籌負入息稅同累進利得稅政改及廿三條立法,都成為熱話。讚定彈,唔重要,問題喺有冇人議論。佢嘅政綱,就好似一份施政報告咁,成為公眾焦點,連其他三位參選人,甚至 CY,都不自覺做咗佢跟班,要作出認真嘅回應。

至於葉劉,我都話佢太早出政綱,冇人關心,冇人談論,就連內容喺乜都冇人記得。依家再更新政綱,由「贏返香港」,改成「凝聚共識、促進和諧」;改寫主題,已經喺大忌,仲要抄鬍鬚曾嘅理念,唔知會唔會又俾人當透明?而林鄭個造勢大會,成個俾面派對咁,呢樣都算,八大願景唔見咗,主題變成修補撕裂,求再次團結,又喺抄鬍鬚曾理念,連個口號「同行」,唔知佢自己知唔知,都喺抄鬍鬚曾嘅「有你同行」。尋日只喺公布部分政綱,唔通因為入硬閘,冇必要出哂成份政綱?定喺佢根本冇心參選?連公布果部份,都喺九成抄,就算交行貨,可唔可以認真啲?

今次特首選舉,論實力,真喺懸殊得唔尋常。FACEBOOK 喺公開網站,好難造馬,林鄭果邊,個個 POST 都上萬個嬲嬲,有網友話,喺 MULTI-ACCOUNT 玩抹黑喎!FINE!我就當你啱,咁鬍鬚曾果邊呢?唔喺淨喺廢青先至識得用 FACEBOOK 嘛!再者,人地連廿三條都出埋,响樹仁又撞到正示威,到今日我睇哂佢成個 FACEBOOK PAGE,半隻嬲嬲都搵唔到,就算有持唔同意見嘅網民,都喺好理性同包容咁回應,呢樣又點解釋?我諗,佢成功搞得掂廿三條,你都咪話冇可能。

我喺阿爺嘅話,一定等佢儲夠人氣,最後一刻嚟一個眾望所歸。但就算真喺咁發生嘅話,事前,大家都唔會知,因為鬍鬚曾,真喺可以做到滴風不漏,唔似得 CY,連唔使講果句都講埋。呢啲就喺叫做「誠信」,阿爺至 LIKE。

新常態嘅第三階段

姑勿論有冇乜嘢,造王之類嘅陰謀論响背後,我想問各位,重要咩?環球經濟新常態嘅陣痛,已經影響到香港每一個階層,各參選人之中,只有鬍鬚曾有機會扭轉呢個局勢,期間,佢亦證明咗俾香港人睇,佢有呢方面嘅能力。

今日,我已經可以預言,新常態嘅第三階段,會喺啲乜嘢。唔好以為,我講果種反作用力,會足以推倒成個新常態,點解?不如我反問大家,唔用手機,得唔得?取消最低工資,得唔得?將公屋改建番做多戶一廁,得唔得?個體喺唔會為咗滿足自己嘅投機性,而犧牲寶貴嘅生活質素,去選擇一個倒退,皆因代價太大。再者,投機,一定贏架?到最終,都喺要面對現實,接受新常態,接受歸邊,呢個就喺所謂嘅第三階段。

陣痛,可以維持幾年,至十幾年,甚至更長,亦因地區而異。又記得一位網友話,香港人,似乎走在世界嘅前列,鬍鬚曾以四個「優質」做願景,以提升競爭力為大前提,就正正喺面對現實,配合新常態,配合歸邊,朝住第三階段走嘅大方向。而佢亦喺唯一嘅參選人,可以將願景配合到具體政綱。香港,喺絕對有先天優勢,成為全球首個步入新常態第三階段嘅地區。或者你會問,講,就個個都天下無敵,憑乜嘢信佢?咁我不如又再反問,唔信佢,可以信邊個?唔通喺,連理念都未搞清楚嘅林鄭?

政經

政治、經濟,從來都喺息息相關;關心樓市、關心投資嘅,就更加要關心呢個選舉,更加要踴躍表態。唔知各位仲記唔記得,兩年半前我响呢度,呼籲大家簽名反佔中嘅往事?湯博士亦跟手出咗九十篇「反佔中」系列,果陣大家嘅反應,非常熱烈,當時嘅景象,記憶猶新。相比今日,只能慨嘆一句:俱往矣!

但佔中,都只喺幾個月,特首選舉嘅結果,就影響香港成五年咁長,試問人生,有幾多個五年?難得一個公開平台,俾各位表態,就算意見唔一致,都叫做參與過,努力過。當然,大家亦可以選擇買定花生,食住等睇戲,不過到時千祈唔好埋怨,點解自己會變成戲中嘅主角。姑勿論個結果會點,最終承受嘅,都喺香港人自己。

記得當年,我批 CY,會為香港帶嚟橫運,批消極施政,會令社會撕裂,結果中哂。上屆特首選舉,山長水遠走去投白票嘅香港人,我寸足佢地五年。

最重要喺無悔

適逢今日情人節,我就响度祝福大家,情人節快樂啦!

送各位一首歌,應下節。其實,就算喺身邊嘅人,都未必可以完全理解,何況喺政治家?我唔排除會信錯人,但我亦唔介意,起碼我同自己做咗交代,咁你呢?呢首歌,咁啱喺由兩位女歌手合唱,即喺如果鬍鬚曾,真喺當選嘅話,就最適合送俾林鄭同葉劉,至於個 HIM 喺乜水,自己體會啦!

信錯人,唔緊要,最重要喺,無悔!

Elaine & Barbara:I Know Him So Well
 
 
我要回應
我的稱呼
回應 / 意見
驗証文字
 
會員登入
登入ID 或 網名
密碼
1. Sugar 2017-02-14 20:58:26

sofa ^^

珍兄 V day 出文認真 " 靠害 " >.<

2. CD ROM 2017-02-14 21:00:44
先拿下沙發~
3. Sugar 2017-02-14 21:03:09

CD San ,

係咁先 ! 承讓 ^^

4. 打工仔 Andy 2017-02-14 21:19:37
沙發 ! 
5. 人材 2017-02-14 21:36:32

一個中央不支持的特首,香港想有運行都幾難。到時真係要好好珍惜香港!

沒有一個領袖樣樣精,最重要是識用人,林鄭就算不懂金融又如何,有任志剛。

6. 歷史長河 2017-02-14 21:53:20
伸一伸
不在筆挺的老腰
摸一摸
頭上逐漸稀疏的毛
忽然
發現我們真的在變老

幾十年的歲月有幾長?
回頭看
隔著一個羅湖橋

幾十年的歲月有幾短?
低頭看
孩子滿地跑

爬過山的人
知道山有多高
趟過河的人
知道河水有波濤

跌跌撞撞
走到今天
有你 真好

來到本壇聊天
都是前世有邀
沒有緣分
靈魂怎能在
一個鍋里煎熬

這個世界真大
遇見便是奇蹟
愛護壇里的
花花草草
珍惜壇里的
片片情意


這個年齡
活著真好
沒有辜負陽光
沒有辜負父老
不給兒女添累
活出自己的驕傲

7. 肥婆四 2017-02-14 22:04:40
一口氣睇完珍兄水蛇春咁嘅長文,千頭萬緒緒!唔識回應,都唔知你指出形勢,還是形勢依你的見解運行。
8. 打工仔 Andy 2017-02-14 22:09:22
珍兄文章直頭係一編論文! 要回應絶不容易, 哈哈!

先講特首, 講真真係邊個做都差不多, 不是話後選人個個一樣, 而係垃圾會都係一樣玩野, 玩拉布, 死得.

老特, 我覺得老特總有一日會搞出堝來. 等睇戲! 

加息, 一年加一,二次囉, 要預左要有準備咪0k囉! 


9. 好 2017-02-14 23:24:18
簡直是一本書。
10. yyfan 2017-02-15 11:19:00
多謝真兄好文

上星期去咗美國幾日,surprisingly班美國生意佬冇人認為老特會同中國過唔去,應該得個講字,而美國媒體日日夜夜攻擊老特,老特又每日都有新嘢比人話,咁落去唔知可以撐得幾耐
11. MMC 2017-02-15 17:54:30
好文!但要花時間一看再看,感謝!
12. 元朗人 2017-02-16 07:47:01
6/F 長河兄

深有同感,但是你還年輕而有此領會,佩服。

在下把這裡看作娛樂區,寫東西也是即興,不過仍很珍惜。互勉之。
13. Sara 2017-02-16 12:13:58

長河兄

終於看到你發言。借地請問下對於悉尼房地產未來三年如何看,如果可以的話請分別評論下公寓和house市場?我預計明年初移民當地,即刻買樓花,到阜後再買,甚至先租後買都是選項。筆直未大到可以直接購買,恐怕要放一層港樓先,請指教!

14. 風 2017-02-16 13:25:53

珍港兄 久仰大名 終於揾到你出既文 果然眼光獨到 小弟佩服

但5/F又唔係冇道理 班非建制派邊個上場都會玩野 呢個係根本就係佢地選入立法會既目的(eg 梁游宣誓, 長毛毓民"政績") 試問就算鬍鬚曾真係選到 你憑咩覺得佢可以真係團結到社會解決到而家政策有立法會阻住推唔到既問題?

小弟年少無知 任總支持林鄭 聽聞只係因為同鬍鬚曾有牙齒印 事實係點應該冇人會知 但如果因為私人恩怨將一個城市未來5年既前途斷送出去 我會對佢好失望 況且 任總唔幫鬍鬚曾 都大把有能之士會幫佢啦WHO CARES

雖然遲左D 但都祝珍港兄情人節快樂
PS 我都中意睇火影

15. 大寶王 2017-02-16 21:54:43
支持珍港兄
17. 大寶王 2017-02-16 21:54:44
支持珍港兄
18. AC 2017-02-17 14:36:56

Maybe "Tsang" is much better at economic/financial development strategies.

But we need someone more tough to resolve the anti-govt. atmosphere before any great plan can be implemented.

So, at this moment, we need "Lam" more.

19. 向珍港前輩致敬 2017-02-17 15:33:55

有緣拜讀珍港前輩無私的分享,實在是晚輩的榮幸。

實在希望(真正的)中央願意如前輩大名那樣「珍惜香港」,讓真正可以帶領香港前行的人選成為我城的首長。只可惜按照現在的趨勢,恐怕不少香港人也要失望了。

晚輩才疏學淺、言詞拙劣,不敢多言了。現狗尾續貂,附上"I know Him so well"的中文歌詞版,向珍港前輩致敬。如有冒犯,多多見諒。

周慧敏 (Vivian Chow) & 關淑怡 (Shirley Kwan) - 男人心

https://www.youtube.com/watch?v=8BmpSbOPIW4

20. 八十後 2017-02-18 10:58:04
等到珍惜香港大師的文章,足夠樂上數天。

我真心希望香港在曾俊華的領導下,有更好明天。


21. 東山老爺 2017-02-18 11:21:25
曽俊華癈柴一條,做了差十年財爺,年年都估錯數,應使在改善基建及民生的錢都唔使,年年只系識話明年全球會有完美風暴。他只會hea做特首,連689都不如,香港一定無運行。佢做了特首,香港人會懷念CY。
22. 小小業主 2017-02-19 16:11:49
喜見珍港兄鴻文,又是一篇用力很深的文章,保重身體!

各師兄師姐對今次選舉冷淡可能跟普選票被"偷"有關,起碼在下如是,無奈兼憤怒!

小弟愚見,無論誰是新特首,香港長遠不會太差
23. 小小業主 2017-02-19 16:11:49
喜見珍港兄鴻文,又是一篇用力很深的文章,保重身體!

各師兄師姐對今次選舉冷淡可能跟普選票被"偷"有關,起碼在下如是,無奈兼憤怒!

小弟愚見,無論誰是新特首,香港長遠不會太差
24. Kitty Hello 2017-02-21 09:07:20
飲住朋友送嘅貓屎咖啡,慢慢睇晒珍惜兄文章,特別係關於珍兄對經濟基礎因素嘅睇法,覺得好有共鳴,雖然自己唔係乜嘢英雄,但係真係覺得大家所見略同,好文!

P。S。
從珍兄幾次文章所見,珍兄似乎相當支持鬍鬚曾,小弟認為呢個係極大政治基礎因素上所犯錯誤判斷,我相當有信心,林鄭勝選機會遠遠超過鬍鬚曾,千萬不能如上屆首富一樣站錯隊,搞到要撤資就大檸樂。
25. 平凡人 2017-02-21 11:53:41
曾生連自己任期都計錯,hea @9年半
不係10年,
Timing 
滴水不漏 ?
 天下無敵?

26. 歷史長河 2017-02-22 04:43:45
#13 Sara,

從過去走勢看,悉尼 house 的增值稍高於公寓。有數據顯示,1981年至2013年的32年間,house 增值為862%,公寓增值為781%:

                        House                Apartment
1981              $79,300              $61,500

1991              $172,800            $134,200

2000             $301,600            $244,600

2010             $667,500            $479,500

2013             $763,169            $541,992


這只是一個平均數字,事實上在某些地區house 的增長遠高於公寓 。

從増值角度來看,house 優於公寓,不過從持貨成本來計,house 通常要高於公寓,尤其是land tax 一項。另外 house的租金回報也低於公寓大概1.x%。

亦即係話 house 增長好但現金流弱,公寓增長不如 house 但勝在現金流較強。

另外一個要考慮的因素是自住樓可以豁免 Capital Gain Tax. 所以投資者通常將最貴的一層claim 為自住(自住物業可以不是第一間購入屋業,可以是第N間)。

如果你是移民定居在悉尼,買間house 是一個不錯的選擇,畢竟在香港要億億聲呢!


至於你問點睇悉尼未來三年的樓市,三年對樓市來講實在太短,但上面一組數字,甚至過去百年歷史告訴我們,悉尼樓市大概以每7到10年升一倍的速度在增長。金融危機以來,澳洲的表現在西方國家中也算較為穩健的,目前看不到這種上升趨勢會有明顯轉變。

港樓,能不放則不放,因為再購入成本太高。如果可以,應考慮加按。

希望這些意見能供您參考。
27. Sara 2017-02-22 10:34:05

長河師兄

終於等到您的回復,多謝多謝!

我同意您的看法,自用樓是無論如何也要買的,縱然悉尼已經是世界上第二難負擔樓的地方。雖說自用,也希望可以升值,1-1.5Mbudget您會推薦哪些地區呢?我自己喜歡東區bondi,但這個budget恐怕只夠公寓樓了

28. Links 2017-02-22 13:00:44

Good presentation

Deep and strong

29. 小明 2017-02-26 10:22:29
入閘後,現時每一步更關鍵,錯不得,過猶不及都不宜,祝願天佑香港。
等珍港兄鴻文,會否是決勝篇?
30. 光明頂專訪劉夢熊 2017-03-01 01:43:51
31. 端傳媒:專訪曾俊華 2017-03-02 01:14:29
32. 田北俊 X 曾俊華 2017-03-07 18:48:44
33. 特首選戰賽後檢討 2017-03-13 04:59:41
34. 羅永聰 X 曾俊華 2017-03-16 22:22:03
35. Leooo 2017-03-16 23:25:34
難得珍惜香港和肥佬黎有共同支持的人
究竟肥黎真支持?還是在給薯片先生死亡之吻?
政治複雜難懂,一般人難以想像
36. RTHK:專訪曾俊華 2017-03-18 02:49:15
37. 無奈 2017-03-26 07:47:17
薯片人氣爆燈,記憶中香港歷代政治人物中,無出其右者。

不是公關了得,不是時世使然,是背後的理念。和諧,是香港人,確切的說,中國人共同願望。

24號之夜,香港人的吶喊。

勝負早已寫在牆上,多少港人仍信今天有大奇蹟日。
38. 小明 2017-03-26 12:48:57
今天的天氣陰陰的,繼五年後,又一個令人不爽的一天。
39. Kong Hong 2017-03-26 14:45:23
曾生 一年 hea 足 365 日, 所以有365 票

胡官 21 點, 以為大哂, 但佢唔知大家玩緊 三公

林鄭明知山有虎, 偏向虎山行, 所以係玩緊老虎機, 攞777, 中 jackpot