主頁 搵樓/成交 放盤 數據公佈 地產新聞 地產博客 置業手冊 背景 / 聲明 / 聯絡我們 繁體簡體English
瀏覽人次 : 27665    回應 : 38
資深會員專欄
專業機構投資者(三)致亞視員工的信
 
珍惜香港
專業機構投資者
SMIEEE.MSc(ICDE)
http://facebook.com/hongkongtruevalue/
2016年3月7日
致各位亞視員工:

近年,亞視嘅變遷,令到各位員工,不知何去何從。我同好多香港人一樣,心底裡都支持亞視,對大家能夠為呢間電視台,堅持到今時今日,非常欣賞。不過,正如湯博士話,支持還支持,現實喺,如果每日,要睇兩粒鐘亞視呢,又似乎唔太願意噃!

我諗咗好耐,究竟有乜嘢,比起睇亞視,更有效咁表示,我對各位嘅支持?結果,我寫咗呢封信,希望,以一顆明燈,為大家照出個方向。呢封信,喺唔會寄出,只會 PO 响地產網嘅專欄度,對我嚟講,已經喺最高調。你地見唔見得到,就要隨緣啦!

或者,有人會問,支持亞視,點解要寫俾員工,而唔喺寫俾老闆?乜唔喺應該叫亞視嘅老細,唔好咁孤寒,放多啲水咩?錢,唔喺萬能,但無錢,就萬萬不能嘛!

其實今日,亞視嘅問題,已經唔再响錢度。我相信,你地個老細,响有需要嘅時候,就會放水,不過,只喺應付需要,唔會俾多。

司榮彬嘅角色

首先,我想講下,將呢封信,歸入專業機構投資者系列嘅原因。第一篇,我話,唔好對「專業」呢味嘢,太認真,要建立自己嘅一套「投資理念」,而機構投資,喺一盤生意。第二篇,我就提到,生意人,一定要清楚知道,自己賺嘅錢,點樣嚟,俾嘅成本,去咗邊;而最重要,喺清楚自己,响市場裡面,擔當乜嘢角色。

咁究竟,呢個最新嘅亞視投資者,懷乜嘢理念,喺乜嘢角色?

最近,有朋友話,呢個司榮彬,叫人做埋呢個月,只肯出呢個月糧,又唔俾人地响呢個月內,追番之前嘅欠薪,咁 CHEAP 嘅,做乜鬼人老細?我靜咗一靜,跟住反問對方,司榮彬,喺一個內地人,咁點解,冇香港人,肯擔當呢個角色?家陣,喺邊個 CHEAP 啲?

亞視嘅真正價值

廣義嘅投資,唔一定要為咗錢。買入亞視,喺通過一間,名為「中國文化傳媒」嘅公司。試問,一間冇咗個牌嘅電視台,仲有乜嘢前途?仲有乜嘢盈利能力?買嚟做乜?唔通亞視,就只剩番,好似湯博士話齋,用嚟承托對手嘅價值?

咁,亞視嘅價值,响邊度

我認為,司榮彬買亞視,喺因為睇到亞視嘅價值。亞洲電視,喺香港第一間電視台,俾到香港人,無數集體回憶嘅電視台,佢代表咗,香港六十年嘅傳媒文化,而香港嘅文化,亦喺中國文化嘅一部份,有珍貴嘅歷史價值。「中國文化傳媒」呢個名稱,已經喺最大嘅啟示。

但諷刺嘅喺,香港人,對自己嘅價值,不以為然;反而一個內地人,就好珍惜。

或者,大家可以將司榮彬,睇成一個,中國文化嘅收藏家。佢喺一個內地人,珍惜亞視嘅歷史價值。但要留意,佢對亞視,喺冇歷史責任。所以,佢只能夠用最有限嘅資源,令亞視得以運作到最後一日,可以做嘅,就只得咁多。亞視嘅歷史責任,喺响香港人度,响各位亞視嘅員工度,呢樣嘢,唔好要一個內地人,教你地點做。

睇到呢度,大家應該明白,呢封信嘅對象,點解喺亞視嘅員工,而唔喺亞視嘅老細。

泡沫與螢嘅啟示

幾日前,長河兄一句:在這三月的雨後,就令我諗起《Shirohae 雨後南風》呢首,嚟自火影忍者《六尾發動之章》嘅配曲。唔知有幾多人明白,點解我會,贈呢首曲俾亞視

話說,泡沫(ウタカタ),喺六尾犀犬(ろくび さいけん)嘅人柱力。後來邂逅螢(ホタル),幾經波折之後,決定同螢遠走高飛。可惜到最後一刻,始終逃唔過被追殺嘅命運,臨死前吹出一口泡沫,帶住叫螢繼續生存嘅訊息,幻化成千萬泡沫,最後到達懷著歡欣、盼望,等待緊佢嘅螢手裡。

有啲嘢,喺冇辦法挽回,但既然已經走到呢一步,就好似泡沫咁,最後一口氣,都要為愛自己嘅人,作個交代。亞視距離從頻道消失嘅日子,剩番唔夠一個月。作為亞視嘅員工,當然可以一如既往,重複又重複,播番啲舊嘢,無聲無色,藉藉無名咁,直到最後一日,甚至過埋最後果日,都冇人會注意,冇人會關心,亦冇人會記得。但與其喺咁,點解唔用埋最後呢一口氣,做番啲有意義嘅事?或者,搞一系列告別特輯,臨別之前,向大眾、向世界,展示亞視嘅價值,展示香港人嘅價值。160 個撐到最後嘅員工,响頻道變黑之前一刻,同大家道別,為亞視,為香港,為歷史,作個完滿嘅交代。

死,有輕於鴻毛,重於泰山。

各位亞視嘅員工,你地想名留青史,將自己刻上,香港歷史嘅里程碑上面,定喺選擇,屈屈而終?

香港人嘅迷失.亞視嘅迷失

香港正值多事之秋,好多香港人,感到迷失,開始忘記,自己個價值响邊度。以前,冇錢,就冇書讀,廉租屋,冇電梯兼幾戶一廁,但大家反而會更加努力,肯先去付出,不問成果;買樓,點會計乜嘢唔飲唔食幾多年?當時富有嘅人,喺窮人嘅目標。今日呢?公屋設施比美私樓,十幾年免費教育,消耗幾多社會資源?但年青人,上唔到位,就認定喺社會嘅錯,不惜走歪,支持暴力;而富有嘅人,就成為窮人嘅敵人。

貧富,從來都喺咁懸殊;深層次矛盾,唔喺靠無止境去滿足,就可以解決。正如,再放多幾千萬,或者幾億水,亞視嘅價值,都唔會改變。只要你地,睇穿呢個道理,就會明白,你地老細,究竟諗緊啲乜。

真正嘅亞視投資者

所以,亞視嘅最大投資者,唔喺司榮彬。你地 160 位,先至喺亞視,最大嘅投資者,而你地對亞視嘅投資,唔喺用錢可以衡量。呢段期間,大家可能覺得迷茫,不知何去何從,但我認為,你地喺最幸福嘅一群。全香港,七百幾萬人裡面,就只得你地 160 位,呢個機會,一生人裡面,好難再有下次。而好多時,成功嘅投資,就喺把握一個,千載難逢嘅機會。

我話,一個專業嘅投資者,最重要喺,清楚自己嘅角色。老細,可以換,但你地响亞視嘅角色,喺冇其他人,可以取代;而亞視响香港嘅角色,亦冇其他電視台,可以取代。各位能否成為,一個專業嘅亞視投資者,定只喺,一個失敗嘅投資者,就取決於,你地能否了解自己嘅角色,發揮自己嘅角色。

明燈.答案

响地產網發言,已經有兩年半。有網友批評我,講嘢似是而非,佢地會問:咁即喺點?升定跌?入定喺沽?我只能夠話,我寫嘢,從來俾唔到大家答案,因為我認為,答案,每個人都唔一樣。一顆明燈,比任何具體嘅答案,更重要,更珍貴。

我希望各位,用最後呢一口氣,話俾香港人知,真正嘅價值,究竟喺乜嘢,大家應該珍惜嘅,又喺啲乜嘢。唔好問我,咁即喺點?你地,先至喺專業。

 對香港,充滿感情嘅 .....

珍惜香港

 火影忍者:Shirohae 雨後南風
 
 
我要回應
我的稱呼
回應 / 意見
驗証文字
 
1. Sugar 2016-03-07 23:20:26

Dear 珍惜香港前輩,     

Thank you for your kind words.

ATV will live in every Hongkonger's heart forever~~~


 

2. 小師妹 2016-03-08 00:27:42
珍港兄語重心長,心繫香港,一語道破。
希望迷失了的人可以早日找到正確路向!
感謝用心的指導和分享!
3. 70後小弟 2016-03-08 07:59:00
亞視員工有沒有緣份看到這篇文章,從而被感動,有所覺悟,未知之數也。但是,對怎樣正面積極面逆境,小弟總算上了一課。每個人都會面對逆境,有迷惘的時候,這文章也許可以為大家帶出一個方向,大家好好珍藏。多謝珍兄。
4. 阿戊 2016-03-08 09:26:45
該死又唔肯死, 該執又唔肯執, 阻住地球轉,
爛感性, 爛感情, 就算唔關自己事, 睇見都覺得厭惡,
跟唔上時代唔系錯, 死霸住個位先系原罪,
亞視早十世都應該執佐佢啦好唔好,
呢世人都怕且搵唔到更反胃既公司,
死都死得樣衰過人
5. 打工仔 Andy 2016-03-08 09:42:29
珍兄

講起亞記, 小弟也有一點回憶, 小弟電視工程出身, 經常在麗記無記出入! 
時代變了!
6. 怒婦炒魚柳 2016-03-08 12:24:29
要支持,每人每日睇三個鐘,你哋睇到十五分鐘我都當你贏,噏就天下無敵,行就有心無力
7. Joe 2016-03-08 19:16:10

又一篇讀後令人熱淚盈眶、感動人心的文章!

8. 惜緣 2016-03-08 21:06:18

Joe兄, 真有同感啊! 謝謝珍港兄.

【心靈語坊】相遇在天,相守在人,珍惜在心

https://www.youtube.com/watch?v=SRZpZfrqqXs&list=RDHiGgAw9TP3Y&feature=player_detailpage

9. 亞視永恆 執笠嘅係你 2016-03-09 09:22:07
《亞視永恆》

原曲:《愛是永恆》,張學友
作曲:Dick Lee
改詞:毛記電視
主唱:河國榮

又有新股東 能受百樣痛
難道有合約合同 就會簽林峯
這亞洲不可釘蓋 廢極都有用
Happy birthday to me 岩布仙尼奉送

試睇幾秒鐘 頭部重又重
仍是有誤播內容 又搶Fo成功
亞視會 永遠都存在
朱慧珊 仲有個何B/有低智森 仲有亢帥克/有宮雪花 仲會掟壽包

*有著我 便有著你 想亞視永不死
穿過咗王征 跨過咗維基
有著我 便有著你
啲節目咁有taste 實預埋你
亞視永恆 熄機無義氣*

又播返《富翁》 然後播舊戲
其實佢係有籌旗 就快出人工
每日播 愛國的言論
令我頭上 形住有蜜蜂

Repeat*

有著我 便有著你 睇亞視我OK
咪話好難睇 好過睇自己
有著我 便有著你
loop到下個世紀 仲未埋尾
亞視永恆 執笠嘅係你
10. CD ROM 2016-03-09 20:16:45
我反而好深印象亞視播卡通片既輝煌時間,如亂馬,入樽,天空戰記。係我印象中能與隔離平分秋色既時期。
11. 珍惜香港 2016-03-10 11:13:07
珍惜香港

致亞視員工的信,已經出咗兩日。本來寫過就算,冇諗過再補充,但我發覺,原來有唔少人,對信嘅內容,唔太明白,或者對出信嘅目的,有所誤解。有人以為,我想感動大眾,令多啲人支持亞視、多啲人睇亞視;亦有朋友話,我只喺借出信為名,目的喺要勸諫港人,珍惜自己嘅價值。

我以為,信嘅內容,已經寫得好白,但睇嚟,我真喺要再寫白啲。

首先,我唔喺要呼籲大眾,睇多啲亞視,6/F 嘅怒婦,完全捉錯哂用神。其實莫講話十五分鐘,我睇一分鐘都嫌多,唔鍾意都夾硬睇,算乜嘢支持?信中第二段,我寫得好清楚,呢封信,已經喺對亞視,最有效嘅支持。

另外要強調,信嘅對象,的而且確喺亞視嘅員工,我真心希望佢地收到。所以今次破例,直接分享於我嘅專頁上面,希望多啲人見到同分享。平時,我只會將自己嘅回應同文章,加入留言集個 LIST 裡面。

至於信中,提到香港人嘅迷失,的確有勸諫嘅意思。不過我唔喺借出信為名勸諫港人,因為珍惜香港,喺冇號召力,但亞視嘅員工就唔同。我希望佢地,以過來人嘅身份,為港人帶出信息。呢個就喺,我信中所提到,用埋最後一口氣,做番啲有意義嘅事

點解,要亞視嘅員工,為港人帶出信息?

尋日,有線訪問筱靖,佢話亞視搞成咁,都喺多得啲大陸股東,引入「大陸嘅方式」,管「香港嘅媒體」喎!我當堂 O 哂咀,依家妳怪啲股東,喺大陸人?點解妳又唔怪香港人,冇個肯揹起呢隻鑊?股東,主要喺科水,家陣香港人,冇錢咩?果個司榮彬,又幾有錢?講埋啲咁嘢,覺唔覺得慚愧?「香港嘅媒體」,又有幾巴閉?唔通喺 HKTV?家陣「大陸嘅方式」,拍嘅內地劇集、電影,質素高,製作嚴謹,唔怕得罪講句,HKTV,冇得比!

一年前嘅僱員,依家講埋啲風涼話,唔追欠薪,就話費事同啲更慘嘅員工爭,好偉大噃!講得咁風騷,我就不妨直說,唔好唔記得,冇亞視,冇亞姐選舉,妳有今時今日?做人,千祈唔好忘本,家陣亞視得番唔夠一個月,真喺有心嘅話,就親身過去支持下,客串演出,一毫子都唔好收,我就俾個 LIKE 妳!

依家香港人,尤其果十六萬,加埋果六萬六,恃住底夠厚,就唔記得哂,自己之所以個底咁厚,喺佢地睇唔起果班,唔多學識嘅前人,好努力咁爭取番嚟。十幾年免費教育、比美私樓嘅公屋,邊個俾錢?冇經濟效益,啲錢會由天跌落嚟架?冇地產霸權、冇零售,會有最低工資?呢班香港人,可以巴支閉,大大聲話,高鐵、三跑,唔希罕!今日,垂手可得嘅,他朝,你跪地求饒,都冇人會俾你。

呢個世界,好現實,你冇價值,人地點解要俾你?

今時今日,亞視剩番嘅,就只得歷史價值,既然只得歷史價值,咁再放幾多水,都唔會有分別,即喺話,莫講俾多 2500 萬、800 萬、400 萬,就算喺十蚊都嫌多。唔少人對亞視,都好似 4/F 果類人咁,講啲尖酸刻薄嘅說話,針對嘅,喺亞視嘅員工,唔喺亞視嘅老細,點解?因為每日為亞視頻道,安排一幕幕畫面嘅,就喺亞視嘅員工,唔喺老細;而聽到呢啲說話,最難受嘅,亦喺亞視嘅員工,唔喺老細!

今日亞視,明日香港

香港人,故步自封,但內地各大城市,就一日千里。乜「大陸嘅方式」、乜「香港嘅媒體」,講得咁風騷?他日香港,只喺得番歷史價值,阿爺俾十蚊都嫌多果陣,十幾億人口就會對香港,講番 4/F 堆說話:該死唔肯死、阻住地球轉、睇見都厭惡、跟唔上時代、死霸住個位、搵唔到更反胃、死得樣衰過人,之類之類。到時香港人,就可以體會到,亞視員工,今日嘅感受。而當 4/F 果類人果十六萬果六萬六,走過亞視呢個巨大歷史里程碑面前嘅時候,記起當年亞視員工嘅勸諫,都只能俯首而過,唔再抬得起頭。

我想問,呢 160 位員工,既然被遣散咗,點解仲肯再簽番果份,張建宗評為,唔可取嘅臨時約?做到最後一刻,究竟為乜?仲投資响亞視,又喺為乜?你地究竟,喺乜嘢角色?對亞視、對社會,仲可以有乜貢獻

如果,只喺一如既往,重複又重複咁,播番啲舊嘢,或者好似司榮彬話齋,搞埋個亞姐選舉就算,坦白講,我都會喺果句,睇一分鐘都嫌多。

我希望各位員工,就亞視從頻道消失之前,把握呢個最後機會,總結亞視嘅歷史、香港嘅歷史,通過面對歷史,為香港人,帶出信息,勸諫港人,話俾佢地知,真正嘅價值,究竟喺乜嘢,大家應該珍惜嘅,又喺啲乜嘢。咁嘅話,你地先有資格稱之為,真正專業嘅亞視投資者,名留青史;而亞視,就唔單止喺,一個歷史價值咁簡單,而將會喺,香港,一個重要嘅里程碑

我已經講得好白,亦唔會再補充。各位有心嘅話,請將呢封信嘅 FB 分享,再分享出去。雖然話喺隨緣啫,但我都希望,增加亞視員工,收到嘅機會。

謝謝各位!

http://facebook.com/hongkongtruevalue/posts/527562907405064
12. 亮劍 2016-03-10 12:57:22
香港某些人以為畫地為牢,然後河水不犯井水,咁他們就會重拾往日美好時光,實在太幼稚😓 

呢個世界實在有太多蠢人,以為拉倒港珠澳大橋;整瓜高鐵;打沉三跑就可弄到中共垮臺,實在中毒太深😰 

事實係香港呢家無左大陸不能生存,反之大陸無左香港仲可以識行識走😨
13. BC 2016-03-10 13:23:06
Good to see 亮劍兄。 Pls share more option
14. 引刀一快 2016-03-10 13:26:17
亮劍兄

好耐冇見!挂念得很。

其實你呢種睇法,先至係正中下懷。

拒絕同祖國親近嘅人,係一種偏激,而你呢種對事情過敏嘅睇法,係一種對立嘅偏激。

兩種偏激廣泛喺社會同時出現,就破壞社會和諧。

咁就正中下懷!

靠反對起橋都可以令執政黨垮臺?有冇諗過係邊個諗多咗呀?
15. 惜緣 2016-03-10 14:20:03
亮劍兄

好耐冇見! 非常掛念,希望亮劍兄和各師兄師姐多多分享。

16. 打工仔 Andy 2016-03-10 14:52:24
亮劍兄

好耐冇見! 非常掛念 ! 
17. 小師妹 2016-03-10 14:52:36
亮劍兄,

好耐冇見!好高興見到你留言,也希望往後你可以多些分享你的意見!
18. Gordy 2016-03-10 16:56:37
珍港兄,從字里我感覺到你澎湃的情感,亦有孤注一擲的悲壯。多謝你令我改觀。

一個少睇亞視的人上
19. 元朗人 2016-03-13 11:59:10
小弟亦算是亞視擁躉,近一年翻看過幾套劇:追族、天蠺變、鱷魚淚、亞視百人等,還是非常欣賞。期望奇蹟出現令它有得繼續玩。
20. 天靈 2016-03-13 12:07:15
好想睇返 恐怖片 天靈
21. Sugar 2016-03-13 12:19:40

元朗人前輩 :

久未見您 , 甚念 ! 願一切安好 .

我前陣子追看了 " 浮生六劫 " 和 "大內群英 " , 真是日以繼夜 ,夜以繼日......^^

同望奇蹟啊 ,但看來機會渺茫.

22. 元朗人 2016-03-13 18:48:46
Dear Sugar

謝謝祝願。不經不覺在此網站留連五載了,近期真的看得較疏,但仍關注這裡的一切,猶其等待你的新作,希望不用我們等待太久吧。覺得你悄悄已為此站萬人迷,加油呀^^


23. Sugar 2016-03-13 22:32:11

元朗人前輩 :

陰霾霾的天氣真叫人萎靡不振 ,見到您就像是見到了驟雨中的陽光 !

@.@萬人迷???這美夢太好, 不願早醒 , 且容我多醉一會兒......只怕現實是 "周身債 ,萬條數 " 喎^^

最近公私兩忙呢 .但 ,既然您想看 ,就為您而寫吧 !

24. 珍惜香港 2016-04-03 01:24:36
珍惜香港

亞視,終於關咗燈啦!真喺好失望,算啦,預咗!

尋日,睇 TVB 講清講楚,提到香港嘅旅遊,要吸引海外旅客多啲,定喺內地客多啲?

不如問下各位,究竟,香港人,內地人,定喺外國人,最珍惜香港嘅,歷史價值

記得不久之前,同一間賣舊嘢嘅相熟店主吹水,講開呢個話題。店裡面,有一個膠製錢箱,形狀仿製咗舊嘅匯豐銀行大廈。店主話,呢件舊嘢,好罕有,亦好有歷史價值。我問佢,賣幾錢?佢話,五千蚊,之前有好幾個外國人問過,一聽到價錢就掉頭走。香港人呢?反應喺,嘩!鑲金架?最後,俾個大陸熟客睇中,已經留咗俾佢。原來,好多內地人,專程落嚟香港,揾啲高價舊嘢,尤其有歷史價值果啲!

佢話,旨意本地人?去哂堆填區啦!
25. 引刀一快 2016-04-03 02:02:10
所以我一直勸人買多間大陸屋,唔等駛嘢大把地方放,過幾十年,分分鐘值錢過間屋喇。
26. CD ROM 2016-04-03 02:52:59
珍兄,係咪成個深红色ga?

好似曾幾何時家裡出現過wor
27. 亮劍 2016-04-22 15:16:22
珍惜香港及引刀兄……你們對袁彌昌這篇文章有何看法?

小弟始終認為,今後幾十年係大陸發圍起 pair 的時代,如果我們中國人能抓緊機遇,便能成就百年盛世。

http://paper.hket.com/article/1412685/%E4%B8%80%E5%B8%B6%E4%B8%80%E8%B7%AF%20%E5%8A%A9%E8%8F%AF%E6%93%BA%E8%84%AB%E8%A1%B0%E8%90%BD%E5%AE%BF%E5%91%BD
28. CD ROM 2016-04-22 15:49:31
亮劍兄, 別來無恙呀嘛???
30. 袁彌昌 2016-04-22 22:18:06


http://paper.hket.com/article/1412685


31. 引刀一快 2016-04-23 09:56:07
To 27樓 亮劍兄

亮劍兄,引刀好挂住你呢。

一帶一路如果可以成功的話,無疑係一個全新嘅形勢,但係依傢大陸實際上最大問題係文化問題,我一直認爲,今次經濟低走,正係教育國民嘅好時機,中國人口夠晒多,文化上到去就基本上乜都唔怕。

大陸對香港嘅政策走向,毫無疑問一定係俾你富貴但唔俾你吃重,除非佢自己好唔掂。
32. 蕭峰 2016-04-23 10:17:19
引刀兄

「係依傢大陸實際上最大問題係文化問題,我一直認爲,今次經濟低走,正係教育國民嘅好時機,中國人口夠晒多,文化上到去就基本上乜都唔怕」

冇玩了,經濟上唔去,文化更加上唔去。經濟差,影響社會穩定,人心浮動時,人民受教化?

講的唔好聽d,經濟基礎決定上層建築,文化屬於意識形態,沒有基礎,妄論意識形態。

33. 歷史長河 2016-04-23 10:21:51
刀兄又在搬龍門,不過搬來搬去,都喺大陸唔掂。
34. 引刀一快 2016-04-23 10:23:39
長河san

係你撚概念啫,大陸終須一跌,我幾時都冇改口風。
35. 引刀一快 2016-04-23 10:27:07
蕭峰兄

你講緊呢樣嘢,夠我喺論壇出三到五篇文喇。

全中國都係一致認爲經濟上而國民文化未上,包括文化未上嘅人自己都係咁講!

經濟唔跌,何來教育機會?
36. 歷史長河 2016-04-23 10:28:47
終須一跌?升5倍跌2成算嗎?
37. 引刀一快 2016-04-23 10:30:54
又撚數字。
38. 蕭峰 2016-04-23 10:46:51
引刀兄

你出三到五篇文,我一定捧場!

國民文化的確未跟上,但以經濟跌之後來講文化,顛倒了。

39. 珍惜香港 2016-04-24 03:07:06
珍惜香港

TO:26/F CD ROM

的確喺深红色,有兩個 SIZE。仲响度嘅話,就好好保存,呢啲嘢,攞去放就平,人地賣就貴。仲有好多舊嘢,都好值錢,例如九龍火柴、香港火柴啦,特別喺多合一裝。

TO:27/F 亮劍

關於亞投行、一帶一路,我諗,成或敗,好難定義;點先叫成,點先叫敗?我嘅睇法,好簡單,只要用於發展,用於創造可持續發展嘅資源,咁前景,就一定喺正面。當然,呢啲大 PROJECT,會涉及融資、借錢之類,不過我從來都話,數字嘢,喺可以處理嘅。虛擬數字,點搬都得,但創造咗嘅資源,一舊舊擺哂响度,唔通會倒轉頭消失番咩!

點解我唔睇好歐洲?因為佢地借錢,唔喺用嚟發展,而喺攞嚟燒

所以,我對中國嘅評價,喺好正面。有啲評論員,成日話大陸會冧喎!咁,乜嘢叫冧?股市跌叫冧?樓市跌叫冧?資產價格,總有起跌,但國民嘅生活,喺不斷改善中。三十年前嘅中國人民,斷估唔到今時今日,國家會發展成依家咁,我地又點可以,用今日嘅眼光,睇三十年後嘅中國?擔心 2047,喺完全不切實際

我睇好中國,喺因為國家,仍然發展中,世界,仍然發展中,仲有好多空間。凡事,都有兩面,遲起步嘅,當然要追,但遲亦有遲嘅好處。眼見西方各國,因漸趨成熟,而出現嘅種種致命問題,發展中嘅大國,就可以引以為鑑。所以點解我話,慶幸中國,未有民主,未有福利主義,呢啲恐怖嘢,喺要靠壓搾他國嚟填,而可以壓搾嘅地方,已經買少見少。唔通阿爺仲會咁傻仔,走去行呢條死路?

增持資源,至喺王道。亞投行、一帶一路,就喺增持資源嘅手段,香港能夠參與其中,一定喺好事。亮劍兄,中國人,能否百年盛世?我諗,唔在於亞投行,亦唔在於一帶一路,而喺在於,呢啲大 PROJECT,引證咗中國領導層,已經好清楚,國家,喺需要啲乜嘢,人民,喺需要啲乜嘢

只要香港,响國家發展嘅過程中,搵出自己嘅角色,充分擔當好自己嘅角色,咁就會同國家一樣,百年盛世。