地產博客 > 資深會員專欄 返回
瀏覽人次:31400    回應:53
資深會員專欄
專業機構投資者(二)市場嘅角色
 
珍惜香港
專業機構投資者
SMIEEE.MSc(ICDE)
http://facebook.com/hongkongtruevalue/
2016年1月18日
上文提到,我會再同大家,分享自己嘅體驗同體會,包括早前提過果三個十倍。但由於呢部份,曾經响近一年半前嘅「環球經濟新常態之一(債嘅機遇)」回應系列中詳述過,大家可以先 CLICK 番去重溫一下,而我亦會盡量避免重複。不過,唔好意思,點寫,呢篇嘢,都會好長。

尋覓商機嘅生涯

我喺一個生意人,2000 年創業,2009 年結業。之前打工、之後做生意,我都好慳,成世人跑到依家,除工幹以外,都只喺去過一次旅行。我將所有賺番嚟嘅錢,放哂入磚頭裡面,所以結業之後,單靠收租除成本嘅淨收入,已經可以養家。幾年以嚟,我同戰友,不斷奔走,尋覓、BRAINSTORM 新嘅商機,除咗最熟嘅科技老本行,以及同互聯網有關嘅創新嘢之外,仲計劃過搞藥房、找換店之類,真喺乜都諗齊。

對每一項計劃,我地都好認真,自己出資,定喺搵投資者夾?生意模式、運作是否可行?只喺短線,定喺可以長遠發展?唔熟行嘅,使唔使搵合作對象?而對方又信唔信得過?有時,唔喺信任問題,而喺响盤生意裡面,自己會擔當乜嘢角色?呢個角色,是否長遠?成事之後,人地仲使唔使靠你?唔好以為我地只喺老吹,真喺物色咗合作伙伴,連計劃書都出埋。就好似創新科技項目,有哂 SCHEDULE、BUDGET;而找換店呢,連內地對沖嘅人事,都隨時可以商議。但到最後,呢啲計劃,全部告吹,而大部份,都喺我地自己決定剎停。

後期,終於有咗結論,自己都唔再年青,又有哂家庭,响百業歸邊嘅大環境之下,復出搞實體企業,要面對嘅風險,始終唔喺我地可以承受,亦冇必要去搏。於是,我地開始諗下啲投資項目,用磚頭融資,由掃幾十個發展商拆售嘅車位,到買起一間教育機構嘅大舖,都考慮過。其實,响 BRAINSTORM 嘅過程中,包括上段提及嘅各項計劃,都有同合作多年嘅銀行,商談融資嘅可能性同模式。所以,我地非常了解,所謂低息、QE,根本就落唔到去實體經濟度。搞實業嘅融資成本,喺 P+;而購入金融資產嘅融資成本呢,就只喺 P-,甚至喺 H+。到最後,由搞實業,變成投資金融項目,只不過喺,勢之所趨啫!

債券投資簡述

我地選擇投資項目,非常保守,要融資,就唔可以炒價圖利,一定要有穩定,同可預期嘅現金流,為主要嘅收益。身為生意人,我地唔接受只喺响數字上,而唔了解自己實質角色嘅投資,呢一點非常重要,我稍後會解釋。結果,我地選擇咗高息債券,要留意,喺直接購入同持有債券,唔喺債券基金,呢兩味,喺天淵之別,我稍後亦會解釋。

投資債券,門檻高,一個單位要廿萬美元。基於匯價風險,我地借港幣,就唔會考慮美元以外嘅債券,果陣市場睇好人仔都喺咁話。記得我當時講過,匯價始終喺相對嘅,升跌冇得估,家陣人仔點樣,各位有眼睇。融資方面,個別債券要視乎評級,同銀行內部嘅風險評估。投資級別嘅債券,可按六至七成;非投資級別嘅債券,可按五至六成;太低級嘅債券,喺冇得按。按得嘅,當然有槓桿風險,呢啲風險,主要嚟自債價,同違約呢兩部份。

債價方面,每隻債券,喺以 100 為發行基礎,有升有跌。其實,買債,即喺借錢俾發行企業,只為收息,唔喺要賺價;反正到期之日,發行企業都喺以債價 100,即喺廿萬美元,還番錢俾你。期間債價升跌,只喺基於市場對個別債券,實質收益率(YIELD)嘅評估,造成交易雙方嘅轉手價,偏離 100。例如,一隻非投資級別嘅高息債,升級成投資級別,就會被市場追捧,直至債價升到個 YIELD 同市場其他投資級別嘅債券睇齊。又例如,一間企業有非常負面嘅消息,令市場擔心佢還唔起錢,導致違約,咁佢嘅債價就會大插。一般債價,好少會跌破 90,跌穿 90 嘅,一定唔慌好嘢。企業違約,可以喺停止派息,以低於 100 還錢,甚至喺唔還錢,呢個就喺債券投資嘅最大風險。

第一個十倍:資產

我地買債,喺先用現金購入,再混合磚頭一併融資,以投資機構模式運作,响融資方面,就有較大嘅彈性,同攞得到最盡。就以磚頭為例,商業融資,可按高至八成以上,再加上槓桿投資,規模就會做到好大。假設你响後沙士期間,以 100 萬買咗個兩房單位,升到 300 萬,已經供滿,咁按八成,就即喺融資 240 萬,再以五至七成,即喺平均六成槓桿買債,就可以買到 600 萬債券,加埋市值 300 萬磚頭,總資產就喺 900 萬,升咗九倍。不過,呢個只喺起動,擴大資產,即喺擴大咗現金流收益,再槓桿,再投資,運作幾年,當然已經超過十倍啦!

果次我話,幾年之內,將原始資產,由原來嘅三倍,再擴大至十倍,就喺咁嘅意思。100 萬原始磚頭資產,由原來升值咗嘅三倍,即喺 300 萬,再通過融資同槓桿買債,先擴大至九倍,幾年運作,已經超過十倍。但我嘅原始資產,可以令我結業後養到家嘅,當然唔止 100 萬,至於個基數幾多,SORRY,喺私隱,唔方便公開。再者,我以上嘅數字,已經比較粗略同保守,真正嘅規模,當然唔止十倍。

第二個十倍:現金流

既然喺以現金流,唔喺以賺價為收益,資產擴大,現金流就自然擴大。我嘅債券,都喺八厘以上,就當平均九厘;而銀行對金融資產嘅融資,喺好低息,就當佢兩厘,淨收入都有七厘。用以上例子,600 萬債券,每年淨收益 42 萬,每月就喺三萬五千。當年 100 萬嘅兩房單位,租金除成本,收入都只得六千左右,依家租金升咗,就當一萬啦,咁即喺,現金流收入,由六千,擴大至四萬五千。咦?只喺七倍半,何來十倍?

都喺果句,呢個只喺起動,每年 42 萬收益,再槓桿就可以買多一球債。大家唔好扮醒捉錯,話債券單位廿萬美元,一球喺買唔到。都話,呢個只喺數字例子,我嘅規模,何止咁小?回正題,每年多買一球債,複式上,運作三年,每月總現金流就會超過六萬,即喺十倍啦!

第三個十倍:風險承受能力

大家都喺識得計數,今時今日,响香港,擁有市值幾千萬物業嘅人,為數不少;而租金淨收入,只喺得果兩至三厘,每月都唔夠十萬。呢盤生意,可以令佢地身家過億,每月成球收入,邊度搵?我早前話過,經營多年,之後衍生咗一系列抄襲同變種個案,而佢地經歷過兩個大浪之後,好多都搞到損手爛腳。

對風險嘅承受能力,呢個十倍,先至喺最重要!

近半年嚟,無論股市、債市,都大幅波動。恆指由二萬八,跌至近二萬,最近仲穿埋,直逼萬九。咁債市呢?幾乎全線下跌,連表現最好嘅債券基金,都下跌一成。市場一般嘅金融資產,普遍下跌三至四成,而我嘅資產市值,响最差果陣,都只喺跌咗 3-4%。呢個就喺我所講,經歷近期連串市場波動嘅試練,我對風險嘅承受能力,証實為市場一般能力嘅十倍。

大家可能會覺得,我有啲取巧,人地跌三至四成,我跌 3-4%,咁就叫十倍?好多人以為,手持現金嘅多少,先至喺對風險嘅承受能力,因為有事果陣,就睇你有幾多現金自救。不過,作為一個生意人,我想問大家一句,依家你喺要自己果盤生意,可以承受到市場嘅風險;定喺要你自己,去承受你盤生意嘅風險?如果你盤生意喺唔掂嘅,就不如摺埋佢,好似我當年結業咁,唔好等到真喺唔掂果陣,先至抬自己副身家去救!

不過,話分兩頭,响 2015 年,我已經將一部份現金流,以非槓桿模式購入資產。我嘅增長,雖然慢咗,但借貸比率,已經大幅下降至安全水平。當然,增加咗嘅槓桿額度,隨時又可以攞嚟買嘢,但有乜嘢好買?唔通喺股票咩!

正因為我盤生意,面對大市風險,具十倍嘅抗跌力,到市場資金醒覺,就自然流向我嘅資產類別。跌 3-4% 之後,跟手已經回升 6%。到依家恆指直逼萬九,我嘅資產市值,仍然高企,當中手持重貨嘅高息債,已經俾人搶到有價冇市。點解?因為阿爺減息之後,穩陣嘅高息債,已經唔會再有新貨啦!

專業機構投資者:市場嘅角色

當日我講三個十倍,即刻就有人出嚟,笑我做 MARGIN 買垃圾債投機。其實,傳統銀行肯做得槓桿嘅債券,就算喺非投資級別,都經過銀行內部嚴格審視,不過,自己當然亦要對發債企業,作出評估。我以前都話過,買債,即喺借錢俾人,呢盤喺生意,喺投資,唔喺投機,唔喺炒股搏升賺價。簡單嚟講,借錢俾人,人地點風光,唔關你事,有啲人,有錢都唔想還。所以,我反而要睇佢點衰,佢衰果陣,點樣處理危機,先至喺你對佢有冇信心嘅關鍵。基於呢個標準揀債,結果我手持最重貨果隻,由非投資級別,升咗上投資級別,債價急升,槓桿又由六成變七成,呢一劑,喺最經典。我嘅債券,已經唔再喺垃圾,或者正確啲講,從來都唔喺垃圾!

响第五段度,我提過一個重點,亦喺呢篇文章,最重要嘅部份。

生意人賺錢,一定要清楚知道,自己賺嘅錢,喺點樣嚟,俾嘅成本,去咗邊。真正嘅投資,唔喺依賴啲乜嘢必贏投資法,或者乜嘢數字、流程、公式。最重要喺清楚自己,响市場裡面,擔當乜嘢角色,咁你就會知道,幾時應該出手,幾時應該收手。我之所以,花咁大篇幅,寫自己買債之前,多項計劃嘅告吹,喺希望大家明白,响一個發展成熟嘅經濟體裡面,創業喺好難,因為你好難搵到一個,可以長遠生存嘅角色。搵到嘅,就喺機會難逢,捉唔住,未必會再有下次。

我好清楚自己嘅角色,喺為發債企業,提供發展嘅未來錢,收息,喺分享佢地發展嘅利潤。點解我會响人地,享受緊美債基金嘅高收益果陣,叫人睇緊啲?家陣美債問題,芳間睇法,以為喺長期低息,令企業濫發債,但唔通啲企業,個個都想呃人錢?美國已經冇可能,好似發展中國家咁,有超過 5% 嘅經濟增長,既然喺低增長,融資成本就一定要低,因為冇人俾得起。所以,新常態之下,長期低息,喺合理;唔合理嘅,喺點解咁低息,啲企業債,仲可以上十厘?即喺話,高息差,只喺嚟自投資需求,夾硬俾投資者瓜分,人地根本就俾唔起,咁點好嘅企業,都變垃圾啦!

所以,我投資嘅債券,都喺內地企業發嘅美元債,低息港幣融資,投放高增長市場,享受高息差,先至喺合理。不過,內地企業,尤其內房,芳間嘅評論,都屬高風險。ANYWAY,最近云云債基之中,似乎只有內房債基,表現最好。記得早前,對於為咗個樓市,死等爛等嘅人,我問:你究竟想買件物業,定喺要買個「市」

專業機構投資者,令人聯想起基金,而基金嘅角色,喺幫客人,唔喺幫自己投資。所以,基金一定要分散投資,一方面,降低風險,另一方面,購入一籃子金融資產,即喺買個「市」。咁基金價格下跌,就梗喺因為個「市」跌,喺個「客」冇眼光,買錯「市」啦!關隻基金乜事?唔好唔記得,你贏又好,輸又好,基金都喺咁賺你錢,人地喺「幫」你投資嘛!呢個,就喺基金嘅角色。

而我,呢個專業機構投資者,就要用自己嘅錢同資產投資。所以,規模幾大,都喺集中哂响果幾隻債券度,至於債基,都喺用買債淨低嘅零錢購入,佔總資產少過一成,順便勘探市場,唔喺點識咁多宏觀嘢。呢種高度集中,有違一貫分散風險嘅做法,正喺因為,我唔喺投機,唔喺要買個「市」,一隻都唔輸得!呢個就喺我第五段尾講嘅,天淵之別。我嘅角色,喺為企業,提供發展嘅未來錢,值得借嘅,唔介意借哂俾你一個!

後感

Alan打工仔,最近嘅文章,寫得短,但我好欣賞。物業買貴咗,唔喺問題,但最緊要唔好唔記得,自己買嚟做乜。大家用股票同物業比,喺冇意義。買件物業嚟「用」,講乜輸贏?但股票,又可以「用」嚟做乜?自住物業,响生活上,擔當住好重要嘅角色;收租佬,响實體市場上,亦有明確嘅角色。如果你炒股票,玩牛乜熊乜期乜,你又知唔知道,自己响實體經濟裡面,喺乜嘢角色?還是,只喺响一個大枱面上,同人對賭?

各位有冇深思過,自己嘅事業、生意、投資,擔當緊乜嘢角色?對社會,對市場,有乜嘢貢獻?

我寫嘢,從來俾唔到大家答案,因為答案,每個人都唔一樣。
 
 
我要回應
我的稱呼
回應 / 意見
驗証文字
 
會員登入
登入ID 或 網名
密碼
1. 打工仔 Andy 2016-01-18 12:08:52
沙發先!
2. 望東樓 2016-01-18 12:44:07
High yield bond都係我嘅至愛資產類別,不過只係買fund(係駛入水雷區嘅航母)。
3. 打工仔 Andy 2016-01-18 12:46:14
珍兄

債券投资嘅学問的確比買樓收租高好多! 小弟學到野! 
多謝分享! 
4. 蓄芳待來年 2016-01-18 13:24:44
「買件物業嚟「用」,講乜輸贏?」貌似簡單,實深得價值二字之精髓。
如果認為在香港「買樓住」係「必需品」,就無謂去諗乜賺蝕。反正都要「食」,視乎個人能力,有錢就「食」好d,冇錢就「食」平 d。成日諗住天日後日會平d,所以今日忍下餓吾食住,或者用「麵包」頂住先,唉,人生何苦如此?
計較生活必需品之價格者,腦海除了錢之外,應該沒有其他。
只要決定出於「量力而為」,心𥚃根本不需有任何包袱。

多謝珍惜師兄無私分享。
5. 占士 2016-01-18 14:21:23

謝謝珍港兄好文分享!您一直是我敬佩的師兄!我自己也有參與不同種類的投資項目,也有和朋友合作經營實業,有的現在還在進行,有的已經停止。這些年,很多做實業的朋友都艱苦經營,如果可以的話,我會繼續經營,甚至不斷拓展業務!所以在市場上,我有好幾個角色,我會分配好自己的時間盡力做好每一個角色。

6. Taiwaner 2016-01-18 14:26:48
感謝,,這篇要看多幾次才能體會, 我想大概的意思就是“眼光要好”
7. 請教珍港兄 2016-01-18 14:44:37
閣下提出的港元高息債,是否能在高開市埸買得到?謝謝。
8. AH-HO 2016-01-18 15:00:34
謝謝珍兄的無私分享。
3個10倍,等左甘耐終於知道了。
最同意就是:對風險嘅承受能力,呢個十倍,先至喺最重要!能夠做到個scale甘大但又可以嚴控風險,確實厲害!

9. CDROM 2016-01-18 15:48:28
我知道珍兄既分享唔係志在掌聲, 不過小弟睇完第一次忍唔住拍爛左手掌.
響近年財務自由之路幾近斷絕之際彷彿見到一線曙光, 多謝珍兄帶來希望同正能量俾我地呢d新手走下去既力量.

10. Jerry 2016-01-18 15:51:32
謝謝珍兄分享!

要知道自己既角色呢一點真係好重要。

了解自己投資的是什麼?能承受多少壓測、風險?在別人恐懼時增持有價值之物,一直持有價值之物直到它失去價值。

了解多了債券操作,感謝! 贊
11. 向饭民说不 2016-01-18 16:41:10
今日研究了台湾的22k问题,结论就是台湾大学生根本唔值22k。虽然台湾人怨声载道,但是22k应该是比多左。
12. 向饭民说不 2016-01-18 17:16:39
我都话,PEG系统只会一次有一次的引大鳄攻击,今日见到了彭博系度煲,

CHKMA Pledges to Keep Currency Peg: These Are Some Alternatives

http://www.bloomberg.com/news/articles/2016-01-17/hkma-pledges-to-keep-currency-peg-these-are-some-alternatives
13. 無奈 2016-01-18 17:19:24
坦白說,可能今生都難有機會、膽量學珍兄這般在投資市場操作,服!
買基金,命運操作在別人的手𥚃,正確。小弟多年投資大陸物業,管理託他人,回報時好時壞,只是託賴地產價格水漲船高,如此說來也不算什麼投資,要重新考慮下啦。

期待珍兄在後續文章里分享一下如何選擇債劵,謝謝。
14. 望東樓 2016-01-18 17:27:14
饭民兄,以我所知,台灣99%年青人係學士,20%係博士。供求呀嘛?
15. 向飯民說不 2016-01-18 18:51:53
樓上,你說的有道理,但是也是顯示22k
其實是ovetpaid。
國民黨的失敗其實是民進黨將22k問題推給國民黨,成功了年輕人對國民黨失去信心。
看來,空心菜要解決問題,還是量化寬鬆,將台幣貶值,同時解決18%問題。
16. 工商舖百厭星 2016-01-18 21:03:37
珍惜兄,

實在太好的一篇文,一定要入來支持吓!謝謝分享