地產博客 > 資深會員專欄 返回
瀏覽人次:26644    回應:17
資深會員專欄
長期淡友,不停買樓?
 
Alan Pepper
2015年9月4日

有些傳媒人,一句淡友/好友介紹主角,又或者傳媒人根本唔知主角係乜水,只是為了爭取眼球。其實係咪淡友就沽貨,好友就買?這非黑即白的簡單想法,根本不切實際。

很多人只是將其工作或生意上賺取的金錢「儲存」在一些保值的東西。如他們喜歡,黃金、鑽石、古董、名畫甚至會所會籍都得。樓是其中之一,因為除咗保值之外還有租收,比較容易了解,有市價,唔容易俾人呃。這些人根本不會理會短期的升跌,因為他們知道長遠一定抗通脹,這是他們唯一目的。這些人很多是傳媒所講的好友,但係佢地並唔係咁認為。佢地可能都覺得樓價好貴,但照買。點解?因為總比銀紙貶值好。試想,如果他們是好友,點解唔借到盡買多幾間?

從 07 年起每天都聽到人講去槓桿 (deleveraging),不經不覺已過了 8 年,什麼都去槓桿完了吧?為何要去槓桿?因為怕。為何怕?因為淡。淡仲買樓?因為工作或生意賺回來的錢可以買乜?樓係其中一項必定考慮的資產。

有一位前輩曾經同我講,有經紀求他以高價賣其市中心的單棟物業。他跟我說,如他賣了,他就要花時間考慮買什麼投資。最終咪又係買物業?咁賣嚟做乜?

當然,當市況唔好的時候,這些人會放慢入貨速度,期待一些質素及位置近好的樓盤出現,或考慮分散其它投資。但係,除非佢哋等錢洗,唔會趁着市況低迷的時候賣出物業。因為市況差,買家就會鋤價,本來仲想入貨嘅人點會平啲賣俾你?更何況是已經收緊租的物業?咁呢啲唔賣出物業的是不是好友?不,只是未找到其他投資項目而以。這些人相反可能係淡友,因為佢地都係摸住石頭過河。

以上持有物業的全部係淡友,他們持貨只有一個原因,只係將佢哋賺回來的錢儲存及抗通脹。那什麼才是真正的好友?我認為只有那些「將全副身家都押落去,仲可以借錢借到爆,在這個全世界最動盪嘅時候買樓」的人,才是真正好友。你地試吓將我在「」的內容,重複講十次,問你驚唔驚?但偏偏現在就發生緊。

可惜某些傳媒就將這些人「儲錢」的放法一知半解地講俾其觀眾聽,擾亂視聽,誤人子弟。希望現在想上樓的人可以獨立思考及分析自己經濟狀況,才考慮上樓,唔好再聽呢啲不負責任的傳媒。

共勉之

 
 
我要回應
我的稱呼
回應 / 意見
驗証文字
 
會員登入
登入ID 或 網名
密碼
1. 路人皆知 2015-09-04 12:02:28

「」內容講一萬次都唔怕,微觀來看我自已及身邊親人及好友沒有這樣做,宏觀來看這樣的物業擁有者佔百分比有多大呀?!


2. LIKE 2015-09-04 12:09:06
Well said.
3. 路人皆知 2015-09-04 12:15:31

我想問香港人質素真係咁差? 如Alan 兄以不所描述咁都俾傳媒引導到作出錯誤決定(買樓咁重大決定呀!),我覺得買家唔該自已負責唔好賴地硬,反而語論自由百花齊放才是可貴!

可惜某些傳媒就張這些人「儲錢」的放法一知半解地講俾其觀眾聽,擾亂視聽,誤人子弟。希望現在想上樓的人可以獨立思考及分析自己經濟狀況,才考慮上樓,唔好再聽呢啲不負責任的傳媒。

4. Alan Pepper 2015-09-04 13:15:56
To 1/F & 3/F,  恭喜您及您的朋友沒有一個借到盡,本人亦只係提醒,了解自己的財政狀況才入市,投資者當然要對自己決定負責。

各下亦無須對號入座,我冇點名講您或您朋友。我想信您唔係您所講「質素真係咁差」的香港人。
5. 打工仔 Andy 2015-09-04 14:10:50

AP兄午安

 

你講得好有道理!

同樣有好朋友問我, 為何不在旺市時沽出部份物業? 無錯, 的確係, 但我在想, 如果是市區的好地段, 估出後日後真不容易買回,

 

況且, 如果手持的單位質素不差, 日後買回都不知是什麽? 如果仲要搞裝修, 來回就唔見好多成本了! 當然, 也要看現在的借贷比律, 如果不高, 繼續持有作收租又可以喎!

 

6. 亮劍 2015-09-04 16:34:34
CCL本週報146.78,再次破頂大升1.33。 (2015年9月4日) 租住等望穿秋水,希望以「合理價」重新入市,但事與願違,唯有高追。
我幾年前已將劇本早透,世人仲以為我痴L線!
有人話大獲, 穿左146.68, 可能直上170 😂
但要是在半年內發生,這叫井噴,係不祥之兆!!!
如果加上新地將南昌站一次过以「170 市價」賣走,咁就真的有鬼,大家好走…………所以我希望呢次係假突破!

公平地說,呢家收租果个自不然開心啦,但你們有否切身處地同租住等想一想?
你估佢地交成皮野租不肉痛嗎?
因此只要有機會,他們就會想方設法脫離你們的魔掌!!!
呢家難得有拾零弍拾万「低息」上車機會,他們自不然唔會「錯過!」不要剷走我,小弟只是為租住等吐一口烏氣咋。
7. CD ROM 2015-09-04 17:00:52
唔係講笑, 認識一D朋友, 有買賣過樓既, 佢地對於估價, 上會, 計壓測, 好似一無所知咁都得.................

說回主題, 大家又覺得以今時狀況, L/V ratio要去到幾多方為合適呢???
8. Alan Pepper 2015-09-04 18:53:43
我一向都舉腳贊成買自住樓,只是要睇自己負擔能力。例如你有七成首期,但工作不穩定,銀行都唔會批。或者你只有三成首期,但工作前景好及穩定,那就應該要安居。但工作穩唔穩定並唔係你主觀可以預測得到,而係視乎客觀環境的,過分樂觀未必係一件好事。例如你2012年在零售、酒店從業,以為前途無可限量,今日腳都震。

一切都要因客觀及切身環境而定。我有一對朋友想 upgrade 居住環境,佢哋已經擁有一個五六百尺單位,佢問我依家換唔喚得過千呎單位。賣咗自住單位儲儲埋埋有五成首期,俾完首期之後現金所剩無幾,但係可以向政府中小企擔保計劃向銀行借錢,作他們公司的營運資金。我再問佢地公司前景如何?他們說無可限量(我也認同,因為見到佢哋做啲野認真一流)。我又再問佢哋公司嚟緊有冇project 需要一筆資金,佢又話有可能。再問如果比佢揀,會將筆資金投資落個 project 或買樓?佢哋話梗係個project啦!我O嘴兼打咗個突,都唔知哋佢問我做乜?我心諗我又唔係先知,冇可能知道升定跌。佢哋已經有樓在身,安居已經唔係一個問題。佢要住大啲,咪租囉,補多一萬幾千佢哋負擔得起喎,左手交租右手收租都幾好呀。我冇直接答佢哋,只係話長遠來講買樓投資係好事,但係如果為咗層樓,影響佢哋生意前景就喊都無謂啦,你哋自己諗啦,然後埋單走人。

所以每個人切身環境都不同,自己計吓數才是良策。我覺得賺錢都係應該專注喺工作或事業上,將賺回來的錢投資保值,而唔係買樓望發達。任何投機都係好似入賭場一樣,係唔值得鼓勵的。

各位賭王多多得罪 😅😅
9. 朗晴 2015-09-04 19:45:19
傳媒有責任之餘,個人都好應該認清世界大環境,特別係同港幣掛釣嘅美國.
今曰同個伙記講開美國QE每月850億美金,我話世界上最大粒507卡鑽石都係三億港幣有找,但美國一個月就印唔止六千億港幣,即係個個月掘到二千粒權頭咁大嘅鑽石.
點知個伙記講:邊可以咁印傢? 要收番D舊銀紙返嚟先可以印新銀紙架嗎!😵
真係比佢吹難賬,連自己將會點死都未知.😰
10. 歷史長河 2015-09-04 20:20:19
Alan 兄,「所以每個人切身環境都不同,自己計吓數才是良策。我覺得賺錢都係應該專注喺工作或事業上,將賺回來的錢投資保值,而唔係買樓望發達。任何投機都係好似入賭場一樣,係唔值得鼓勵的。」。講得好,認同。其實這也正是這裡大部分師兄做緊個嘢,。
11. 打工仔 Andy 2015-09-04 21:49:21
To 長河兄
的確係, 小弟幾十歲人見識雖然不多, 但親身經歷也不少! 老老實實, 我都未聽過炒乜炒物可以炒到唔使做或退休之類! 我相信我地一群努力工作又有樓收下租的, 點都不會太差的! 
12. 引刀一快 2015-09-04 23:21:31
入市都会睇价位嘅,白茫茫走去买楼咩,唔好混淆视听,美国印银纸要找数嘅,冇可能定位唔变,你唔卖时就自有其他人卖,揸楼咁好点解地产商唔扣住D货啫,从来买唔番嘅都系靓铺位,住宅甚少买唔番,楼市跌仲任你拣添。
13. 歷史長河 2015-09-05 12:45:06
「入市都会睇价位嘅,白茫茫走去买楼咩,唔好混淆视听,美国印银纸要找数嘅,冇可能定位唔变,你唔卖时就自有其他人卖,揸楼咁好点解地产商唔扣住D货啫,从来买唔番嘅都系靓铺位,住宅甚少买唔番,楼市跌仲任你拣添。 」。刀兄,小弟試試不同演繹。

入市要計好承受力嘅,承受得起就去買嘍。吾好患得患失,印出的銀紙會收返咩?冇可能咁易戒毒!你唔買時就自有其他人買,揸現金咁好點解地產商仲買地起樓啫。從來買唔番嘅系時間,金錢可以掙,安居才能樂業,何須理會一朝一夕之升跌!
14. y 2015-09-05 13:54:19
在經濟前景普遍被看淡的情況下,樓市除了舖之外,還是居高不下,令到淡友行唔安坐唔樂
對價位的預測,從來沒有人準過,估不準是常理,何必為了自完其說而強行解釋呢。
有說股市跌,樓市怎能獨好,但當年神洲股市由六千幾點跌落二千點,樓市還是照升不誤,總之任何估量(無論估升估跌)都要有心理準備做明燈。
15. 引刀一快 2015-09-05 14:23:24

历史长河兄

呵呵,在下又可以睇睇,睇睇可唔可以,又用番我理念再演绎。

"入市要計好承受力嘅,承受得起就去買嘍。吾好患得患失,印出的銀紙會收返咩?冇可能咁易戒賭!你唔買時就自有其他人買,揸現金咁好點解地產商仲買地起樓啫。從來買唔番嘅系時間,金錢可以掙,安居才能樂業,何須理會一朝一夕之升跌!"

计得到财务承受力,就计唔到心理承受力,楼市大冧就有得患失冇得患得!如果印咗银纸就作实,津巴布韦好快可以做世界最大经济体系。我唔買時就自有其他人買,咁嘅价位我祝福佢地,等到佢地唔买,就系时候买。揸現金咁好地產商都要营运要出粮。從來買唔番嘅系時間,所以入市要谨慎,金錢必须掙,何必帮人家接货?想安居樂業,何須在意一朝一夕之观望等待?

 

16. 路人12 2015-09-05 14:46:50
引刀兄

其實你是唔是湯生既分身?
17. 歷史長河 2015-09-05 14:58:29
刀兄,果然是地產版著名資深淡友,2:1,刀兄贏!